ଲକ୍ଷ୍ନୌ, ୪ା୮(ପି.ଟି.): ଉନ୍ନାଓ ପୀଡ଼ିତାଙ୍କ ଅବସ୍ଥା ଏବେ ସଙ୍କଟାପନ୍ନ ରହିଛି। ସେ ନିମୋନିଆରେ ଆକ୍ରାନ୍ତ ହୋଇଥିବାବେଳେ ଡ଼ାକ୍ତରୀ ଚିକିତ୍ସା ଜାରି ରହିଛି। ଜ୍ୱର ସହ ବ୍ଲଡ ସୁଗାର ବଢିଯାଇଛି। ଓ୍ବିଣ୍ଡ ପାଇପ୍ ସହାୟତାରେ ସେ ଅକ୍ସିଜେନ୍ ନେଉଛନ୍ତି। ତେବେ ତାଙ୍କ ସହ ଦୁର୍ଘଟଣାର ଶିକାର ହୋଇଥିବା ଓକିଲଙ୍କ ସ୍ବାସ୍ଥ୍ୟାବସ୍ଥାରେ ସୁଧାର ଆସିଥିବା ଜଣାପଡ଼ିଛି। ବିନା ଭେଣ୍ଟିଲେଟରରେ ସେ ନିଃଶ୍ୱାସ ପ୍ରଶ୍ୱାସ ନେଇପାରୁଥିବା କିଙ୍ଗ ଜର୍ଜସ ମେଡ଼ିକାଲ ୟୁନିଭର୍ସିଟି ଟ୍ରାଉମା ସେଣ୍ଟର ମୁଖ୍ୟ ସନ୍ଦୀପ ତିଓ୍ବାରୀ ପ୍ରକାଶ କରିଛନ୍ତି। ପ୍ରକାଶଥାଉ କି, ପୀଡ଼ିତାଙ୍କୁ ଦିଲ୍ଲୀର ଏମ୍ସକୁ ଚିକgିତ୍ସା ଲାଗି ନିଆଯିବ କି ନାହିଁ, ସୁପ୍ରିମକୋର୍ଟ ସୋମବାର ସେ ସମ୍ପର୍କରେ ନିର୍ଦ୍ଦେଶ ଦେବେ। ଅନ୍ୟ ପକ୍ଷରେ ଏହି ଘଟଣାରେ ସିବିଆଇ ଭାଜପା ବିଧାୟକ କୁଲଦୀପ ସିଂ ସେନଗରଙ୍କ ସମେତ ୧୦ ଜଣଙ୍କୁ ଗିରଫ କରିଥିବାବେଳେ ତଦନ୍ତ ଜାରି ରହିଛି। ସିବିଆଇ ପକ୍ଷରୁ ଜେଲ୍ରେ ସେନ୍ଗରଙ୍କୁ ଶନିବାର ଜେରା କରାଯାଇଛି। ସେପଟେ ସେନ୍ଗର ପାଇଥିବା ବନ୍ଧୁକ ଲାଇସେନ୍ସକୁ ଉନ୍ନାଓ ଜିଲା ମାଜିଷ୍ଟ୍ରେଟ୍ ରଦ୍ଦ କରିଛନ୍ତି। ଗୋଟିଏ ରାଇଫଲ, ଗୋଟିଏରିଭଲ୍ଭର ଓ ଗୋଟିଏ ସିଙ୍ଗିଲ ବ୍ୟାରେଲ ଗନ୍ ଲାଗି ତାଙ୍କୁ ଅନୁମତି ମିଳିଥିଲା। ବଳାତ୍କାର ମାମଲାରେ ସେନ୍ଗରଙ୍କୁ ଗତ ଏପ୍ରିଲ ୧୩ରେ ଗିରଫ କରାଯାଇଥିବାବେଳେ ଏବେ ସେ ସୀତାପୁର ଜିଲା କାରାଗାରରେ ଅଛନ୍ତି।
