କେନ୍ଦୁଝର/ଆନନ୍ଦପୁର/ହାଟଡିହୀ,୬।୬(ସ୍ବ.ପ୍ର./ଡି.ଏନ୍.ଏ.): କେନ୍ଦୁଝର ଜିଲା ହାଟଡିହୀ ବ୍ଲକ ସୋସୋ ଥାନା ଗହଳଡାହି ଅଞ୍ଚଳରେ ଜଣେ ନବବିବାହିତା ମହିଳାଙ୍କୁ ୨ ଥାନା ଅଧିକାରୀ ଦୁର୍ବ୍ୟବହାର କରିଥିବା ନେଇ ଶୁକ୍ରବାର ଥାନାରେ ଅଭିଯୋଗ ହୋଇଛି।
ଅଭିଯୋଗନୁଯାୟୀ, ଗତ ୨ ତାରିଖ ରାତିରେ ବଉଳା ଫାଣ୍ଡି ଅଧିକାରୀ କୀର୍ତ୍ତନ ବିହାରୀ ମହାନ୍ତ ସମ୍ପୃକ୍ତ ମହିଳାଙ୍କ ଘର ନିକଟରେ ପହଞ୍ଚି ତାଙ୍କୁ ଓ ତାଙ୍କ ସ୍ବାମୀଙ୍କୁ ଫାଣ୍ଡିକୁ ଯିବା ପାଇଁ କହିଥିଲେ। ମାତ୍ର କୌଣସି ମହିଳା ପୋଲିସ କର୍ମଚାରୀ ନ ଥିବାରୁ ଫୋଣ୍ଡିକୁ ଯିବେନି ବୋଲି ଉକ୍ତ ମହିଳା ମନା କହିଥିଲେ। ପରେ ଫାଣ୍ଡି ଅଧିକାରୀ ନବବିବାହିତାଙ୍କୁ ଗାଡିରେ ବସାଇ ଫାଣ୍ଡିକୁ ନେଇଥିଲେ। ସ୍ବାମୀକୁ ଫାଣ୍ଡିରେ ରଖିଥିବା ବେଳେ ସ୍ତ୍ରୀଙ୍କୁ ଅନ୍ୟ ଏକ କୋଠରୀରେ ଧମକ ଚମକ ଦେବା ସହ ଦୁର୍ବ୍ୟବହାର କରିଥିଲେ। ତେବେ ମହିଳାଙ୍କ ଚିତ୍କାର ଶୁଣି ସ୍ଥାନୀୟ ଲୋକେ ଫାଣ୍ଡିରେ ପହଞ୍ଚିବାରୁ ପାଣ୍ଡି ଅଧିକାରୀ ତାଙ୍କୁ ଛାଡି ଦେଇଥିଲେ। କିଛି ସମୟ ପରେ ସୋସୋ ଥାନା ଅଧିକାରୀ ଗଗନ ନାୟକ ଫାଣ୍ଡିରେ ପହଞ୍ଚି ସ୍ତ୍ରୀସ୍ବାମୀଙ୍କୁ ଧମକ ଦେଇ ବିବାହ ପ୍ରମାଣପତ୍ର ମାଗିଥିଲେ। ପ୍ରମାଣପତ୍ର ଦେଖାଇବା ପରେ ସେମାନେ ଘରକୁ ଫେରିଥିଲେ। ଏ ନେଇ ଶୁକ୍ରବାର ସୋସୋ ଥାନା ଭାରପ୍ରାପ୍ତ ଅଧିକାରୀ ଓ ବଉଳା ଫାଣ୍ଡି ଅଧିକାରୀ ଦୁର୍ବ୍ୟବହାର କରିଥିବା ନେଇ ଆନନ୍ଦପୁର ଡିଏସ୍ପି ବିଦ୍ୟୁତ୍ ପଣ୍ଡାଙ୍କ ନିକଟରେ ମହିଳା ଅଭିଯୋଗ କରିବାସହ କାର୍ଯ୍ୟାନୁଷ୍ଠାନ ଦାବି କରିଛନ୍ତି। ତେବେ ଘଟଣାର ତଦନ୍ତ କରାଯାଇ ଉପଯୁକ୍ତ ପଦକ୍ଷେପ ନିଆଯିବ ବୋଲି ଡିଏସ୍ପି ପଣ୍ଡା କହିଛନ୍ତି। ଅପର ପକ୍ଷରେ ମହିଳାଙ୍କ ଏପରି ଅଭିଯୋଗକୁ ଫାଣ୍ଡି ଓ ଥାନା ଭାରପ୍ରାପ୍ତ ଅଧିକାରୀ ଅସ୍ବୀକାର କରିଥିବା ଜଣାପଡ଼ିଛି।
