ଆସିକା, ୧ା୩ (ଡି.ଏନ୍.ଏ) – ଜାଲ୍ ସାର୍ଟିଫିକେଟ ଦେଇ ବିଭିନ୍ନ ବିଦ୍ୟାଳୟରେ କାର୍ଯ୍ୟରତ ଶିକ୍ଷକଙ୍କୁ ଧରପଗଡ ଲାଗି ପ୍ରଶାସନ ପକ୍ଷରୁ ଉଦ୍ୟମ ଜାରି ରହିଥିଲା। ଆସିକା ଥାନା ଇଲାକାରେ ଏହି ଶିକ୍ଷକଙ୍କ ତଲାସିବେଳେ ଗୋଟିଏ ଜାଲ୍ ସାର୍ଟିଫିକେଟ ଯୋଗାଣକାରୀ ର଼୍ୟାକେଟର ପର୍ଦ୍ଦାଫାଶ୍ ହୋଇଛି। ଏହି ମାମଲାରେ ପୋଲିସ ୨ ଜଣ ଜାଲ ସାର୍ଟିଫିକେଟଧାରୀ ଶିକ୍ଷକଙ୍କ ସହିତ ଅନ୍ୟ ୩ଜଣଙ୍କୁ ଶନିବାର କୋର୍ଟଚାଲାଣ କରିଛି। ଗିରଫମାନେ ହେଲେ ଆସିକା ଥାନା ହୁମୁକି ଗ୍ରାମର ଶିକ୍ଷକ ଗୌରୀ ଶଙ୍କର ଜେନା, ପ୍ରକାଶ ଚନ୍ଦ୍ର ପୋଲାଇ ଏବଂ କୋଦଳା ପଣ୍ଡା ସାହିର ରଞ୍ଜିତ କୁମାର ପାଲଟା, କୋଦଳା ପରିବା ମାର୍କେଟର କେ. ଧୀରେନ କୁମାର ଦୋରା ଓ ପୋଲସରା କଲେଜ ଛକର ଦୁର୍ଗାପ୍ରସାଦ ମିଶ୍ର। ସେମାନଙ୍କ ନିକଟରୁ ପୋଲିସ ୨୨ ହଜାର ଟଙ୍କା, କମ୍ପ୍ୟୁଟର ଓ ହାର୍ଡଡିସ୍କ, ୫ ଶହରୁ ଊର୍ଦ୍ଧ୍ୱ ରବର ଷ୍ଟାମ୍ପ, ୫୦ରୁ ଊର୍ଦ୍ଧ୍ୱ ବିଭିନ୍ନ ଶିକ୍ଷାନୁଷ୍ଠାନ ଓ ବିଶ୍ୱବିଦ୍ୟାଳୟର ଜାଲ୍ ସାର୍ଟିଫିକେଟ ଜବତ କରିଛି ।
ଅଭିଯୁକ୍ତମାନେ ଏହି ଜାଲ୍ ସାର୍ଟିଫିକେଟ କାରବାର ଗଞ୍ଜାମ, ନୟାଗଡ଼, ରାୟଗଡ଼ା ଜିଲା ସାଙ୍ଗକୁ ଆନ୍ଧ୍ରପ୍ରଦେଶର ଶ୍ରୀକାକୁଲମ ଜିଲାରେ ମଧ୍ୟ ଚଳାଇଥିବା ପୋଲିସ ତଦନ୍ତରୁ ଜଣାପଡିଛି। ଅଭିଯୁକ୍ତମାନେ ଗୋଟିଏ ସାର୍ଟିଫିକେଟ ଲାଗି ୧୦ ହଜାରରୁ ୫୦ ହଜାର ଟଙ୍କା ଲେଖାଏ ଆଦାୟ କରୁଥିବା ଆସିକା ଥାନାରେ ଶନିବାର ଅପରାହ୍ନରେ ଅନୁଷ୍ଠିତ ଏକ ଖବରଦାତା ସମ୍ମିଳନୀରେ ଅବସ୍ଥାପିତ ଟ୍ରେନିଂ ଆଇପିଏସ୍ ଅଧିକାରୀ ଅଭିଳାଷ ଜି ଓ ଥାନାଧିକାରୀ ପ୍ରଶାନ୍ତ କୁମାର ସାହୁ ସୂଚନା ଦେଇଛନ୍ତି।
ପ୍ରକାଶ ଯେ, ଅଭିଯୁକ୍ତ ଶିକ୍ଷକ ଦୁଇଜଣ ୨୦୦୬ରୁ ଏହି ସାର୍ଟିଫିକେଟ ହାସଲ କରି ଚାକିରି କରୁଥିବା ବେଳେ କୋଦଳାଠାରେ ଏକ କମ୍ପ୍ୟୁଟର କେନ୍ଦ୍ରର ମାଲିକ ଧୀରେନ ଏହି ଜାଲ୍ ସାର୍ଟିଫିକେଟ ପ୍ରସ୍ତୁତ କରୁଥିଲେ। ସେହିଭଳି କୋଦଳାର ରଞ୍ଜିତ ନିଜ ପାଖରେ ବିଭିନ୍ନ ଅଧିକାରୀଙ୍କ ରବର ଷ୍ଟାମ୍ପ ରଖି ଏହାକୁ ସାର୍ଟିଫିକେଟରେ ଲଗାଉଥିବା ଜଣାପଡିଥିଲା। ଦୁର୍ଗାପ୍ରସାଦ ଜିଲା ତଥା ଜିଲା ବାହାରେ ଏହି ସାର୍ଟିଫିକେଟ କାରବାର ଚଳାଇ ଆସୁଥିଲେ ବୋଲି ପୋଲିସ ତଦନ୍ତରୁ ଜଣାପଡିଛି। ଜବତ ହାର୍ଡଡିସ୍କକୁ ପରୀକ୍ଷା ଲାଗି ଫୋରେନ୍ସିକ୍ ଲାବୋରେଟୋରିକୁ ପଠାଯାଇଥିବା ଥାନାଧିକାରୀ କହିଛନ୍ତି। ସୂଚନା ଯୋଗ୍ୟ, ଆସିକା ଗୋଷ୍ଠୀ ଶିକ୍ଷାଧିକାରୀ କୃତିବାସ ବାରିକଙ୍କ ପକ୍ଷରୁ ଜାଲ୍ ସାର୍ଟିଫିକେଟଧାରୀ ଶିକ୍ଷକଙ୍କ ବିରୋଧରେ ଗତ ଜାନୁୟାରୀ ୧୪ ତାରିଖରେ ଥାନାରେ ଏତଲା ଦିଆଯାଇଥିଲା। ଏ ନେଇ ନଂ. ୨୧/୨୦ରେ ଏକ ମାମଲା ରୁଜୁ କରି ପୋଲିସ ତଦନ୍ତ ଚାଳାଇଥିଲା।
