ଲଣ୍ଡନ,୮।୬: ୨୦୧୧ରେ ଭାରତ ଓ ଇଂଲଣ୍ଡ ମଧ୍ୟରେ ଆୟୋଜିତ ଏକ ଟେଷ୍ଟ ସିରିଜରେ ଏକ ବିରଳ ଘଟଣା ଘଟିଥିଲା। ଏହି ସିରିଜରେ ମାଷ୍ଟର ବ୍ଲାଷ୍ଟର ସଚିନ ତେନ୍ଦୁଲକରଙ୍କୁ ଆଉଟ କରିଥିବାରୁ ମୋତେ ଓ ଅମ୍ପାୟର ରଡ୍ ଟକରଙ୍କୁ ମୃତ୍ୟୁର ଧମକ ଦିଆଯାଇଥିଲା ବୋଲି ଇଂଲଣ୍ଡ ଦ୍ରୁତ ବୋଲର ଟିମ୍ ବ୍ରେସ୍ନାନ କହିଛନ୍ତି।
ସେତେବେଳେ ସଚିନ ୯୯ତମ ଅନ୍ତର୍ଜାତୀୟ ଶତକ ହାସଲ କରି ସାରିଥିଲେ। ଓଭାଲରେ ଅନୁଷ୍ଠିତ ଚତୁର୍ଥ ଟେଷ୍ଟରେ ସେ ୧୦୦ତମ ଶତକ ହାସଲ ଆଡକୁ ଗତି କରୁଥିଲେ। ସଚିନ୍ ୯୧ ରନରେ ବ୍ୟାଟିଂ କରୁଥିବା ବେଳେ ବ୍ରେସ୍ନାନଙ୍କ ଏକ ବଲ ସଚିନଙ୍କ ପ୍ୟାଡ୍ରେ ବାଜିଥିଲା ଓ ଜବରଦସ୍ତ ଅପିଲ ହେବାରୁ ଟକର ଅଙ୍ଗୁଳି ଟେକି ସଚିନଙ୍କୁ ଆଉଟ ଘୋଷିତ କରିଥିଲେ। ବଲ୍ ଲେଗ୍ଷ୍ଟମ୍ପର ବାହାରକୁ ଯାଉଥିବାର ଲକ୍ଷ୍ୟ କରାଯାଇଥିଲା। ତେବେ ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ) ଡିଆର୍ଏସ୍କୁ ବିରୋଧ କରୁଥିବାରୁ ସଚିନ୍ ଏହାର ସହାୟତା ନେଇ ନ ଥିଲେ। ସେତେବେଳେ ଭାରତ ୦-୩ରେ ପଛରେ ପଡିଥିଲା। ସଚିନ ପ୍ରଥମ ୩ଟି ଟେଷ୍ଟରେ ମାତ୍ର ଗୋଟିଏ ଅର୍ଦ୍ଧଶତକ ହାସଲ କରି ଖରାପ୍ ଫର୍ମ ଦେଇ ଗତି କରୁଥିଲେ। ତେବେ ଚତୁର୍ଥ ଟେଷ୍ଟରେ ଶତକ ହାସଲ କରିଥିଲେ ସେ ୧୦୦ତମ ଅନ୍ତର୍ଜାତୀୟ ଶତକ ହାସଲ କରିବା ସହ ନୂଆ ମାଇଲଖୁଣ୍ଟ ସ୍ଥାପନ କରିଥାନ୍ତେ। ସଚିନ ଆଉଟ୍ ହେବା ପରେ ପ୍ରଶଂସକମାନେ ନିରାଶ ହୋଇଥିଲେ। ଫଳରେ ମୋତେ ଓ ଟକରଙ୍କୁ ମୃତ୍ୟୁର ଧମକ ଦିଆଯାଇଥିଲା ଓ ଆମପାଖକୁ ଏକାଧିକ ଚିଠି ଆସିଥିଲା। ବଲ ଲେଗ୍ ଷ୍ଟମ୍ପ ବାହାରକୁ ଯାଉଥିବା ବେଳେ ଆପଣ ସଚିନଙ୍କୁ ଆଉଟ୍ ଘୋଷିତ କଲେ କେମିତି ବୋଲି ଚିଠିରେ ଉଲ୍ଲେଖ କରାଯାଇଥିଲା। ଫଳରେ ଆମକୁ ପୋଲିସ୍ର ସହାୟତା ନେବାକୁ ହୋଇଥିଲା। ଅଷ୍ଟ୍ରେଲିଆରେ ତାଙ୍କ ଘର ପାଖରେ ପୋଲିସ୍ ନିୟୋଜିତ କରାଯାଇଥିଲା ବୋଲି ବ୍ରେସ୍ନାନ କହିଛନ୍ତି। ଏହାପରେ ସଚିନ ୨୦୧୨ ଏସିଆ କପ୍ରେ ବାଂଲାଦେଶ ବିପକ୍ଷରେ ଶତକ ହାସଲ କରି ୧୦୦ତମ ଅନ୍ତର୍ଜାତୀୟ ଦିନିକିଆ ଶତକ ହାସଲ କରି ରେକର୍ଡ ସୃଷ୍ଟି କରିଥିଲେ। ସଚିନ ଟେଷ୍ଟରେ ୧୫୯୨୧ ଓ ଦିନିକିଆରେ ୧୮୪୨୬ ରନ ସଂଗ୍ରହ କରିଥିଲେ।
