ରଣପୁର,୨୧।୩(ଡି.ଏନ୍.ଏ.): କରୋନା ଭୂତାଣୁ (କୋଭିଡ୍-୧୯)ର କରାଳ ସଂକ୍ରମଣ ସମଗ୍ର ବିଶ୍ୱକୁ ଗ୍ରାସ କରିଚାଲିଛି। ଏ ନେଇ ରାଜ୍ୟରେ ଶପିଂମଲଠାରୁ ଆରମ୍ଭ କରି ସିନେମା ହଲ, ପାର୍କ, ସଭା ସମିତି, ସାମାଜିକ ମିଳାମିଶା ଆଦିକୁ ବନ୍ଦ କରାଯାଇଛି। କେତେକ ସ୍ଥାନରେ ପ୍ରଶାସନ ତରଫରୁ ୧୪୪ ଧାରା ମଧ୍ୟ ଜାରି କରାଯାଇଛି। ମାତ୍ର ଏହି କଟକଣା ସତ୍ତ୍ୱେ ନୟାଗଡ଼ ଜିଲା ଚାନ୍ଦପୁର ଥାନା ଅଞ୍ଚଳରେ ଦଶଦୋଳ ମେଳଣ ଦେଖିବାକୁ ମିଳିଛି l
ପ୍ରକାଶ ଯେ, ଗୁରୁବାର ଦଶଦୋଳ ମେଳଣ ପାଇଁ ଦୋଳ କମିଟି ତରଫରୁ ବହୁ ଆଡ଼ମ୍ବରରେ ପ୍ରସ୍ତୁତି କରାଯାଇଥିଲା। ହେଲେ ଜିଲା ପ୍ରଶାସନ ତରଫରୁ ସେଠାରେ ୧୪୪ ଧାରା ଜାରି କରାଗଲା। ଏହି ଯାତ୍ରା ଦଶ ଦିନ ହେବାକୁ ଥିଲା ବେଳେ ଶୁକ୍ରବାର ରାତିରେ କମିଟି ତରଫରୁ ସମସ୍ତ ଠାକୁରଙ୍କ ଦୋଳ ବିମାନକୁ ମେଳଣ ପଡିଆରେ ଏକଜୁଟ କରାଇ ଆତସବାଜି ସହିତ ଘଣ୍ଟ ବଜା ଯାଇଥିଲା। ଏହାକୁ ଦେଖିବା ପାଇଁ ଆଖପାଖ ଅଞ୍ଚଳରୁ ୪ରୁ ୫ ହଜାର ଲୋକଙ୍କ ଜନସମାଗମ ହୋଇଥିଲା। ୧୪୪ ଧାରା ଜାରି ସତ୍ତ୍ୱେ କିଭଳି ଏହି ମେଳଣ ଆୟୋଜନ କରାଗଲା, ତାହା ସାଧାରଣରେ ଆଲୋଚନାର ବିଷୟ ପାଲଟିଛି। ଏ ସମ୍ପକର୍ର୍ରେ ରଣପୁର ତହସିଲଦାର ଚାନ୍ଦପୁର ଆର୍ଆଇ ଅନିଲ ବେହେରାଙ୍କ ସହ ଦଶଦୋଳ କମିଟିର ସଭାପତି ଅଭୟ ସାହୁ, ମନୋଜ କୁମାର ଦାଶ, କିଶୋର ମହାରଣା, ଜମ୍ବେଶ୍ୱର ଖମାରିଙ୍କ ସମେତ ୨୨ଜଣଙ୍କ ନାମରେ ଚାନ୍ଦପୁର ଥାନାରେ ଏକ ମାମଲା ନଂ. ୨୭/୨୦ ରୁଜୁ କରାଯାଇଛି l
