ରାଇସୁଆଁ, ୧।୧ (ଡି.ଏନ.ଏ.)-କଥାରେ ଅଛି ନିଷ୍ଠା ଏବଂ ଅକ୍ଳାନ୍ତ ପରିଶ୍ରମ ଆଗରେ ସବୁ ବାଧାବିଘ୍ନ ହାର ମାନିଥାଏ। ଏହି ଘଟଣାକୁ ସତ୍ୟରେ ପରିଣତ କରି ଦେଖାଇଛନ୍ତି କେନ୍ଦୁଝର ଜିଲା ସଦର ଅଞ୍ଚଳର କାଉଁରିକଳା ପଞ୍ଚାୟତର ବନେଇକଳା ଗ୍ରାମର ପ୍ରଧାନସାହିର ଲକ୍ଷ୍ମୀଧର ମୁଣ୍ଡା। ସେ ଅକ୍ଳାନ୍ତ ପରିଶ୍ରମ କରି ନିଜ ବୁଦ୍ଧି ବଳରେ ଗାଁରେ ଏକ କାଠ ନଳକୂପ ବସାଇଛନ୍ତି। ସେଥିରୁ ପାଣି ଆସୁଥିବାରୁ ଲୋକଙ୍କ କଷ୍ଟ ବହୁ ମାତ୍ରାରେ ଦୂର ହୋଇପାରିଛି।
ଲକ୍ଷ୍ମୀଧରଙ୍କର ୨ସନ୍ତାନ ଏବଂ ସ୍ତ୍ରୀଙ୍କୁ ନେଇ ତାଙ୍କ ପରିବାର। ଦିନମଜୁରି କରି ସେ ପରିବାରର ଗୁଜୁରାଣ ମେଣ୍ଟାଇ ଥାନ୍ତି। ତାଙ୍କ ସାହିରେ ନଳକୂପଟିଏ ନ ଥିବା ବେଳେ ଲୋକ ମାନେ ୧ କି.ମି. ଦୂରରୁ ପାନୀୟ ଜଳ ଆଣିଥାନ୍ତି। ଏହାକୁ ଦେଖିବା ପରେ ସାହିର ଲୋକଙ୍କ ପାଇଁ କିପରି ପାନୀୟଜଳ ଗ୍ରାମରେ ପହଞ୍ଚି ପାରିବ ତାହା ତାଙ୍କ ମୁଣ୍ଡକୁ ଘାରିଥିଲା। ଏଥିପାଇଁ ସେ ବହୁ ଚିନ୍ତା କରି କିଛି ଇଲେକ୍ଟ୍ରି ୱେରିଂ ପାଇପ ଏବଂ କିଛି କାଠ ଏବଂ କିଛି ଲୁହା ରଡର ବ୍ୟବହାର କରି ୧କି.ମି. ଦୂରରେ ଥିବା ଜଳ ଉତ୍ସରୁ ଗାଁକୁ ପାଣି ଆଣି ପାରିଛନ୍ତି। ପାଇପଗୁଡିକୁ ମାଟି ତଳେ ପୋତି ଗାଁ ମୁଣ୍ଡରେ ଏକ ୨ଇଞ୍ଚ ପାଇପକୁ ସଂଯୋଗ କରି ଏକ ଲୁହାରଡକୁ ୨ଖଣ୍ଡ କାଠ ସାହାଯ୍ୟରେ ନଳକୂପ ହ୍ୟାଣ୍ଡେଲ ପରି ଲଗାଇଛନ୍ତି। ନଳକୂପ ହ୍ୟାଣ୍ଡେଲକୁ ଉପର ତଳ କରିବା ପରି ଏହି କାଠ ହ୍ୟାଣ୍ଡେଲକୁ ଉପରତଳ କଲେ ଏଥିରୁ ପାଣି ବାହାରୁଛି। ପାଣିକୁ ପରିଷ୍କାର କରିବା ପାଇଁ ଏଥିରେ ଏକ ଫିଲଟର ଲଗାଇଛନ୍ତି। ଲକ୍ଷ୍ମୀଧର ଜଣେ ଗରିବ ଆଦିବାସୀ ହୋଇଥିଲେ ମଧ୍ୟ ବହୁ କଷ୍ଟରେ ଯୁକ୍ତ୨ ପର୍ଯ୍ୟନ୍ତ ପାଠ ପଢିଛନ୍ତି। ମାତ୍ର ଦାରିଦ୍ର୍ୟ କାରଣରୁ ଯୁକ୍ତ୨ ପରେ ପଢାରେ ତାଙ୍କର ଡୋରି ପଡିଥିଲା। ମାତ୍ର ତାଙ୍କ ମନରେ ସମାଜ ପାଇଁ କିଛି କରି ଦେଖାଇବାର ଆଗ୍ରହ ଯୋଗୁ ବହୁ କଷ୍ଟ ଏବଂ ଅକ୍ଳାନ୍ତ ପରିଶ୍ରମ ଏବଂ ବୁଦ୍ଧି ବଳରେ ୧ କି.ମି. ଦୂର ଏକ ଜଳଉତ୍ସରୁ ଗାଁକୁ ପାଣି ଆଣି ପାରିଛନ୍ତି। ଏହି କାଠ ନଳକୂଅ ଗ୍ରାମବାସୀଙ୍କ ଶୋଷ ମେଣ୍ଟାଇଛି। ଏହି ଘଟଣା ଯୋଗୁ ସ୍ଥାନୀୟ ଅଞ୍ଚଳରେ ଚର୍ଚ୍ଚାର ବିଷୟ ହୋଇଥିବା ବେଳେ ସ୍ଥାନୀୟ ସାହିର ବହୁ ଜନସାଧାରଣ କହିଛନ୍ତି କି ଆଗରୁ ବହୁ ଦୂରରୁ ପାଣି ବୋହି ଗାଁକୁ ଆଣୁଥିବା ବେଳେ ଲକ୍ଷ୍ମୀଧରଙ୍କ ଯୋଗୁ ହାତ ପାହାନ୍ତାରେ ପାନୀୟଜଳ ପାଇପାରୁଛୁ। ପ୍ରଶାସନ ତରଫରୁ ତାଙ୍କୁ ପ୍ରୋତ୍ସାହନ ମିଳିଲେ ସେ ଆହୁରି ଆଗକୁ ବଢ଼ିପାରନ୍ତେ ବୋଲି କହିଛନ୍ତି।
ଫଟୋ- ଲକ୍ଷ୍ମୀଧରଙ୍କ ଦେଶୀ ନଳକୂପ।
