ଖୋର୍ଦ୍ଧା ଅଫିସ,୧୬ା୫: ତାମିଲନାଡୁ କୋଏମ୍ବାଟୁରରୁ ଭଦ୍ରକକୁ ଆସିଥିବା ସ୍ବତନ୍ତ୍ର ଶ୍ରମିକ ଟ୍ରେନ୍ ଶୁକ୍ରବାର ମଧ୍ୟାହ୍ନରେ ଖୋର୍ଦ୍ଧାରୋଡ୍ ଷ୍ଟେଶନରେ ପହଞ୍ଚିଥିଲା। ୨୦ ଜିଲାର ୬୮୧ ପ୍ରବାସୀ ଏହି ଷ୍ଟେଶନରେ ଓହ୍ଲାଇଥିଲେ। ଆସିଥିବା ସମସ୍ତ ପ୍ରବାସୀଙ୍କ ମଧ୍ୟରେ ଅନୁଗୋଳ ୮, ବଲାଙ୍ଗୀର ୪୯, ବୌଦ୍ଧ ୧୭, କଟକ ୧୪, ଢେଙ୍କାନାଳ ୨୬, ଗଜପତି ୧୪, ଗଞ୍ଜାମ ୧୯୨, ଜଗତ୍ସିଂହପୁର ୩୪, କଳାହାଣ୍ଡ ୬୦, କନ୍ଧମାଳ ୧୭, କେନ୍ଦ୍ରାପଡ଼ା ୩୧, ଖୋର୍ଦ୍ଧା ୪, ନୂଆପଡ଼ା ୧୨, ପୁରୀ ୨୬, ରାୟଗଡ଼ା ୨୯, ସମ୍ବଲପୁର ୨୯, ସୁବର୍ଣ୍ଣପୁର ୬୪, ସୁନ୍ଦରଗଡର୧୨ ଜଣ ରହିଥିଲେ। ସାମାଜିକ ଦୂରତ୍ୱକୁ ଦୃଷ୍ଟିରେ ରଖି ଟ୍ରେନ୍ରୁ ଏକସଙ୍ଗେ ଓହ୍ଲାଇବାକୁ ବାରଣ କରାଯାଇଥିଲା। ଗୋଟିଏ ଲେଖାଏ ବଗିରୁ ପର୍ଯ୍ୟାୟକ୍ରମେ ଓହ୍ଲାଯାଇ ବାହାରକୁ ଅଣାଯାଇଥିଲା। ପରେ ଦାୟିତ୍ୱରେ ଥିବା ଅଧିକାରୀ, କର୍ମଚାରୀମାନେ ଫେରିଥିବା ପ୍ରବାସୀ ଓଡ଼ିଆଙ୍କ ଥର୍ମାଲ ସ୍କ୍ରିନିଂ, ପଞ୍ଜୀକରଣ, ଡାହାଣ ହାତରେ ଷ୍ଟାପିଙ୍ଗ୍ କରାଇଥିଲେ। ପରେ ବସ୍ ପର୍ଯ୍ୟନ୍ତ ଅଣାଯାଇ ସେମାନଙ୍କୁ ଜିଲାକୁ ପଠାଯାଇଥିଲା। ଏମାନଙ୍କୁ ନେଇ ବସ୍ ଯାଉଥିବା ରୁଟ୍ରେ କଟକଣା କଡ଼ାକଡ଼ି କରାଯାଇଥିଲା। ଏହି ଟ୍ରେନ ଭଦ୍ରକ ଅଭିମୁଖେ ଅପରାହ୍ନ ୧ଟା ୪୬ରେ ଷ୍ଟେଶନ ଛାଡିଥିଲା। ପ୍ରବାସୀମାନେ ନିଜ ଜିଲାକୁ ଫେରିଯିବା ପରେ ପ୍ଲାଟଫର୍ମ, ଷ୍ଟେଶନ ବାହାର ଅଞ୍ଚଳ ଆଦି ବିଶୋଧନ କରାଯାଇଥିଲା। ଜିଲା ପ୍ରଶାସନିକ ଅଧିକାରୀ, ରେଲଓ୍ବେ କର୍ତ୍ତୃପକ୍ଷ, ଜିଆରପି, ଆରପିଏଫ ଓ ସ୍ଥାନୀୟ ପୋଲିସ, ପୌର ପ୍ରଶାସନ ଅଧିକାରୀ ପ୍ରମୁଖ ଉପସ୍ଥିତ ରହି କାର୍ଯ୍ୟ ତଦାରଖ କରିଥିଲେ।
