ଜୁରିକ,୧୨।୬(ପି.ଟି.): ଜୁନ୍ରେ ପ୍ରକାଶିତ ଫିଫା ର଼୍ୟାଙ୍କିଙ୍ଗ୍ରେ ସେଭଳି କୌଣସି ବଡ଼ ଧରଣର ପରିବର୍ତ୍ତନ ହୋଇନାହିଁ। ଭାରତୀୟ ପୁରୁଷ ଫୁଟବଲ ଦଳ ପୂର୍ବ ପରି ୧୦୮ତମ ସ୍ଥାନରେ ଅପରିବର୍ତ୍ତିତ ରହିଛି। ୨୦୧୯ ନଭେମ୍ବରରେ ଭାରତ ଶେଷଥର ପାଇଁ ଫିଫା ଯୋଗ୍ୟତା ପର୍ଯ୍ୟାୟ ମ୍ୟାଚ୍ରେ ଓମାନକୁ ଭେଟିଥିଲା। ୧, ୧୮୭ ପଏଣ୍ଟ ପାଇଁ ଭାରତ ସ୍ଥିର ରହିଛି।
କୋଭିଡ-୧୯ ମହାମାରୀ କାରଣରୁ ଗତ ମାର୍ଚ୍ଚ ମାସଠାରୁ କୌଣସି ଅନ୍ତର୍ଜାତୀୟ ଫୁଟବଲ ମ୍ୟାଚ୍ କିମ୍ବା ଟୁର୍ନାମେଣ୍ଟ ଖେଳାଯାଇନାହିଁ। ତେଣୁ ର଼୍ୟାଙ୍କିଙ୍ଗ୍ରେ କୌଣସି ପରିବର୍ତ୍ତନ ହୋଇନାହିଁ ବୋଲି ବିଶ୍ୱ ଫୁଟବଲର ସର୍ବୋଚ୍ଚ ପ୍ରଶାସନିକ ସଂସ୍ଥା ଫିଫା ତରଫରୁ କୁହାଯାଇଛି। ୧,୭୬୫ ପଏଣ୍ଟ ସହ ବେଲଜିୟମ ପୂର୍ବପରି ଶୀର୍ଷ ସ୍ଥାନରେ ରହିଛି। ସେହିପରି ବିଶ୍ୱ ଚାମ୍ପିୟନ ଫ୍ରାନ୍ସ ୧,୭୩୩ ପଏଣ୍ଟ ସହ ଦ୍ୱିତୀୟ ଓ ଲାଟିନ୍ ଆମେରିକା ପାଓ୍ବାର ହାଉସ୍ ବ୍ରାଜିଲ ୧,୭୧୨ ପଏଣ୍ଟ ସହ ତୃତୀୟ ସ୍ଥାନରେ ରହିଛି। ଅନ୍ୟପଟେ ଇଂଲଣ୍ଡ ଓ ଉରୁଗୁଏ ଯଥାକ୍ରମେ ୧, ୬୬୧ ଓ ୧, ୬୪୫ ପଏଣ୍ଟ ସହ ଯଥାକ୍ରମେ ଚତୁର୍ଥ ଓ ପଞ୍ଚମ ସ୍ଥାନରେ ରହିଛି। ସେହିପରି କ୍ରୋଏସିଆ, ପର୍ତ୍ତୁଗାଲ, ସ୍ପେନ୍, ଆର୍ଜେଣ୍ଟିନା ଓ କଲମ୍ବିଆ ଯଥାକ୍ରମେ ଷଷ୍ଠ, ସପ୍ତମ, ଅଷ୍ଟମ, ନବମ ଓ ଦଶମ ସ୍ଥାନରେ ରହିଛି। ଟପ୍ ୧୦ ବହାରେ ଥିବା ୨୦୦ଟି ଦଳ ଏବେ ଫୁଟବଲ ପଡିଆକୁ ପ୍ରତ୍ୟାବର୍ତ୍ତନ ଲକ୍ଷ୍ୟରେ ରହିଛନ୍ତି।
ଭାରତ ଏବେ ଅକ୍ଟୋବରରେ ତା’ର ପରବର୍ତ୍ତୀ ୨୦୨୨ ଫିଫା ବିଶ୍ୱକପ୍ ଯୋଗ୍ୟତା ପର୍ଯ୍ୟାୟ ମ୍ୟାଚ୍ରେ ଏସିଆନ ଚାମ୍ପିୟନ କାତାରକୁ ଅକ୍ଟୋବର ୮ରେ ଭେଟିବ। ଏହାପରେ ଭାରତ ବାଂଲାଦେଶ ଓ ଆଫ୍ଗାନିସ୍ତାନକୁ ଯଥାକ୍ରମେ ନଭେମ୍ବର ୧୨ ଓ ୧୭ ତାରଖରେ ଭେଟିବ। ଉଲ୍ଲେଖଥାଉ କି, ଇରାନଠାରୁ ହାରିବା ପରେ ଭାରତ ବିଶ୍ୱକପ୍ ଯୋଗ୍ୟାତ ପର୍ଯ୍ୟାୟ ଦୌଡ଼ରୁ ବାଦ୍ ପଡିଛି। ଗ୍ରୁପ୍ ଇ’ରେ ଭାରତ ୫ଟି ମ୍ୟାଚ୍ ଖେଳି ମାତ୍ର ୩ ପଏଣ୍ଟ ହାସଲ କରି ଚତୁର୍ଥ ସ୍ଥାନରେ ରହିଛି। ଭାରତ ତଳକୁ ବାଂଲାଦେଶ ରହିଛି।
