ବନ୍ତଳା, ୩୦।୧୨ (ଡି.ଏନ୍.ଏ.) – ଅନୁଗୋଳ ଜିଲା ସାତକୋଶିଆ ଅଭୟାରଣ୍ୟ ମଧ୍ୟରେ ବେଆଇନ ଭାବେ ଚାଲିଛି ଗଞ୍ଜେଇ ଚାଷ। କୌଣସି ସୂତ୍ରରୁ ଏସ୍ପି ଜଗମୋହନ ମୀନା ଖବରପାଇ ଜିଲା ଭଲ୍ୟୁଣ୍ଟାରି ଫୋର୍ସ ଓ ପୁରୁଣାକୋଟ ପୋଲିସ ସହାୟତାରେ ବଲଙ୍ଗ ପଞ୍ଚାୟତର ଲବଙ୍ଗୀ ଓ ଜୁକୁବୁ ଗ୍ରାମରେ ଅତର୍କିତ ଚଢ଼ାଉ କରିଥିଲେ। ଚଢ଼ାଉରେ ମାଜିଷ୍ଟ୍ରେଟ୍ ପ୍ରଶାନ୍ତ କୁମାର ସିଂହ, ପୁରୁଣାକୋଟ ଥାନା ଅଧିକାରୀ ବିକ୍ରମ ବିହାରୀ ଜୟପୁରିଆ, ଏଏସ୍ଆଇ ଶରତ ଚନ୍ଦ୍ର ସାମଲ, ବନ୍ତଳା ରାଜସ୍ବ ଅଧିକାରୀ ସୋନାଲିକା ସାହୁ ଓ ୨୦ ଜଣ ଜିଲା ଭଲ୍ୟୁଣ୍ଟାରି ଫୋର୍ସ ମୁତୟନ ହୋଇଥିଲେ। ଉଭୟ ଗଁା ଠାରୁ ପାହାଡ଼ ଓ ନାଳ ନିକଟରେ ବଡ଼ ବଡ଼ ମୂଲ୍ୟବାନ ଶାଳ, ଶାଗୁଆନ ଆଦି ଗଛ କଟାଯାଇ ଏହି ଗଞ୍ଜେଇ ଚାଷ କରାଯାଇଛି। ଏଥିରେ ୩ ଏକର ୩ ଡିସିମିଲି ଜାଗାରୁ ୩ ହଜାର ଗଞ୍ଜେଇ ଗଛ ନଷ୍ଟ କରାଯାଇଛି। ଯାହାର ଆନୁମାନିକ ୫୦ ଲକ୍ଷ ଟଙ୍କାରୁ ଅଧିକ ହେବ ବୋଲି ପୋଲିସ ପକ୍ଷରୁ ସୂଚନା ମିଳିଛି। ପୂର୍ବରୁ ଅଭୟାରଣ୍ୟ ଭିତରେ ଥିବା ଅସନବାହାଳ, ସିଟି କୋଇଲ, କନ୍ଧ କୋଇଲି, ଟାକରିସିଂହା ଆଦି ଗ୍ରାମରେ ଗଞ୍ଜେଇ ଚାଷ କରାଯାଇଥିବାବେଳେ ଅବକାରୀ ବିଭାଗ ପକ୍ଷରୁ ଚଢ଼ାଉ ହୋଇଥିଲା।
