ଗଞ୍ଜାମ,୧୭ା୧(ଡି.ଏନ.ଏ.) – ଗଞ୍ଜାମ ଜିଲାର ହୁମ୍ମା ଓ ଗଞ୍ଜାମ ଆଖପାଖ ଅଞ୍ଚଳରେ ହଜାର ହଜାର ଏକର ଲୁଣ ଜମି ଏବେ ଗୋଚର ପାଲଟିଲାଣି। ଲୁଣ ଉତ୍ପାଦନକୁ ଗୁରୁତ୍ୱ ଦିଆ ନ ଯିବା, ଦର ବୃଦ୍ଧି ପାଉ ନ ଥିବା ଆଦି କାରଣରୁ ଚାଷୀମାନେ ଏଥିରୁ ମୁହଁ ଫେରାଇବାକୁ ବାଧ୍ୟ ହେଉଛନ୍ତି। ଗଞ୍ଜାମ ଅଞ୍ଚଳରେ ଲୁଣ ଚାଷ ପାଇଁ କେନ୍ଦ୍ର ସରକାରଙ୍କ ୧,୪୭୨ ଏକର ଜମି ରହିଛି। ସେଥିମଧ୍ୟରୁ ୭୨୯ ଏକର ହୁମ୍ମା ଓ ବିଞ୍ଚଣାପଲ୍ଲୀ ଲବଣ ସମବାୟ ସମିତି ଅଧୀନରେ ଅଛି। ଅବଶିଷ୍ଟ ଜମି ଲିଜଧାରୀଙ୍କ ନାମରେ ରହିଛି। ପୂର୍ବରୁ ଏଠାରେ ଉତ୍ପାଦିତ ଲୁଣକୁ କଷ୍ଟିକ୍ ସୋଢ଼ା ପ୍ରସ୍ତୁତ କରିବା ନିମନ୍ତେ କେନ୍ଦ୍ର ସରକାରଙ୍କ ପକ୍ଷରୁ ଅନ୍ୟ ରାଜ୍ୟକୁ ନିଆଯାଉଥିଲା। ବର୍ତ୍ତମାନ ତାହା ସମ୍ପୂର୍ଣ୍ଣ ବନ୍ଦ ହୋଇଯାଇଛି। ଗଞ୍ଜାମ ବ୍ଲକର ହୁମ୍ମା ସମେତ ଲକ୍ଷ୍ମୀପୁର, ଝାଡ଼ୁକୁଦା, ମୟୂରପଦା, ନିଳାଦ୍ରୀପୁର, ଖଟୁଆକୁଦା, କଣ୍ଟିଆଗଡ଼, ବିଞ୍ଚଣାପଲ୍ଲୀ, ପୁଇଁତୋଳା ଓ ସୂର୍ଯ୍ୟନାରାୟଣପୁର ଗ୍ରାମର ଲୋକେ ଅନ୍ୟାନ୍ୟ ଚାଷ ସହ ଲୁଣ ଚାଷ ମଧ୍ୟ କରିଥାନ୍ତି। ହେଲେ ସରକାରଙ୍କ ପକ୍ଷରୁ ଲୁଣଚାଷ ପାଇଁ କୌଣସି ପ୍ରୋତ୍ସାହନ ମିଳୁ ନ ଥିବା ସେମାନେ ଅଭିଯୋଗ କରିଛନ୍ତି। ଅନ୍ୟପକ୍ଷରେ ଉନ୍ନତ ପ୍ରଣାଳୀରେ ଧାନ, ପନିପରିବା ଚାଷ କରାଯାଉଥିବା ବେଳେ ଏଥିପାଇଁ କୌଣସି ସଚେତନତା କାର୍ଯ୍ୟକ୍ରମ କରାଯାଉନାହିଁ। ପୁଇଁତୋଳା ଗ୍ରାମର ଚାଷୀ ବୃନ୍ଦାବନ ସାହୁ କହିଛନ୍ତି, ବଜାରରେ ସବୁ ଦରଦାମ ବୃଦ୍ଧି ହେଉଥିବା ବେଳେ ଲୁଣଦର ବୃଦ୍ଧି ହେଉନାହିଁ। ଏଥିପାଇଁ ଏହି ଚାଷ କରିବାକୁ ଆଗ୍ରହ ନ ଥିବା ସେ କହିଛନ୍ତି। ପ୍ରାକୃତିକ ବିପର୍ଯ୍ୟୟ, ଅଦିନିଆ ବର୍ଷା ଯୋଗୁ ଗତ ୩/୪ବର୍ଷ ହେବ ଲୁଣଚାଷରେ କ୍ଷତି ଘଟୁଥିଲେ ମଧ୍ୟ ପ୍ରଶାସନ ପକ୍ଷରୁ କ୍ଷତିପୂରଣ ମିଳୁ ନ ଥିବା କହିଛନ୍ତି ମୟୂରପଦା ଅଞ୍ଚଳର ଜଣେ ଚାଷୀ । ପ୍ରୋତ୍ସାହନ ମିଳିଲେ ଅଧିକ ଲୁଣ ଉପତ୍ାଦନ ହୋଇପାରନ୍ତା ବୋଲି ସେ କହିଛନ୍ତି। ଅନ୍ୟପକ୍ଷରେ ଚାଷୀ ପରିବାରର ଜଣେ ସଦସ୍ୟ ତଥା ଭାଜପା ନଗର ସଭାପତି ସୁଦାମ ଚରଣ ଜେନା ଳୁଣ ଚାଷ ସମସ୍ୟା ଜଣାଇବା ପାଇଁ ବ୍ରହ୍ମପୁରରେ ଥିବା ଜିଲା କ୍ଷୁଦ୍ରଶିଳ୍ପ ନିଗମ (ଡିଆଇସି) କାର୍ଯ୍ୟାଳୟକୁ ବାରମ୍ବାର ଦୌଡ଼ୁଥିଲେ ମଧ୍ୟ କୌଣସି ଅଧିକାରୀଙ୍କ ଭେଟ ମିଳୁ ନ ଥିବା ସେ ଅଭିଯୋଗ କରିଛନ୍ତି। ଲକ୍ଷ୍ମୀପୁର ଅଞ୍ଚଳର ଲୁଣ ବ୍ୟବସାୟୀ କେ. କବିତା ଦୁଇଅଡ଼ା ଲୁଣକୁ ୧୦ ଟଙ୍କା ଓ ୧୫୦ ବସ୍ତାଏ ଲୁଣକୁ ମାତ୍ର ଦେଢ଼ଶହ ଟଙ୍କାରେ ସେ ବିକ୍ରି କରୁଥିବା କହିଛନ୍ତି। ଲୁଣ ବିକି ପରିବାର ଚଳାଇବା କଷ୍ଟକର । ତେଣୁ ଆମ ଲୋକେ ଦାଦନ ଖଟିବାକୁ ରାଜ୍ୟ ବାହାରକୁ ଯାଇଛନ୍ତି ବୋଲି କବିତା କହିଛନ୍ତି। ଏ ସମ୍ପର୍କରେ ବିଡିଓ ଜ୍ୟୋତି ଶଙ୍କର ରାଏ କହିଛନ୍ତି, ସୋସାଇଟି ପକ୍ଷରୁ ଦାବିପତ୍ର ମିଳିଛି। ଜିଲାପାଳଙ୍କୁ ଅବଗତ କରାଯିବା ପରେ ପଦକ୍ଷେପ ନିଆଯିବ ।
