କୋଲକାତା,୧୫ା୬(ପି.ଟି.): ‘ଜୟ ଶ୍ରୀରାମ’ ସ୍ଲୋଗାନକୁ ମୌଳିକ ଅଧିକାର କରିବା ଲାଗି କାଲକାଟା ହାଇକୋର୍ଟରେ ଏକ ଜନସ୍ବାର୍ଥ ମାମଲା (ପିଆଇଏଲ୍) ଦାଏର ହୋଇଛି। ପଶ୍ଚିମବଙ୍ଗରେ ଜୟ ଶ୍ରୀରାମ ସ୍ଲୋଗାନ ଦେଉଥିବା ଲୋକଙ୍କ ବିରୋଧରେ କାର୍ଯ୍ୟାନୁଷ୍ଠାନକୁ ବିରୋଧ କରି ଏଥିରେ ହସ୍ତକ୍ଷେପ କରିବା ନିମନ୍ତେ ଅଦାଲତଙ୍କୁ ଅନୁରୋଧ କରାଯାଇଥିଲା। ହାଇକୋର୍ଟ ଶୁକ୍ରବାର ମାମଲାର ଶୁଣାଣିକୁ ସ୍ଥଗିତ ରଖିଛନ୍ତି। ଭଗବାନ ରାମଙ୍କୁ ପୂଜା କରୁଥିବା କିମ୍ବା ତାଙ୍କ ନାମ ଜପ କରୁଥିବା ବ୍ୟକ୍ତିଙ୍କୁ ବାଧା ନ ଦେବା ଏବଂ ସେମାନଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ ନ କରିବା ଲାଗି ଆବେଦନକାରୀ ଆଇନଜୀବୀ ପାର୍ଥ ଘୋଷ ହାଇକୋର୍ଟରେ ଜନସ୍ବାର୍ଥ ମାମଲା ଦାଏର କରିଥିଲେ। ତୁରନ୍ତ ହସ୍ତକ୍ଷେପ କରିବାକୁ ମନା କରି ଖଣ୍ଡପୀଠ ମାମଲାର ଶୁଣାଣିକୁ ୪ ସପ୍ତାହ ଲାଗି ସ୍ଥଗିତ ରଖିଛନ୍ତି। ସୂଚନାଯୋଗ୍ୟ, ପଶ୍ଚିମବଙ୍ଗରେ ଜୟଶ୍ରୀରାମ ସ୍ଲୋଗାନକୁ ନେଇ ଭାଜପା ଓ ତୃଣମୂଳ କଂଗ୍ରେସ କର୍ମୀଙ୍କ ମଧ୍ୟରେ ଏକାଧିକ ସଂଘର୍ଷ ହେଲାଣି। ଏପରିକି ମୁଖ୍ୟମନ୍ତ୍ରୀ ମମତା ବାନାର୍ଜୀ ଯାଉଥିତ୍ବାବେଳେ ଭାଜପା କର୍ମୀ ଜୟଶ୍ରୀରାମ କହିବାରୁ ସେ ଗାଡିରୁ ଓହ୍ଲାଇ ସେମାନଙ୍କୁ ଧମକାଇଥିଲେ।
