ଅନୁଗୋଳ ଅଫିସ, ୧୮।୫: ସ୍ମାର୍ଟଫୋନ ଥିଲେ ବି ଆସୁନି ନେଟଓ୍ବର୍କ। ଗାଁ ଡେଇଁ ପାଞ୍ଚ କୋଶ ଗଲେ ହୋଇପାରୁଛି ଯୋଗାଯୋଗ। ଦୈନିକ ଏପରି ଅସୁବିଧା ଭିତରେ କିପରି ସରକାରଙ୍କ ଶିକ୍ଷା ସଂଯୋଗ କାର୍ଯ୍ୟକ୍ରମ ମାଧ୍ୟମରେ ଅନ୍ଲାଇନରେ ପଢ଼ିପାରିବେ ପିଲା। ପଛେଇଥିବା ସିଲାବସ୍ ସରିବ କେମିତି। ଭିତ୍ତିଭୂମି ନ ପରଖି ସରକାର କିପରି ଏଭଳି ଯୋଜନା କରୁଛନ୍ତି ବୋଲି ଅନୁଗୋଳ ଜିଲାର ଅନେକ ଅଭିଭାବକ ପ୍ରଶ୍ନ କରିଛନ୍ତି।
ସେମାନଙ୍କ କହିବା ଅନୁଯାୟୀ, କରୋନା ବିପତ୍ତି ସମୟରେ ଘରେ ପିଲାଙ୍କୁ ପାଠ ପଢ଼ାଇବାକୁ ଏମିତି ଯୋଜନା କରିଛି ରାଜ୍ୟ ଗଣଶିକ୍ଷା ବିଭାଗ। ଶିକ୍ଷା ସଂଯୋଗ କାର୍ଯ୍ୟକ୍ରମ ମାଧ୍ୟମରେ କେତେକ ଜିଲାରେ ଏଭଳି ଅନ୍ଲାଇନ୍ ପାଠପଢ଼ା ମଧ୍ୟ ଆରମ୍ଭ ହୋଇଗଲାଣି। ହେଲେ ଘୋର ଭିତ୍ତିଭୂମି ଅଭାବ ଥିବା ଅନୁଗୋଳ ଜିଲାରେ ଏହି ଯୋଜନା ସଫଳ ହେବା ନେଇ ସନ୍ଦେହ ସୃଷ୍ଟି ହୋଇଛି। କାରଣ ଅନୁଗୋଳ ବ୍ଲକ କୋଠଭୂଇଁ ପଞ୍ଚାୟତର ଦଣ୍ଡାବାହାଳ ଗଁାକୁ ଏ ପର୍ଯ୍ୟନ୍ତ ମୋବାଇଲ୍ ସେବା ପହଞ୍ଚିପାରି ନାହିଁ। କାହା ସହ କଥା ହେବାକୁ ହେଲେ ଗଁା ଠାରୁ ୫ କିଲୋମିଟର ଦୂରକୁ ଯିବାକୁ ପଡ଼ୁଛି। କେବଳ ଏହି ଗୋଟିଏ ଉଦାହରଣ ନୁହେଁ, ମାଣିକଯୋଡ଼ି, ଟିକରପଡ଼ା, ପୁରୁଣାକୋଟ, ଜଗନ୍ନାଥପୁର ଓ ବଲଙ୍ଗ ପଞ୍ଚାୟତର ଅନେକ ଗଁାରେ ମୋବାଇଲ୍ ନେଟ୍ୱର୍କ ଆଜି ବି ସାତସପନ। ସେହିପରି ପାଲଲହଡ଼ା, ଆଠମଲ୍ଲିକ ବ୍ଲକର ବହୁ ଗଁାରେ ମଧ୍ୟ ଏପରି ଅସୁବିଧା ରହିଛି। ତେଣୁ ମୋବାଇଲ ସେବା ଠାରୁ ଦୂରରେ ଥିବା ଏସବୁ ଗ୍ରାମାଞ୍ଚଳରେ ଇଣ୍ଟରନେଟ୍ ଆସିବ କେଉଁଠୁ। ଏହାଛଡ଼ା ସରକାରୀ ସ୍କୁଲରେ ପାଠ ପଢ଼ୁଥିବା ଅଧିକାଂଶ ଛାତ୍ରୀଛାତ୍ରଙ୍କ ପରିବାର ନିକଟରେ ସ୍ମାର୍ଟଫୋନ୍ ନାହିଁ। ଏଭଳି କ୍ଷେତ୍ରରେ ମୋବାଇଲ ମାଧ୍ୟମରେ ଅନ୍ଲାଇନ୍ରେ ପାଠପଢ଼ା ଯୋଜନା ଅସମ୍ଭବ ଭଳି ମନେ ହେଉଛି। ଜଣେ ଅଭିଭାବକ ବରଦା ପ୍ରସନ୍ନ ଦାସ କହିଛନ୍ତି, ଏହା ଧର୍ମକୁ ଆଖି ଠାର ଭଳି। ଏହାଦ୍ୱାରା ସରକାରୀ ସ୍କୁଲ ନୁହେଁ କେବଳ ଇଂଲିଶ ମିଡିୟମରେ ପଢ଼ୁଥିବା ମମି, ଡାଡିଙ୍କ ପିଲାମାନେ ଉପକୃତ ହୋଇପାରିବେ। ଜିଲା ଶିକ୍ଷା ବିଭାଗର ଜଣେ ବରିଷ୍ଠ ଅଧିକାରୀ କହିଛନ୍ତି, ସାରା ରାଜ୍ୟରେ ଏପରି ସମସ୍ୟା ରହିଛି। ହ୍ବାଟ୍ସଆପ୍ରେ ପଢ଼ାଇବା ସମ୍ଭବ ହୋଇପାରୁ ନ ଥିବାରୁ ଟେଲିଭିଜନ ମାଧ୍ୟମରେ ପିଲାଙ୍କୁ ପଢ଼ାଯାଉଛି। ଏହା କିଛି ମାତ୍ରାରେ ପିଲାଙ୍କ ପାଇଁ କାମରେ ଆସିବ। ତେବେ ଜିଲାରେ ଅନ୍ଲାଇନ୍ରେ ପାଠପଢ଼ା ନେଇ କୌଣସି ଚୂଡ଼ାନ୍ତ ନିଷ୍ପତ୍ତି ହୋଇନି। କେବଳ ଅନ୍ଲାଇନ୍ ଶିକ୍ଷାଦାନ ନେଇ ରାଜ୍ୟ ଶିକ୍ଷା ବିଭାଗ ପାଖରୁ ଯାହା ମେସେଜ୍ ଆସିଛି ବୋଲି ଅଧିକାରୀ ଜଣଙ୍କ ସୂଚନା ଦେଇଛନ୍ତି।
