ନୟାଗଡ଼ ଅଫିସ,୧୭।୧୧-ବିଭିନ୍ନ ସମୟରେ ଆଖିଆଗରେ ଦୁର୍ଘଟଣା ଘଟୁଥିଲେ ମଧ୍ୟ ଥାନା ଓ କଚେରି ଭୟରେ ଆମେମାନେ ଦୁର୍ଘଟଣାଗ୍ରସ୍ତ ବ୍ୟକ୍ତିମାନଙ୍କୁ ସାହାଯ୍ୟ କରିପାରୁନାହୁଁ। ଫଳରେ ସେମାନଙ୍କର ପ୍ରାଣହାନି ଘଟୁଛି। ଏହାକୁ ଦୃଷ୍ଟିରେ ରଖି ୨୦୧୪ ମସିହାରେ ଦେଶରେ ଗୁଡ୍ ସାମାରିଟାନ୍ ପଲିସି ଲାଗୁ କରାଯାଇଛି। ୨୦୧୮ ଫେବୃୟାରୀଠାରୁ ଏହା ଓଡ଼ିଶାରେ ଲାଗୁ ହୋଇଛି । ଅନ୍ୟ ଜିଲାରେ ଗୁଡ୍ ସାମାରିଟାନ୍ ହୋଇ ବ୍ୟକ୍ତିମାନେ ପୁରସ୍କୃତ ହେଉଥିଲେ ମଧ୍ୟ ନୟାଗଡ଼ ଜିଲାରେ ଆଜି ପର୍ଯ୍ୟନ୍ତ କେହି ଏ ଦିଗରେ ପୁରସ୍କୃତ ହୋଇ ପାରିନାହାନ୍ତି। ଫଳରେ ଜିଲା ସଡ଼କ ସୁରକ୍ଷା କମିଟିର କାର୍ଯ୍ୟଦକ୍ଷତାଙ୍କୁ ନେଇ ପ୍ରଶ୍ନ ଉଠୁଛି।
ସାମାରିଟାନ୍ ପଲିସି ଅନୁଯାୟୀ, କୌଣସି ବ୍ୟକ୍ତି ନିଃସ୍ବାର୍ଥପରଭାବେ ଦୁର୍ଘଟଣାରେ ଆହତ ହୋଇ ପଡ଼ିଥିବା ଲୋକଙ୍କୁ ତୁରନ୍ତ ଉଦ୍ଧାର କରି ଡାକ୍ତରଖାନା ଆଣି ଚିକିତ୍ସା କରାନ୍ତି ତାହା ହେଲେ ତାଙ୍କୁ ୨୦୦୦ ଟଙ୍କା ଦିଆଯାଇ ପୁରସ୍କୃତ କରାଯିବ। ସେହିଭଳି ଯଦି ସମ୍ପୃକ୍ତ ବ୍ୟକ୍ତି ଜଣଙ୍କ ଭଡ଼ାଗାଡ଼ିରେ ଆହତ ବ୍ୟକ୍ତିଙ୍କୁ ଡାକ୍ତରଖାନା ଆଣିଥିବେ ତାହା ହେଲେ ତାଙ୍କୁ ଗାଡ଼ି ଭଡ଼ା ମଧ୍ୟ ପ୍ରଦାନ କରାଯିବ। ଏଥିପାଇଁ ଗୁଡ୍ ସାମାରିଟାନ୍ଙ୍କୁ ଜିଲା ମୁଖ୍ୟ ଚିକିତ୍ସାଳୟରୁ ପ୍ରମାଣପତ୍ର ଆଣି ଆରଟିଓ କାର୍ଯ୍ୟାଳୟରେ ଦାଖଲ କରିବେ। ସମ୍ପୃକ୍ତ ବ୍ୟକ୍ତିଙ୍କୁ କୌଣସି ମାମଲାରେ କୋର୍ଟ, କଚେରିର ସମସ୍ୟାର ସମ୍ମୁଖୀନ ହେବାକୁ ପଡ଼ିବ ନାହିଁ। ହେଲେ ପ୍ରଚାର ପ୍ରସାର ଅଭାବରୁ ଅନେକେ ଏ ବିଷୟରେ ଅଜ୍ଞ। ଜିଲା ସଡ଼କ ସୁରକ୍ଷା କମିଟି ପକ୍ଷରୁ ଯେଉଁଭଳି ଭାବେ ଲୋକମାନଙ୍କୁ ସଚେତନତା ଓ ପ୍ରଚାର ପ୍ରସାର କରାଇବା କଥା ସେହିଭଳି ହୋଇପାରୁନାହିଁ। କମିଟି ଜିଲା ମୁଖ୍ୟ ଚିକିତ୍ସାଳୟର ଏକ କଣରେ ହୋର୍ଡିଂ ମାରି ତା’ର କାର୍ଯ୍ୟ ସାରି ଦେଇଥିବା ଦେଖିବାକୁ ମିଳିଛି।
ଯେ, ଜିଲାରେ ଦିନକୁ ଦିନ ସଡ଼କ ଦୁର୍ଘଟଣା ବୁଦ୍ଧି ପାଉଛି। ତାହା ସାଙ୍ଗକୁ ମୃତକ ଓ ଗୁରୁତରଙ୍କ ସଂଖ୍ୟା ମଧ୍ୟ ବୃଦ୍ଧି ପାଉଛି । ୨୦୧୮ରେ ୨୧୧ଟି ସଡ଼କ ଦୁର୍ଘଟଣା ନେଇ ଥାନାରେ ଅଭିଯୋଗ ହୋଇଥିବା ବେଳେ ୨୦୧୯ ମସିହା ବର୍ତ୍ତମାନ ସୁଦ୍ଧା ୧୮୭ଟି ଦୁର୍ଘଟଣା ଘଟିଛି। ୨୦୧୮ରେ ୨୧୧ଟି ଦୁର୍ଘଟଣାରେ ୯୦ ଜଣଙ୍କ ମୃତ୍ୟୁ ଘଟିଥିବା ବେଳେ ୧୪୧ ଜଣ ଗୁରୁତର ହୋଇଛନ୍ତି। ସେହିଭଳି ୨୦୧୯ ମସିହା ବର୍ତ୍ତମାନ ସୁଦ୍ଧା ହୋଇଥିବା ୧୮୭ଟି ଦୁର୍ଘଟଣାରେ ୭୬ ଜଣଙ୍କର ମୃତ୍ୟୁ ଘଟିଥିବା ବେଳେ ୧୪୫ ଜଣ ଗୁରୁତର ହୋଇଛନ୍ତି। ଦୁର୍ଘଟଣାର ପରବର୍ତ୍ତୀ ୧ ଘଣ୍ଟା ସମୟ ଆହତ ବ୍ୟକ୍ତିମାନଙ୍କ ପାଇଁ ଗୁରୁତ୍ୱପୂର୍ଣ୍ଣ । ଏହି ସମୟରେ ଯଦି ଦୁର୍ଘଟଣାଗ୍ରସ୍ତ ବ୍ୟକ୍ତି ଡାକ୍ତରଖାନାରେ ପହଞ୍ଚତ୍ପାରନ୍ତି ତାହା ହେଲେ ତାଙ୍କ ଜୀବନ ରକ୍ଷା ପାଇଯାଏ। ତେଣୁ ଲୋକମାନେ ଗୁଡ୍ ସାମାରିଟାନ୍ ପାଇଁ ଆଗେଇ ଆସି ସାହାଯ୍ୟର ହାତ ବଢ଼ାଇବାକୁ ସାଧାରଣରେ ଦାବି ହେଉଛି। ଏ ନେଇ ଉପଜିଲାପାଳ ତଥା ଦାୟିତ୍ୱରେ ଥିବା ଆରଟିଓ ଲଗ୍ନଜିତ ରାଉତଙ୍କୁ ପଚାରିବାରୁ ସେ କହନ୍ତି ଯେ ଆଗାମୀ ଦିନରେ ପୋଲିସ ବିଭାଗ ସହିତ ଆଲୋଚନା କରି ଏ ଦିଗରେ ଲୋକମାନଙ୍କୁ ସଚେତନ କରାଯିବ ।
