(ଉପେନ୍ଦ୍ର ରାଉତ)
ବଅଁରପାଳ,୪।୬
ନାଲ୍କୋ କଲୋନୀର ପରିବେଶ ହେବ ଆହୁରି ଶାନ୍ତ, ଆହୁରି ସୁନ୍ଦର। ସେଥିପାଇଁ ଏକାଧିକ ପାର୍କ ଥିଲେ ବି କର୍ତ୍ତୃପକ୍ଷ କଲୋନୀ ମଧ୍ୟରେ ଆଉ ଏକ ଇକୋ ପାର୍କ ନିର୍ମାଣ କରୁଛନ୍ତି। ୧୦ ଲକ୍ଷ ଟଙ୍କା ବ୍ୟୟରେ ହେଉଥିବା ଏହି ପାର୍କ ମଧ୍ୟରେ ରହିବ ଟ୍ରାଇବାଲ ମ୍ୟୁଜିୟମ। ସେଥିରେ ଆଦିବାସୀ ସଂସ୍କୃତିକୁ ଏପରି ରୂପ ଦିଆଯିବ ଯେ ତାହା ଜୀବନ୍ତ ଭଳି ଲାଗିବ। ଚଳିତମାସ ଶେଷ ସୁଦ୍ଧା ପାର୍କ କାର୍ଯ୍ୟକ୍ଷମ ହୋଇଯିବ ବୋଲି ନାଲ୍କୋ ପକ୍ଷରୁ ଆଶାବ୍ୟକ୍ତ କରାଯାଇଛି।
ନାଲ୍କୋ ଟାଉନଶିପ୍ବାସୀ ଓ ଏଠାକୁ ଆସୁଥିବା ଲୋକମାନଙ୍କୁ ଏକ ମନଲୋଭା ପରିବେଶ ଭେଟିଦେବା ପାଇଁ ନାଲ୍କୋ ପକ୍ଷରୁ କଲୋନୀ ମଧ୍ୟରେ ମଧୁସୂଦନ ପାର୍କ, ଡିଅର ପାର୍କ, ଗୋପବନ୍ଧୁ ପାର୍କ ସହ ବିଭିନ୍ନ ମନ୍ଦିର ନିର୍ମାଣ କରାଯାଇଛି। ହେଲେ ଏବେ ନିର୍ମାଣ କରାଯାଉଥିବା ଇକୋ ପାର୍କ ଏହାଠାରୁ ସ୍ବତନ୍ତ୍ର। କାରଣ ଏହି ପାର୍କ ମଧ୍ୟରେ ନିର୍ମିତ ହେବାକୁ ଥିବା ଟ୍ରାଇବାଲ ମ୍ୟୁଜିୟମ କଲୋନୀର ଶୋଭାକୁ ବହୁଗୁଣିତ କରିଦେବ ବୋଲି ଉଦ୍ୟାନ ବିଭାଗ ପକ୍ଷରୁ ଆଶା କରାଯାଇଛି। ଏଥିରେ କୃତ୍ରିମ ପାହାଡ଼, ଝରଣା ଓ ରଙ୍ଗ ବେରଙ୍ଗର ଆଲୋକ ସାଜସଜ୍ଜା ରହିବ। ବିଶେଷକରି ଅନୁସୂଚିତ ଜନଜାତିଙ୍କ ସଂସ୍କୃତି, ପରମ୍ପରା ଉପରେ ଆଧାରିତ ବିଭିନ୍ନ ପ୍ରତିମୂର୍ତ୍ତି ଜୀବଜନ୍ତୁଙ୍କ ଛବି ସ୍ଥାନିତ କରାଯିବ। ଏହି ପାର୍କର ନାମ ସନ୍ଥକବି ଭୀମ ଭୋଇ ପାର୍କ ରଖାଯିବ ବୋଲି ନାଲ୍କୋ ପ୍ରଶାସନ ପକ୍ଷରୁ ସୂଚନା ମିଳିଛି। ନାଲ୍କୋ ସେଣ୍ଟ୍ରାଲ ମାର୍କେଟ ନିକଟ ଟାଉନଶିପର ୩ ନମ୍ବର ଗେଟ୍ ନିକଟରେ ଏହାର ନିର୍ମାଣ କାର୍ଯ୍ୟ ଜୋରଦାର ଚାଲିଛି। ପାର୍କ ନିକଟରେ ଆଦିକବି ଶୁଦ୍ରମୁନି ସାରଳା ଦାସ, ସ୍ବଭାବ କବି ଗଙ୍ଗାଧର ମେହର, ପଦ୍ମଶ୍ରୀ ରାଧାମୋହନ ଗଡ଼ନାୟକ, ବ୍ୟାସକବି ଫକୀରମୋହନ ସେନାପତି, କବି ସମ୍ରାଟ ଉପେନ୍ଦ୍ର ଭଞ୍ଜଙ୍କ ପ୍ରତିମୂର୍ତ୍ତି ନିର୍ମାଣ କରାଯାଇଛି।
ଏ ସମ୍ପର୍କରେ ନାଲ୍କୋ ଉଦ୍ୟାନ ବିଭାଗ ଦାୟିତ୍ୱରେ ଥିବା ଏଜିଏମ୍ ଶୁଭେନ୍ଦୁ ନାୟକ କୁହନ୍ତି, ନୂତନ ଭାବେ କରାଯାଉଥିବା ଏହି ପାର୍କରେ ବହୁ ପ୍ରାକୃତିକ ଦୃଶ୍ୟ ସ୍ଥାନ ପାଇଛି। ଚଳିତମାସ ଶେଷ ସପ୍ତାହ ମଧ୍ୟରେ ନିର୍ମାଣ ଶେଷ ହେବ। ଇଷ୍ଟେଟ ବିଭାଗ ପ୍ରବନ୍ଧକ ମଣିରଞ୍ଜନ ପଟ୍ଟନାୟକ କୁହନ୍ତି, ଟାଉନଶିପରେ ନୂତନ ଭାବେ ଏହି ପାର୍କ ନିର୍ମିତ ହେଉଛି। ସନ୍ଥକବି ଭୀମ ଭୋଇଙ୍କ ନାମରେ ଏହାର ନାମକରଣ ହେବ। ଏହା ଅତ୍ୟନ୍ତ ସୌନ୍ଦର୍ଯ୍ୟପୂର୍ଣ୍ଣ ହେବ ବୋଲି ଆଶା କରାଯାଉଛି।
