ସମ୍ବଲପୁର,୨୩।୧୨(ବ୍ୟୁରୋ): ସମ୍ବଲପୁରରେ ଆଲା ହଜରତ ୱେଲ୍ଫେୟାର କମିଟି ପକ୍ଷରୁ ପ୍ରତିବର୍ଷ ସାମୂହିକ ନିକାହ (ଗଣ ବିବାହ) ଆୟୋଜିତ ହୋଇ ଆସୁଛି। ଏଥିରେ ମୁସଲମାନ ସମ୍ପ୍ରଦାୟର ଗରିବ ପୁଅ ଝିଅଙ୍କ ବିବାହ ଲାଗି କମିଟି ସମ୍ପୂର୍ଣ୍ଣ ସାହାଯ୍ୟ ସହଯୋଗ କରିଥାଏ। ଚଳିତ ବର୍ଷର ସାମୂହିକ ନିକାହ ରବିବାର ପୂର୍ବାହ୍ନ ସାଢେ ୧୧ଟାରେ ସୁନାପାଲି ରାଜନଗର ସାହାଜାନ ପଡିଆରେ ଆୟୋଜିତ ହୋଇଥିଲା। ହେଲେ ଏଥର ଏହି କାର୍ଯ୍ୟକ୍ରମରେ ଏକ ସ୍ବତନ୍ତ୍ରତା ଆଉ ବ୍ୟତିକ୍ରମ ଦେଖିବାକୁ ମିଳିଛି। ମୋଟ ୧୭ ଯୋଡିଙ୍କ ଗଣବିବାହ ବା ନିକାହ ସମ୍ପନ୍ନ ହୋଇଛି। ହେଲେ ଏଥିରେ ୪ ଯୋଡା ହିନ୍ଦୁ ବର-କନ୍ୟାଙ୍କୁ କମିଟି ବିବାହ କରାଇ ସମାଜରେ ଏକ ଆଦର୍ଶ ଉଦାହରଣ ସୃଷ୍ଟି କରିଛି। ସମ୍ବଲପୁର ସହରରେ ଏହା ଭାଇଚାରାର ବାର୍ତ୍ତା ଦେଇଛି। ସାମ୍ପ୍ରଦାୟିକ ସଦ୍ଭାବନାରେ ଆଉ ଏକ ନୂଆ ଅଧ୍ୟାୟ ମଧ୍ୟ ସୃଷ୍ଟି କରିଛି। ସମଗ୍ର ସହର ଓ ଜିଲାରେ ଏହା ଚର୍ଚ୍ଚାର ବିଷୟ ମଧ୍ୟ ପାଲଟିଛି। ନବ ଦମ୍ପତି ତଥା ବର-କନ୍ୟା ପରସ୍ପରକୁ ଫୁଲ ମାଳ ଦେଇ ଓ ମୁଦି ପିନ୍ଧାଇ ଜୀବନ ସାଥୀ କରିଛନ୍ତି। ତେବେ ଏହାକୁ ସ୍ବୀକୃତି ପାଇଁ ସବ୍ରେଜିଷ୍ଟ୍ରାର ଏସ.ଏନ. ହାତୀ ଉପସ୍ଥିତ ଥିଲେ। ନବ ବିବାହିତଙ୍କ ବିବାହ ପଞ୍ଜୀକରଣ ପାଇଁ ମଧ୍ୟ ପ୍ରକ୍ରିୟା ଆରମ୍ଭ ହୋଇଛି। ଏଥିପାଇଁ ଆବଶ୍ୟକ ଫର୍ମରେ ଆବଶ୍ୟକ କାଗଜପତ୍ର ସହ ବର-କନ୍ୟା ଆବେଦନ କରିଛନ୍ତି। ସମ୍ବଲପୁର ଡିଏଫଓ ଡ. ସଞ୍ଜୀତ କୁମାର, ପୂର୍ବତନ ବିଧାୟିକା ଡାକ୍ତର ରାସେଶ୍ୱରୀ ପାଣିଗ୍ରାହୀ ଅତିଥିଭାବେ ଯୋଗଦେଇ ନବ ଦମ୍ପତିଙ୍କୁ ଆଶୀର୍ବାଦ ଦେଇଥିଲେ। ଆବଶ୍ୟକ ଘରକରଣା ସାମଗ୍ରୀ ଦେଇ ଅପରାହ୍ନ ୪ଟାରେ କନ୍ୟା ବିଦା କରାଯାଇଥିଲା।
୧୩ ଯୋଡି ସଂଖ୍ୟାଲଘୁ ସମ୍ପ୍ରଦାୟର ଯୁବତୀ ଯୁବକ ଗରିବ ଶ୍ରେଣୀର। ଆର୍ଥତ୍କ ସ୍ଥିତି ସ୍ବଚ୍ଛଳ ନ ଥିବାରୁ ବିବାହ ହୋଇ ପାରୁ ନ ଥିଲା । ସେମାନେ ବୟସ ଓ ଅନ୍ୟ ପ୍ରମାଣ ପତ୍ର ଦେଇ ବିବାହ ଲାଗି ସହଯୋଗ କରିବାକୁ ଆଲା ହଜରତ କମିଟି ପାଖରେ ଅନୁରୋଧ କରିଥିଲେ। ଆବେଦନପତ୍ର ପାଇବା ପରେ ପ୍ରଶାସନ ପକ୍ଷରୁ ବୟସ ପ୍ରମାଣ ପତ୍ର ଯାଞ୍ଚ କରାଯାଇ ନିକାହ ଓ ବିବାହ ପାଇଁ ଅନୁମତି ମିଳିଥିଲା। ତେବେ ଏଥିରେ ବିବାହ କରିଥିବା ଝାଡୁଆପଡାର ଜଣେ ହିନ୍ଦୁ ଯୁବତୀଙ୍କ ପରିବାର ସୂଚନା ଦେଇ କହିଛନ୍ତି ଯେ, ତାଙ୍କ ବାପା ରୋଗରେ ପୀଡିତ। ମା’ପର ଘରେ କାମ କରି ପରିବାର ଚଳାଉଛନ୍ତି। ତେଣୁ ଝିଅର ବିବାହ କରିବାକୁ ସେମାନେ ସକ୍ଷମ ନୁହନ୍ତି। ଆଲା ହଜରତ କମିଟି ପକ୍ଷରୁ ଗଣବିବାହ ଲାଗି ସହଯୋଗ ମିଳୁଥିବା ଘର ମାଲିକଙ୍କଠାରୁ ସୂଚନା ପାଇଥିଲେ। ଏଣୁ କମିଟି ନିକଟରେ ଝିଅର ବିବାହ ଲାଗି ଆବେଦନ କରିଥିଲେ। ନିଜ ସମ୍ପ୍ରଦାୟର ନ ହୋଇ ମଧ୍ୟ ଏଭଳି ଏକ ପାରିବାରିକ, ମାଙ୍ଗଳିକ ଓ ସାମାଜିକ କାମରେ ସମ୍ପୂର୍ଣ୍ଣ ସାହାଯ୍ୟ ସହଯୋଗ କରିଥିବା ଆଲା ହଜରତ ୱେଲଫେୟାର କମିଟିକୁ ସେ ସାଧୁବାଦ ଜଣାଇଛନ୍ତି।
