ଭୁବନେଶ୍ୱର,୨।୩ (ବ୍ୟୁରୋ): ଚନ୍ଦ୍ରଶେଖରପୁର ଥାନା ଶୈଳଶ୍ରୀବିହାର ଅଞ୍ଚଳରେ ଭଡ଼ାଘରେ ରହୁଥିବା କଟକ ଜିଲା ବାଙ୍କୀ ଅଞ୍ଚଳର ରାଜେଶ ପ୍ରଧାନଙ୍କ ସନ୍ଦେହଜନକ ମୃତ୍ୟୁ ଘଟଣାରେ ନୂଆମୋଡ଼ ଆସିଛି। ରାଜେଶଙ୍କ ମୃତ୍ୟୁ ଘଟଣାରେ କେତେଜଣ ସାଙ୍ଗଙ୍କ ସମ୍ପୃକ୍ତି ଥିବା ଅଭିଯୋଗ ଆଣିଛନ୍ତି ପରିବାର ଲୋକ। ପୋଲିସ କେବଳ ମୃତଦେହ ବ୍ୟବଚ୍ଛେଦ ରିପୋର୍ଟକୁ ଅପେକ୍ଷା କରି ଦିନଗଡ଼ାଇ ଚାଲିଛି। ତେଣୁ ଘଟଣାର ଉଚିତ ତଦନ୍ତ କରାଯାଇ ନ୍ୟାୟ ଦେବା ପାଇଁ ରାଜେଶଙ୍କ ଭାଇ ସୁବ୍ରତ ଦାବି କରିଛନ୍ତି।
ସୂଚନା ମୁତାବକ,ଗତ ୨୨ ତାରିଖ (ମହାଶିବରାତ୍ରି) ରାତି ସାଢେ ୮ଟାରେ ରାଜେଶ ଘର ବାହାରେ ବାନ୍ତି କରୁଥିବାବେଳେ ଘର ମାଲିକ ତାଙ୍କୁ ଏକ ଘରୋଇ ହସ୍ପିଟାଲରେ ଭର୍ତ୍ତି କରିଥିଲେ। ମାତ୍ର ଡାକ୍ତର ସେଠାରେ ତାଙ୍କୁ ମୃତ ଘୋଷଣା କରିଥିଲେ। ଏ ନେଇ ପୋଲିସ ୧୩/୨୦ ନମ୍ବରରେ ଅପମୃତ୍ୟୁ ମାମଲା ରୁଜୁ କରି ତଦନ୍ତ କରୁଛି। ରାଜେଶଙ୍କ ରୁମ୍ରେ ଏକ ଅଧା ଚକୋଲେଟ, କିଛି ଅଧାଜଳା ସିଗାରେଟ, ମଦ ବୋତଲ ଓ ଗ୍ଲାସ ପଡ଼ିଥିବା ପୋଲିସ ତଦନ୍ତ ବେଳେ ଜାଣିବାକୁ ପାଇଥିଲା। ତେଣୁ ରାଜେଶଙ୍କୁ କେହି ପାନୀୟରେ କିଛି ମିଶାଇ ପିଇବାକୁ ଦେବା ପରେ ଫେରାର ହୋଇଯାଇଥିବା ନେଇ ସୁବ୍ରତ ସନ୍ଦେହ କରୁଛନ୍ତି। ରାଜେଶ ଓ ତାଙ୍କ ସହ ରହୁଥିବା ୨ ସାଙ୍ଗ ମିଶି ଏକ କେମିକାଲ ବ୍ୟବସାୟ କରୁଥିଲେ। ରାଜେଶ ଉକ୍ତ କେମିକାଲ ବେପାରରୁ ଭଲ ରୋଜଗାର କରୁଥିଲେ। ତେଣୁ ସେମାନଙ୍କୁ ତଦନ୍ତ ପରିସରଭୁକ୍ତ କରି ପଚରାଉଚରା କଲେ ସତ୍ୟତା ପଦାକୁ ଆସିବ ବୋଲି ସୁବ୍ରତ ଗଣମାଧ୍ୟମ ନିକଟରେ ଜଣାଇଛନ୍ତି। ତଦନ୍ତ ଅଧିକାରୀ ଦିଗ୍ବିଜୟିନୀ ବାଗ୍ କହିଛନ୍ତି, ପୂର୍ବରୁ ଜଣେ ସାଙ୍ଗଙ୍କୁ ତଦନ୍ତ ପରିସରଭୁକ୍ତ କରାଯାଇଥିବାବେଳେ ମୃତଦେହ ବ୍ୟବଚ୍ଛେଦ ରିପୋର୍ଟ ବା ଭିସାରା ରିପୋର୍ଟକୁ ଅପେକ୍ଷା କରାଯାଇଛି। ୨ ଦିନ ଭିତରେ ରିପୋର୍ଟ ଆସିଯିବା ପରେ ମୃତ୍ୟୁର କାରଣ ଜଣାପଡ଼ିବ। ଏହାପରେ ସନ୍ଦେହ ଘେରରେ ଥିବା ଅନ୍ୟ ସାଙ୍ଗମାନଙ୍କୁ ତଦନ୍ତ ପରିସରଭୁକ୍ତ କରାଯିବ ବୋଲି ସେ କହିଛନ୍ତି।
