ଅନୁଗୋଳ ଅଫିସ, ୧୩।୧୨-ଅନୁଗୋଳ ପୌରପାଳିକାରେ ମୋ ସରକାର ସେଲ୍ ଗୁରୁବାରଠାରୁ ଖୋଲାଯାଇଛି। ଏଣିକି ଅଭିଯୋଗ ନେଇ ପୌର କାର୍ଯ୍ୟାଳୟକୁ ଆସୁଥିବା ଜନସାଧାରଣଙ୍କୁ ତୁରନ୍ତ ବସିବା ପାଇଁ ଚୌକି ସହ ପିଇବାକୁ ପାଣି ଦିଆଯିବ। ଅଭିଯୋଗ ଉପରେ ପଦକ୍ଷେପ ନିଆଯିବା ପ୍ରକ୍ରିୟା ମଧ୍ୟ ଯଥାଶୀଘ୍ର ଆରମ୍ଭ ହେବ। ତେଣୁ ଆସୁଥିବା ଅଭିଯୋଗଗୁଡ଼ିକୁ ଧୈର୍ଯ୍ୟର ସହ ଶୁଣିବାକୁ ପୌର ନିର୍ବାହୀ ଅଧିକାରୀ ବିନୋଦ ଚନ୍ଦ୍ର ପଣ୍ଡା କର୍ମଚାରୀମାନଙ୍କୁ ପରାମର୍ଶ ଦେଇଛନ୍ତି।
ପୌର କାର୍ଯ୍ୟାଳୟ ବାମ ପାର୍ଶ୍ୱ ଗୃହରେ ମୋ ସରକାରର ସେଲ୍ ଖୋଲାଯାଇଛି। ଏ ନେଇ ମଧ୍ୟାହ୍ନରେ ଏକ ବୈଠକ କାଉନସିଲ୍ ହଲରେ ଅନୁଷ୍ଠିତ ହୋଇଥିଲା। ମୋ ସରକାର ଦାୟିତ୍ୱରେ ଥିବା ମ୍ୟାନେଜମେଣ୍ଟ ଇନ୍ଫରମେସନ୍ ସିଷ୍ଟମର କର୍ମଚାରୀ ସ୍ବାଗତିକା ସିଂହଙ୍କ ସହ ନିର୍ବାହୀ ଯନ୍ତ୍ରୀ ସୀମାଞ୍ଚଳ ମିଶ୍ର, ଜେଇ ଦୁର୍ଗାପ୍ରସାଦ ପଟ୍ଟନାୟକ ଓ ଅନ୍ୟମାନେ ଉପସ୍ଥିତ ଥିଲେ। ଲୋକଙ୍କୁ କିପରି ସେବା ଯୋଗାଇ ଦିଆଯିବ ସେ ସମ୍ପର୍କରେ ବୈଠକରେ ଆଲୋଚନା ହୋଇଥିଲା। ବିଶେଷକରି ଲୋକମାନଙ୍କ ଅଭିଯୋଗକୁ ଭଲଭାବେ ଶୁଣିବା ସହ ସମ୍ପୃକ୍ତ ବିଭାଗକୁ ତୁରନ୍ତ ପଠାଇବାକୁ କୁହାଯାଇଥିଲା। ଯଦି କୌଣସି କାରଣ ବଶତଃ ଲୋକମାନେ ଉତ୍ତ୍ୟକ୍ତ ମନୋଭାବ ପୋଷଣ କରନ୍ତି, ତେବେ ତୁରନ୍ତ ନିର୍ବାହୀ ଅଧିକାରୀଙ୍କ ନିକଟକୁ ତାଙ୍କୁ ନେବା ପାଇଁ ନିର୍ବାହୀ ଅଧିକାରୀ ପରାମର୍ଶ ଦେଇଥିଲେ। ମୋ ସରକାର ସେଲ୍ରେ ପ୍ରାଥମିକ ଭାବେ ଟ୍ରେଡ ଲାଇସେନ୍ସ, ହୋଲଡିଂ ଟ୍ୟାକ୍ସ ଓ ଆବାସ ଯୋଜନା ସମ୍ପର୍କରେ ଅଭିଯୋଗ ଶୁଣାଯିବ। ପୌରପାଳିକା ପକ୍ଷରୁ ବିଲ୍ଡିଂ ପ୍ଲାନ ଦିଆଯାଉ ନ ଥିବାରୁ ଏହାକୁ ଏବେ ବାଦ୍ ଦିଆଯାଇଥିବା ସୂଚନା ମିଳିଛି। ଏ ନେଇ ପୌର ନିର୍ବାହୀ ଅଧିକାରୀ ପଣ୍ଡା କହିଛନ୍ତି, ପୌରପାଳିକାରେ ମୋ ସରକାର ସେଲ୍ ଖୋଲାଯାଇଛି। ପ୍ରଥମ ଦିନରେ କୌଣସି ଅଭିଯୋଗ ଆସିନାହିଁ। କାର୍ଯ୍ୟାଳୟକୁ ଆସୁଥିବା ଅଭିଯୋଗଗୁଡ଼ିକୁ ପ୍ରାଧାନ୍ୟ ଦିଆଯାଇ ସମାଧାନ କରାଯିବ ବୋଲି ପଣ୍ଡା ପ୍ରକାଶ କରିଛନ୍ତି।
