ଢେଙ୍କାନାଳ ଅଫିସ, ୧୪।୬ – ମହିମା ସ୍ବାମୀଙ୍କ ଆତ୍ମଯୋଗ ସାଧନାସ୍ଥଳୀ ତଥା ମହିମା ଧର୍ମର ଆଦିପୀଠ ତପୋବନକୁ ବୁଧବାର ଅପରାହ୍ନରେ ଢେଙ୍କାନାଳ ଏମ୍ପି ମହେଶ ସାହୁ ପରିଦର୍ଶନ କରିଛନ୍ତି। ପୀଠରେ ଲାଗି ରହିଥିବା ସମସ୍ୟା ସମାଧାନ ଏବଂ ବିକାଶରେ ଆବଶ୍ୟକ ସହଯୋଗ କରାଯିବ ବୋଲି ଏମ୍ପି ପ୍ରତିଶ୍ରୁତି ଦେଇଛନ୍ତି। ଜିଲାର ଅନ୍ୟତମ ଧର୍ମୀୟସ୍ଥଳୀ ଭାବେ ତପୋବନ ପୀଠର ମାହାତ୍ମ୍ୟ ରହିଛି। ଏଠାରେ ଥିବା ରୋଷଘରକୁ ଖୁବ୍ଶୀଘ୍ର ସୌରଶକ୍ତି ସମ୍ପନ୍ନ କରାଯିବ। ଏ ନେଇ ପ୍ରକଳ୍ପ ରିପୋର୍ଟ ପ୍ରସ୍ତୁତ କରାଯାଉଥିବା ଓଡ଼ିଶା ଅକ୍ଷୟ ଶକ୍ତି ବିଭାଗ ସହକାରୀ ନିର୍ଦ୍ଦେଶକ କିଶୋର କୁମାର ଦାସ ସୂଚନା ଦେଇଛନ୍ତି। ଆଗାମୀ ଦିନରେ ପୀଠର ସୌନ୍ଦର୍ଯ୍ୟକରଣ ଦିଗରେ ଦୃଷ୍ଟି ଦିଆଯିବ। ଏଥିସହ ଫଳଚାରା ମଧ୍ୟ ରୋପଣ କରାଯିବ ବୋଲି ଉଦ୍ୟାନ କୃଷି ଉପନିର୍ଦ୍ଦେଶକ ଡ. ଭଗବାନ ଦାସ କହିଛନ୍ତି।
ଏହି ଅବସରରେ କୌପିନଧାରୀ ମହିମା ସମାଜ ସଭାପତି ଶ୍ରୀମଦ୍ ରଘୁନାଥ ବାବା ଏମ୍ପିଙ୍କୁ ମହିମା ଧର୍ମର ପ୍ରାସଙ୍ଗିକତା ଏବଂ ଏହାର ଦର୍ଶନତତ୍ତ୍ୱ ସମ୍ପର୍କରେ ଅବଗତ କରାଇଥିଲେ। ପୀଠର ଐତିହ୍ୟ ସମ୍ପର୍କରେ ମହିମା ଜ୍ୟୋତିଯାତ୍ରା ସଂଯୋଜକ ପ୍ରଦ୍ୟୁମ୍ନ ରଥ କହିଥିଲେ। ଢେଙ୍କାନାଳ-କପିଳାସ ରାସ୍ତାର କୃଷ୍ଣକୁମାରପୁରଠାରୁ ପୀଠକୁ ସଂଯୋଗ କରୁଥିବା ୪ କିମି ରାସ୍ତା ଶୋଚନୀୟ ହୋଇପଡ଼ିଛି। ଯାତାୟାତ ସୁଗମ କରିବା ପାଇଁ ଏହାର ମରାପତି ଦାୟିତ୍ୱ ପୂର୍ତ୍ତ ବିଭାଗକୁ ଦେବାକୁ ସାଧୁମଣ୍ଡଳୀ ତରଫରୁ ଦାବି କରାଯାଇଛି। ଏମ୍ପିଙ୍କ ଏହି ଗସ୍ତ ସମୟରେ ହିନ୍ଦୋଳ ବ୍ଲକ ଅଧ୍ୟକ୍ଷ ପ୍ରିୟଦର୍ଶନ ମାହୁନ୍ତଙ୍କ ସମେତ ଦଳୀୟ କର୍ମୀ ଉପସ୍ଥିତ ଥିଲେ।
