ବରଗଡ଼ ଅଫିସ୍,୧୭।୪: ଘାତକ କରୋନା(କୋଭିଡ୍-୧୯) ଭୂତାଣୁ ସଂକ୍ରମଣକୁ ପ୍ରତିହତ କରିବା ପାଇଁ ଦେଶବ୍ୟାପୀ ଲକ୍ ଡାଉନ କଟକଣା ଲାଗୁ କରାଯାଇଛି । ଏଭଳି ସ୍ଥିତିରେ ଖବରକାଗଜ ବିତରକଙ୍କ ରୋଜଗାର ଠପ୍ ପଡ଼ି ଯାଇଛି । ଖବରକାଗଜ ବିତରଣ ଭଳି ଜୀବିକା ହରାଇ ବିତରକଙ୍କ ପରିବାର ଗୁଜୁରାଣ ମେଣ୍ଟାଇବା ସହିତ ଜୀବନ ଦୁର୍ବିସହ ହୋଇ ପଡ଼ିଛି । ଖବରକାଗଜ ବିତରକଙ୍କ ଏହି ସମସ୍ୟା ନେଇ ଧରିତ୍ରୀର ଶୁକ୍ରବାର ସଂସ୍କରଣରେ ଜୀବିକା ଛଡ଼ାଇ ନେଇଛି କରୋନା ଶୀର୍ଷକ ଏକ ଖବର ପ୍ରକାଶିତ ହୋଇଛି । ଏହି ଖବର ପଢ଼ିବା ପରେ ବରଗଡ଼ର ଜଣେ ସାମାଜିକ କର୍ମୀ ଦୀପା ବାରିକ ମାନବିକତା ଦୃଷ୍ଟିରୁ ସେମାନଙ୍କ ପରିବାର ପୋଷଣ ପାଇଁ ସରକାର ଖବରକାଗଜ ବିତରକଙ୍କ ପାଇଁ ଏକ ପ୍ୟାକେଜ ଘୋଷଣା ପାଇଁ ମୁଖ୍ୟମନ୍ତ୍ରୀଙ୍କୁ ନିବେଦନ କରିଛନ୍ତି । ଏ ନେଇ ସେ ମୁଖ୍ୟମନ୍ତ୍ରୀ, ମୁଖ୍ୟ ଶାସନ ସଚିବ, ବରଗଡ଼ ଜିଲାପାଳ ପ୍ରମୁଖଙ୍କୁ ଟୁଇଟ୍ କରିଛନ୍ତି ।
