ଜଳେଶ୍ୱର, ୧୮।୧୨-ବାଲେଶ୍ୱର ଜିଲା ଜଳେଶ୍ୱର ବ୍ଲକ କୋଟସାହି ପଞ୍ଚାୟତର ଦରଜି ଗଁା ଭାବେ ପରିଚିତ ଗୋବର୍ଦ୍ଧନପୁର। ଏଠାରେ ପାଖାପାଖି ୪୦୦ ପରିବାର ବସବାସ କରନ୍ତି। ଆଉ ସମସ୍ତେ ଯୋଗୀ ସମ୍ପ୍ରଦାୟର। ସିଲେଇ ସେମାନଙ୍କ କୁଳ ବେଉସା। ଏବେ ଗାଁର ୩୦୦ ପରିବାର ସିଲେଇ ବୃତ୍ତିକୁ ଆପଣେଇ ପରିବାର ପୋଷୁଛନ୍ତି।
ଏହି ଗଁା ସୁବର୍ଣ୍ଣରେଖା ନଦୀ କୂଳରେ ଅବସ୍ଥିତ। ଗ୍ରାମବାସୀଙ୍କ ଯାହା କିଛି ଜମି ଅଛି, ସେଥିରେ ଚାଷ କଲେ ପ୍ରତିବର୍ଷ ବନ୍ୟାରେ ଧୋଇ ହୋଇଯାଉଛି। ତେଣୁ ଆୟର ଅନ୍ୟ କୌଣସି ଉପାୟ ନ ପାଇ ଗାଁ ଲୋକେ ସେମାନଙ୍କ କୁଳ ବେଉସାକୁ ଆପଣେଇଛନ୍ତି। ଏହି କାମରେ ଘରର ପୁରୁଷ ଓ ମହିଳାମାନେ ନିୟୋଜିତ ହୋଇଛନ୍ତି। ବାଲେଶ୍ୱର, ଭଦ୍ରକ, ଯାଜପୁର ଓ ମୟୂରଭଞ୍ଜ ଜିଲାର ବିଭିନ୍ନ ସ୍କୁଲ ଓ ଅଙ୍ଗନୱାଡ଼ିରୁ ଅର୍ଡର ଆଣି ଏହି ଗାଁର ଲୋକେ ପୋଷାକ ଯୋଗାଇଥାନ୍ତି। ଏହାସହିତ ସାୟା, ବ୍ଲାଉଜ୍, ଚୁଡ଼ିଦାର ସମେତ ବିଭିନ୍ନ ରେଡିମେଡ୍ ପୋଷାକ ତିଆରି କରି ହୋଲ୍ସେଲ୍ରେ ଦୋକାନୀମାନଙ୍କୁ ଯୋଗାଇଥାନ୍ତି।
ଡ୍ରେସ୍ ତିଆରି କରିବା ପାଇଁ ଗାଁର ଏହି ଲୋକମାନେ କଲିକତାରୁ କପଡ଼ା ଓ ସୂତା ସହିତ ଅନ୍ୟାନ୍ୟ ସାମଗ୍ରୀ ଆଣିଥାନ୍ତି। ଗୋଟିଏ ସ୍କୁଲ ଶାର୍ଟ ତିଆରି ପାଇଁ ୭୦ରୁ ୮୦ ଟଙ୍କା ଖର୍ଚ୍ଚ ହୋଇଥାଏ। ଆଉ ବିକ୍ରି ହୋଇଥାଏ ୧୦୦ ରୁ ୧୧୦ ଟଙ୍କାରେ। ସେହିପରି ଗୋଟିଏ ପ୍ୟାଣ୍ଟ ତିଆରି ପାଇଁ ୬୦ରୁ ୭୦ ଟଙ୍କା ଖର୍ଚ୍ଚ ହେଉଥିବା ବେଳେ ୯୦ରୁ ୧୦୦ ଟଙ୍କା ମଧ୍ୟରେ ବିକ୍ରି ହୋଇଥାଏ। ଗୋଟିଏ ରେଡିମେଡ୍ ଚୁଡ଼ିଦାର ତିଆରି ପାଇଁ ୧୫୦ ଟଙ୍କା ଖର୍ଚ୍ଚ ହେଉଥିବା ବେଳେ ୧୯୦ରୁ ୨୦୦ ଟଙ୍କାରେ ବିକ୍ରି ହୋଇଥାଏ। ଜଣେ କାରିଗର ଦୈନିକ ୩୫ରୁ ୪୦ଟି ପ୍ୟାଣ୍ଟ କିମ୍ବା ଶାର୍ଟ ତିଆରି କରିଥାନ୍ତି। ସେହିପରି ଦୈନିକ ଜଣେ କାରିଗର ୨୫ରୁ ୩୦ ଚୁଡ଼ିଦାର କିମ୍ବା ବ୍ଲାଉଜ୍ ତିଆରି କରିପାରନ୍ତି। ଏସବୁ ତିଆରି କରି ଜଣେ କାରିଗର ଦୈନିକ ପ୍ରାୟ ୪ଶହରୁ ୫ଶହ ଟଙ୍କା ରୋଜଗାର କରିଥାନ୍ତି। ଯଦି ସରକାର ଏହି କାରିଗରମାନଙ୍କୁ ସହାୟତା ଯୋଗାଇ ଦିଅନ୍ତେ, ତା’ହେଲେ ଆଧୁନିକ ଯନ୍ତ୍ରପାତି ଆଣି ସେମାନେ ନୂତନ ଡିଜାଇନ୍ର ଡ୍ରେସ୍ ତିଆରି କରିବା ସହ ଅଧିକ ଡ୍ରେସ୍ ତିଆରି କରିପାରନ୍ତେ ଓ ଆହୁରି ଆଗକୁ ବଢ଼ିପାରନ୍ତେ।
ଗୋବର୍ଦ୍ଧନପୁର ବାସିନ୍ଦା ଅଶୋକ ନାଥ କହିଛନ୍ତି, ଏହା ଆମ ଜାତିର ବ୍ୟବସାୟ। ଏଥିରେ ଆମ ପରିବାର ଚଳେ। ହେଲେ ସରକାରୀ ସାହାଯ୍ୟ କିଛି ମିଳୁନାହଁି। ଋଣ ମିଳିଲେ ଆମେ ହାଇସ୍ପିଡ୍ ମେଶିନ୍ କିଣିପାରନ୍ତୁ। ରାଧାଶ୍ୟାମ ନାଥ କହିଛନ୍ତି, ‘ପୁରୁଣା ଢଙ୍ଗରେ ସିଲେଇ କାମ ଚାଲିଛି। ନୂତନ ଢଙ୍ଗରେ କିଛି ହେଉନାହଁି। ସରକାରଙ୍କ ତରଫରୁ ପ୍ରଶିକ୍ଷଣ ବ୍ୟବସ୍ଥା କରାଗଲେ ଭଲ ହୁଅନ୍ତା।
(ଗୋପବନ୍ଧୁ ସାହୁ)
