ନୂଆଦିଲ୍ଲୀ,୧୪ା୬:ନିଖୋଜ ବାୟୁସେନା ବିମାନ ଏନ୍-୩୨ର ଭଗ୍ନାବଶେଷ ଅରୁଣାଚଳର ଏକ ଘଞ୍ଚ ଜଙ୍ଗଲଘେରା ପାର୍ବତ୍ୟାଞ୍ଚଳରୁ ମିଳିଛି। ତେବେ ଏଥିରେ ଥିବା ସମସ୍ତ ୧୩ ଜଣ ଯାତ୍ରୀ ପ୍ରାଣ ହରାଇଛନ୍ତିି। ବାୟୁସେନା ପକ୍ଷରୁ ସେମାନଙ୍କୁ ଶ୍ରଦ୍ଧାଞ୍ଜଳି ଅର୍ପଣ କରାଯାଇଛି। ବିମାନଟି ପିଟିହେବା ପରେ ଚୂର୍ମାର୍ ହୋଇଯାଇଥିବା ସନ୍ଦେହ କରାଯାଉଛି। ବିମାନର ବ୍ଲାକବକ୍ସକୁ ଉଦ୍ଧାର କରାଯାଇ ପରୀକ୍ଷା କରାଯାଉଛି।
ବିମାନଟି ଜୁନ୍ ୩ ତାରିଖରୁ ନିଖୋଜ ହେବା ପରେ ବ୍ୟାପକ ତଲାସି କରାଯାଇଥିଲା। ମୃତକଙ୍କ ମଧ୍ୟରେ ଅଛନ୍ତି ଓ୍ବିଙ୍ଗ କମାଣ୍ଡର୍ ଜି.ଏମ୍. ଚାଲର୍ସ, ସ୍କ୍ବାଡ୍ରନ୍ ଲିଡର୍ ଏଚ୍. ବିନୋଦ, ଫ୍ଲାଇଟ୍ ଲ୍ୟୁଟ୍ନାଣ୍ଟ ଏଲ୍.ଆର୍. ଥାପ୍ପା, ଏମ୍.କେ. ଗର୍ଗ, ଆଶିଷ ତନ୍ଓ୍ବର୍, ସୁନୀତ୍ ମହାନ୍ତି, ଓ୍ବାରେଣ୍ଟ୍ ଅଫିସର୍ କେ. କେ. ମିଶ୍ର, ସର୍ଜେଣ୍ଟ ଅନୁପ୍ କୁମାର, କର୍ପୋରାଲ୍ ସେରିନ୍, ଲିଡିଂ ଏୟାର୍କ୍ରାଫ୍ଟ ମ୍ୟାନ୍ ଏସ.କେ. ସିଂ, ପଙ୍କଜ, ରାଜେଶ କୁମାର ଓ ପୁଟ୍ଲି। ରୁଷିଆ ନିର୍ମିତ ଏହି ବାୟୁସେନା ବିମାନଟି ଆସାମର ଜୋର୍ହାଟ୍ରୁ ଚାଇନା ସୀମାନ୍ତବର୍ତ୍ତି ଅଞ୍ଚଳ ମେନ୍ଚୁକାକୁ ଯାଉଥିଲା। ବିମାନଟି ଛାଡ଼ିବାର ଅଧଘଣ୍ଟା ପରେ ଏହା ସହ ସମ୍ପର୍କ ରକ୍ଷା କରାଯାଇ ପାରି ନ ଥିଲା। ନିଖୋଜ ଏହି ବିମାନକୁ ଠାବ କରିବା ଲାଗି ବିଭିନ୍ନ ପ୍ରୟାସ କରାଯାଇଥିଲା। ଶେଷରେ ୮ ଦିନ ପରେ ସୀମାନ୍ତବର୍ତ୍ତୀ ଏକ ଗ୍ରାମର ୧୨ ହଜାର ଫୁଟ ପାର୍ବତ୍ୟାଞ୍ଚଳରେ ଏହାର ଭଗ୍ନାବଶେଷ ବାୟୁସେନା ପକ୍ଷରୁ ମଙ୍ଗଳବାର ଠାବ କରାଯାଇଥିଲା। ତା’ ପରେ ବୁଧବାର ୧୫ ଜଣିଆ ଏକ ଉଦ୍ଧାରକାରୀ ଟିମ୍ ସେଠାକୁ ପଠାଯାଇଥିଲା।
