କେସିଙ୍ଗା, ୧୮।୧୨ (ଡି.ଏନ୍.ଏ.)-କଳାହାଣ୍ଡି ଜିଲା କେସିଙ୍ଗା ବ୍ଲକ ଉତ୍କେଲା ପଁଚେତ୍ କନ୍ଧେଇମାଲ ଗଁାରେ ଦୁଇ ବଛର ଭିତରେ କିଡ୍ନୀ ରୋଗ୍ରେ ୯ ଝନ୍ ମରିଥିଲାବେଲେ ୧୫ରୁ ଅଧ୍କା ଆକ୍ରଁାତ ହେଇଛନ୍। ହେଲେ ଚିକିଛା ସୁବିଧା ଆର ପରତିକାର ବେବସ୍ତା ଅଭାବୁ ଦିନୁଦିନ୍କେ ଗଁାରେ ରୁଗୀକର ସଂଖ୍ୟା ବଢ଼ତେଲ ଯାଉଥିବାର ଗଁାବାସୀ ଅଭିଯୋଗ କରିଛନ୍।
ସୂଚନା ଅନ୍ସାରେ କନ୍ଧେଇମାଲ ଗଁାରେ ପାଖାପାଖି ୭ଶହରୁ ଅଧ୍କା ଲୋକ୍ ବାସ୍ କରୁଛନ୍। ଗଁାବାସୀକର ପିଇଲା ପାଏନ୍ ସୁବିଧା ଲାଗି ଗଁାରେ ୫ଟା ନଲ୍ଚୁଅଁା ରହିଛେ। ହେଲେ ସବୁ ନଲ୍ଚୁଅଁାରୁ ଲାଲ ଆର ହଲଦିଆ ପାଏନ୍ ବାହାରୁଛେ। ଇଆଡ଼େ ନଲ୍ଚୁଅଁାର ପାଏନ୍କେ ଛାଡ଼ିଦେଲେ ଗଁାରେ ପିଇଲା ପାଏନ୍ର ଅଲଗା କିଛି ସୁବିଧା ନଁାଇଁନ। ଏନ୍ତାଥି ଗଁାବାସୀ ଇ ଦୂଷିତ ପାଏନ୍ ପିଇ କିଡ୍ନୀ ରୋଗ୍ରେ ମରୁଥିବାର ଗଁାବାସୀ ଅଭିଯୋଗ କରିଛନ୍। ଗଲା ୨ ବଛ ଭିତରେ କିଡ୍ନୀ ରୋଗ୍ରେ ଗଁାର ଗୋମତୀ ଜାନୀ, ଭୁଜ ମାଝି, ଅଜିତ ଜାନୀ, ତ୍ରିନାଥ ଜାଲ, ପୂର୍ଣ୍ଣ ଜାଲ, ଲମ୍ବୋଦର ଜାଲ, ମୂରଲୀ ଜାଲ, ଭାର୍ଗବୀ ଜାନୀ, ଦାମୋଦର ଜାନୀ ପରମୁଖ ୯ ଝନ୍କର ମୁର୍ତୁ ହେଇଥିଲାବେଲେ ପଦ୍ମଲୋଚନ ପ୍ରଧାନ (୭୫), ଗୋବର୍ଦ୍ଧନ ଜାନୀ (୭୭), ଚନ୍ଦ୍ରା ଜାନୀ (୩୨), ମଞ୍ଜୁରୀ ପ୍ରଧାନ (୫୦), ଜମୁନା ମାଝୀ (୫୧) ପରମୁଖ ୧୫ରୁ ଅଧ୍କା ଲୋକ୍ ରୋଗ୍ରେ ଆକ୍ରଁାତ ହେଇ ବଡ଼ା ଗୁଲ୍ଗୁଲାରେ ଜୀବନ୍ ବିତଉଛନ୍। ସେନ୍ତା ପାସର ଚାଞ୍ଚେର ପଁଚେତ୍ର କନ୍ଦାଖାଲ ଗଁାର ବି ଅନେକ୍ ଲୋକ୍ କିଡ୍ନୀ ରୋଗ୍ରେ ଆକ୍ରଁାତ ହେଇ ଚିକିଛିତ ହେଉଥିବାର ଜନାପଡ଼ିଛେ। ଗଁାବାସୀ ଜିଲା ପରଶାସନକେ ପିଇଲା ପାଏନ୍ ଆର ଚିକିଛା ସୁବିଧା ଯୁଗେଇ ଦେବାକେ ବାରବାର ଗୁହାରି କରି ନିରାଶ ହେଇଥିବାର ଅଭିଯୋଗ କରିଛନ୍। ସେନ୍ତା ପିଇଲା ପାଏନ୍ ଲାଗି ଗଁାବାସୀ ଉତ୍କେଲା ପଁଚେତ୍ ଆର ଆରଡବ୍ଲ୍ୟୁଏସ୍ଏସ୍ରେ ବି ଲିଖିତ ଅଭିଯୋଗ କରି ନିରାଶ ହେଇଥିବାର କହିଛନ୍। ଇଆଡ଼େ କିଡ୍ନୀ ରୋଗ୍ରେ ଆକ୍ରଁାତ ରୁଗୀମାନେ ଜମିବାଡ଼ି, ସୁନାରୂପା ଗହନା କରି ରାଏଜ୍ ବାହାରକେ ଚିକିଛା ଲାଗି ଯାଇ ସରବ୍ସୁଅଁାତ ହେଉଛେନ୍। ହେଲେ ଜିଲା ପରଶାସନ ଆର ସ୍ବାସ୍ଥ୍ୟ ବିଭାଗ ଇତାର ପରତିକାର ବେବସ୍ତା ସଂଗେ ରୁଗୀକୁ ଚିକିଛା ସୁବିଧା ଯୁଗେଇ ଦେବାରେ ବିଫଲ ହେଇଛନ୍। ଇ ଘଟନାକେ ନେଇ ଗଁାବାସୀକର ଭିତରେ ଅସନ୍ତୋଷ ଦେଖାଦେଇଛେ। ଯେତେ ଜଲଦି ହେବା ସମସିଆର ସମାଧାନ କରାଯାଉ ନାଇଁହେଲେ ଆଏବାର ଦିନେ ଗଁାବାସୀ ରାସ୍ତାକେ ଉତିରମୁ ବଲି କନ୍ଧେଇମାଲବାସୀ ଗଣମାଧ୍ୟମ ଜରିଆରେ ଜିଲାପାଳ, ସିଡିଏମକୁଁ ଜନେଇଛନ୍। ଇ ବାବ୍ଦେ ଉତ୍କେଲା ସରପଁଚ୍ ସଂଯୁକ୍ତା ବାଗକୁଁ ପଚ୍ରାଲାରୁ ମୁଇଁ ବିଡିଓକଁର ସଂଗେ ଆଲୋଚନା କରି ବେବସ୍ତା କରମି ବଲି ସେ କହିଥିଲେ। ସେନ୍ତା କଳାହାଣ୍ଡି ଜିଲା ମୁଖିଆ ଚିକିଛା ଅଧ୍କାରୀ ବନଲତା ଦେବୀକୁଁ ପଚ୍ରାଲାରୁ ଘଟନା ବାବ୍ଦେ ମୋତେ କେହି ଲିଖିତ ଅଭିଯୋଗ ନାଇଁ କରି। ହେଲେ ମୁଇଁ ଘଟନାର ତଦଁତ୍ କରି ପଦକ୍ଷେପ ନେମି ବଲି ସେ କହିଥିଲେ।
