ହାତୀ ପାଇଁ ତେଜୁଛି ଅସନ୍ତୋଷ
7:25 amJanuary 17, 2020 / 21

କୁଆମରା ,୧୭ା୧(ଡି.ଏନ୍‌.ଏ.)- ହାତୀ ପାଇଁ ୧୫ ଦିନ ହେଲା ରାତି ସାରା ବିଦ୍ୟୁତ୍‌କାଟ କରାଯାଉଥିବାରୁ ଅସନ୍ତୋଷ ପ୍ରକାଶ ପାଇଛି। ଏନେଇ ପ୍ରଶାସନ ପଦକ୍ଷେପ ଗ୍ରହଣ ନ କଲେ ରାଜରାସ୍ତାକୁ ଓହ୍ଲାଇବେ ବୋଲି ଲୋକେ ଚେତାବନୀ ଦେଇଛନ୍ତି। ଗତ ୨ତାରିଖରୁ ଗୋଠଛଡା ଦନ୍ତାଟି ପ୍ରଥମେ ବଡସାହି ବ୍ଲକ ପଟିସାରୀ ପଞ୍ଚାୟତର ନୂଆସାହି, ବାଲି ଚିଲିମା ଓ କାହ୍ନୁପୁରା ଜଙ୍ଗଲରେ ୬ ଦିନ ରହିଥିଲା। ଗ୍ରାମ ଲୋକଙ୍କ ସହାୟତାରେ ବନବିଭାଗ ହାତୀଟିକୁ ଘଉଡାଇ ଦେଇଥିଲା। ହାତୀଟି ପୁଣି ବଡସାହି ସ୍ଥିତ ସୁହାଗପୁରା ସଂରକ୍ଷିତ ଜଙ୍ଗଲରେ ରହିବା ସହ ରାତିରେ ବିଚରଣ କରୁଛି। ହାତୀକୁ ସୁରକ୍ଷା ଦେବାକୁ ଯାଇ ୨ ତାରିଖଠାରୁ ପ୍ରତ୍ୟହ ସା ୭ଟାରୁ ସକାଳ ୭ଟା ପର୍ଯ୍ୟନ୍ତ ୧୨ ଘଣ୍ଟା ଧରି ବିଦ୍ୟୁତ୍‌ କାଟ କରାଯାଉଛି। ଏନେଇ ଲୋକେ ଅତିଷ୍ଠ ହୋଇପଡିଲେଣି। ବିଦ୍ୟୁତ୍‌ କାଟ ଯୋଗୁ ଛାତ୍ରୀଛାତ୍ରମାନଙ୍କର ପାଠପଢାରେ ନାନା ଅସୁବିଧା ସୃଷ୍ଟିହେବା ସହ ଡାକ୍ତରଖାନାରେ ରୋଗୀ ସେବା ମଧ୍ୟ ବ୍ୟାହତ ହେଉଛି। ଏହି ସୁଯୋଗରେ ଅଞ୍ଚଳରେ ଚୋରି ଘଟଣା ବୃଦ୍ଧି ପାଇବାରେ ଲାଗିଛି। ତେବେ ବନ ବିଭାଗ କର୍ମଚାରୀମାନେ ହାତୀ ଘଉଡାଇବା ପାଇଁ ଦୀର୍ଘ ଦିନ ଧରି କୌଣସି ପଦକ୍ଷେପ ନେଉ ନ ଥିବାରୁ ବାଧ୍ୟ ହୋଇ ବିଦ୍ୟୁତ୍‌କାଟ କରାଯାଉଥିବା ବିଦ୍ୟୁତ୍‌ ବିଭାଗର ଜଣେ ଅଧିକାରୀ କହିଛନ୍ତି। ତେବେ ଏ ଦିଗରେ କୌଣସି ପଦକ୍ଷେପ ନ ନେଲେ ପୁରୁଣା ବାରିପଦା ଷ୍ଟ୍ରକଚର ଅଧୀନରେ ଥିବା ପୁରୁଣାବାରିପଦା, କୁଆମରା, ଆରପଟା, ସାଇଁକୁଳା, ବରଡିହି ପ୍ରଭୃତି ପଞ୍ଚାୟତର ଜନ ସାଧାରଣ ରାଜରାସ୍ତାକୁ ଓହ୍ଲାଇବେ ବୋଲି ଚେତାବନୀ ଦେଇଛନ୍ତି।