ନୂଆଦିଲ୍ଲୀ, ୩।୫ (ଆଇଏଏନ୍ଏସ୍): ସୋସିଆଲ ମିଡିଆର ଗତି ସବୁଠାରୁ ଆଗରେ ଥିବାରୁ ଏହାର ଆଦର କାହିଁରେ କ’ଣ ରହିଛି। କିନ୍ତୁ ବ୍ୟବହାରକାରୀଙ୍କ ବ୍ୟକ୍ତିଗତ ତଥ୍ୟ ଚୋରି ହେଉଥିବାର ଅନେକ ଅଭିଯୋଗ ଆସିଥାଏ। ସୋସିଆଲ ମିଡିଆର ବିଭିନ୍ନ ଆପ୍ରେ ବ୍ୟବହାରକାରୀ ଦେଉଥିବା ବ୍ୟକ୍ତିଗତ ତଥ୍ୟକୁ କାରସାଦି କରାଯାଇ କମ୍ପାନୀ କିମ୍ବା ବିଦେଶକୁ ପ୍ରେରଣ କରାଯାଉଥିବା ବିଷୟ ଅତୀତରେ ବହୁବାର ଆଲୋଚନା ପରିସରକୁ ଆସିଛି। ତେଣୁ ଇଣ୍ଟରନେଟ୍ ଉପଭୋକ୍ତାମାନେ ବ୍ୟକ୍ତିଗତ ତଥ୍ୟକୁ କିଭଳି ଅଧିକ ସୁରକ୍ଷିତ ରଖିପାରିବେ, ସେଥିସକାଶେ ପ୍ରୟାସ କରୁଛନ୍ତି। ସାଇବର ସିକ୍ୟୁରିଟି ଫାର୍ମ ‘କାସପର୍ସସ୍କାଏ’ ପକ୍ଷରୁ କରାଯାଇଥିବା ଏକ ଅନୁଧ୍ୟାନରୁ ଜଣାପଡ଼ିଛି ଯେ, ୮୨ ପ୍ରତିଶତ ବ୍ୟବହାରକାରୀ ଓ୍ବେବ୍ସାଇଟ୍ କିମ୍ବା ସୋସିଆଲ ମିଡିଆ ଚ୍ୟାନେଲରେ ଥିବା ସେମାନଙ୍କ ବ୍ୟକ୍ତିଗତ ତଥ୍ୟ ହଟାଇ ଦେବାକୁ ପ୍ରୟାସ କରୁଛନ୍ତି। ଅର୍ଥାତ୍ ୫ ଜଣରୁ ୪ ଜଣ ନିଜ ସୁରକ୍ଷା ନେଇ ଆଶଙ୍କାରେ ଥିବାରୁ ଏଭଳି ପଦକ୍ଷେପ ନେଉଥିବା ସଦ୍ୟ ପ୍ରକାଶିତ ରିପୋର୍ଟରୁ ଜଣାପଡ଼ିଛି।
୨୩ ଦେଶରେ କରାଯାଇଥିବା ସର୍ଭେ ଅନୁଯାୟୀ ଇଣ୍ଟରନେଟ୍ ବ୍ୟବହାରକାରୀମାନେ କେବଳ ଯେ ନିଜର ବ୍ୟକ୍ତିଗତ ତଥ୍ୟ ନେଇ ଚିନ୍ତିତ ଅଛନ୍ତି ତାହା ନୁହେଁ, ସେମାନଙ୍କ ସମ୍ପର୍କୀୟମାନେ ମଧ୍ୟ ଏଭଳି ତଥ୍ୟ ହଡ଼ପର ଶିକାର ହେଉଛନ୍ତି। ୨୪ ପ୍ରତିଶତ ଇଣ୍ଟରନେଟ୍ ବ୍ୟବହାରକାରୀ ଦାବି କରିଛନ୍ତି, ସେମାନଙ୍କ ବ୍ୟକ୍ତିଗତ ଡାଟା ଓ ପରିବାର ତଥ୍ୟ ସେମାନଙ୍କ ବିନା ସମ୍ମତିରେ ସାଧାରଣରେ ଉପଲବ୍ଧ ହେଉଛି। ତେଣୁ ବ୍ୟକ୍ତିଗତ ତଥ୍ୟ କିଭଳି ଅନ୍ଲାଇନ୍ରେ ସୁରକ୍ଷିତ ରଖାଯାଇପାରିବ ସେ ନେଇ ସୁନିଶ୍ଚିତ କରିବା ବଡ଼ ଚ୍ୟାଲେଞ୍ଜ ସୃଷ୍ଟି କରିଛି ବୋଲି କାସପର୍ସସ୍କାଏର କଞ୍ଜୁମର ପ୍ରଡକ୍ଟ ମାର୍କେଟିଂ ମୁଖ୍ୟ ମାରିନା ଟିଟୋଭା କହିଛନ୍ତି। ସେଥିପାଇଁ ୪୩ ପ୍ରତିଶତ ବ୍ୟବହାରକାରୀ ନିଜର ବ୍ୟକ୍ତିଗତ ତଥ୍ୟ ଲୁଚାଇ ରଖିବା ନିମନ୍ତେ ଇଣ୍ଟରନେଟ୍ ବ୍ରାଉଜିଂ ବେଳେ ଅତ୍ୟନ୍ତ ସତର୍କତା ଅବଲମ୍ବନ କଲେଣି। କେତେକ ଉପଭୋକ୍ତା ନିଜ ଉପକରଣ (ଡିଭାଇସ୍)ରେ ବ୍ୟକ୍ତିଗତ ତଥ୍ୟ ରଖିବାକୁ ମଧ୍ୟ ଡରିଗଲେଣି। ୨୧ ପ୍ରତିଶତ ବ୍ୟବହାରକାରୀ ସେମାନଙ୍କ ବ୍ୟକ୍ତିଗତ ତଥ୍ୟ ସଂଗ୍ରହ କରାଯାଉଥିବାରୁ ଚିନ୍ତିତ ହୋଇପଡ଼ିଛନ୍ତି।
କାସପର୍ସସ୍କାଏ ପକ୍ଷରୁ ପରାମର୍ଶ ଦିଆଯାଇଛି, ଇଣ୍ଟରନେଟ୍ ବ୍ୟବହାରକାରୀ ନିଜ ତଥ୍ୟକୁ ସୁରକ୍ଷିତ ରଖିବା ଲାଗି ସେମାନେ ସେମାନଙ୍କ ଅନଲାଇନ୍ ଆକାଉଣ୍ଟର କେଉଁଥିରେ ବ୍ୟକ୍ତିଗତ ଡାଟା ରଖିବା ଠିକ୍ ହେବ ତାହାର ତାଲିକା ନିଜ ପାଖରେ ରଖିବା ଉଚିତ। ସେହି ସମୟରେ ଉପଭୋକ୍ତାମାନେ ‘ପ୍ରାଇଭେଟ୍ ଚେକର୍’ ବ୍ୟବହାର କରିବା ଦରକାର, ଯଦ୍ଦ୍ବାରା ସେମାନଙ୍କ ବ୍ୟକ୍ତିଗତ ତଥ୍ୟ ତୃତୀୟ ପକ୍ଷ ଜାଣିବା କଷ୍ଟକର ହୋଇପଡ଼ିବ ବୋଲି ଏହି ସାଇବର ସିକ୍ୟୁରିଟି ଫାର୍ମ ପକ୍ଷରୁ କୁହାଯାଇଛି।
