ଯାଜପୁର ଅଫିସ,୨୮ା୩: ଯାଜପୁର ଜିଲାର ଅନ୍ୟତମ ସହର ବ୍ୟାସନଗର ଗ୍ରୀନ୍ ମାର୍କେଟସ୍ଥିତ ପରିବା ବଜାରରେ ଆବଶ୍ୟକ ସ୍ଥାନ ଅଭାବରୁ ଗ୍ରାହକଙ୍କ ମଧ୍ୟରେ ସାମାଜିକ ଦୂରତା ବଜାୟ ରହି ପାରୁ ନ ଥିଲା। ଫଳରେ ଏଠାରେ କରୋନା ସଂକ୍ରମଣର ଆଶଙ୍କା କରି ସହରର ଏକାଧିକ ବୁଦ୍ଧିଜୀବୀ ଏହି ପରିବା ମାର୍କେଟକୁ ନରସିଂହ ଚୌଧୁରୀ ହାଇସ୍କୁଲ ପଡ଼ିଆ କିମ୍ବା ଗୋଶାଳା ପଡିଆକୁ ସ୍ଥାନାନ୍ତର କରିବାକୁ ଦାବି କରିଥିଲେ। କିନ୍ତୁ ଜିଲା ପ୍ରଶାସନ ପରିବା ବଜାରକୁ ନହକା ଛକଠାରୁ ଚୋର୍ଦ୍ଦା ଛକ ପର୍ଯ୍ୟନ୍ତ ରାସ୍ତା କଡରେ ପରିବା ବିକିବାକୁ ନିଷ୍ପତ୍ତି ନେଇଛି। ଶୁକ୍ରବାର ଏହାକୁ କାର୍ଯ୍ୟକାରୀ ମଧ୍ୟ କରାଯାଇଛି। ସନ୍ଧ୍ୟାରେ ଜିଲାପାଳ ରଞ୍ଜନ କୁମାର ଦାଶଙ୍କ ନେତୃତ୍ୱରେ ଗ୍ରାହକଙ୍କ ମଧ୍ୟରେ ଦୂରତା ବଜାୟ ରଖିବା ନିମନ୍ତେ ବୃତ୍ତ ଚିହ୍ନ କରାଯାଇଛି। ପରିବା ବିକ୍ରୟ ସମୟରେ ସେହି ରାସ୍ତାରେ ଗାଡ଼ି ଚଳାଚଳ ବନ୍ଦ ରହିବ ବୋଲି କୁହାଯାଇଛି। ଅନ୍ୟପକ୍ଷରେ କରୋନା ସଂକ୍ରମଣ ଆଶଙ୍କା କରି ଯାଜପୁର ସହରର ଆରଏମସି ଓ ମୋଟରଙ୍ଗାପାଳ ହାଟକୁ ବାଳାଶ୍ରମ ପଡିଆକୁ ଉଠାଇ ନିଆଯାଇଛି। ବାଳାଶ୍ରମ ପଡିଆର ବିଶାଳ ସ୍ଥାନରେ ଏହି ପରିବା ଓ ମାଛ ମାର୍କେଟ ଆରମ୍ଭ ହେବାରୁ ଗ୍ରାହକଙ୍କ ମଧ୍ୟରେ ସାମାଜିକ ଦୂରତା ସହଜରେ ହୋଇ ପାରିଛି। ଗୁରୁବାର ଜିଲା ପ୍ରଶାସନ ପକ୍ଷରୁ ଡାକବାଜି ଯନ୍ତ୍ର, ନୋଟିସ ମାଧ୍ୟମରେ ବ୍ୟବସାୟୀ ଓ ଶ୍ରମିକମାନଙ୍କୁ ଏନେଇ ଅବଗତ କରାଯାଇଥିଲା।
