ଛତ୍ରପୁର,୧୯ା୧୨(ଡି.ଏନ.ଏ)-ଗଞ୍ଜାମ ଜିଲାରେ ଜାଗା ଯୋଜନାରେ ବସ୍ତି ବାସିନ୍ଦାଙ୍କୁ ଥଇଥାନର ଅଗ୍ରଗତି ସମୀକ୍ଷା ବୈଠକ ଗୁରୁବାର ଛତ୍ରପୁରସ୍ଥିତ ଜିଲାପାଳଙ୍କ ସମ୍ମିଳନୀ ଗୃହରେ ଅନୁଷ୍ଠିତ ହୋଇଯାଇଛି। ଏଥିରେ ସହରାଞ୍ଚଳ ଉନ୍ନୟନ ସଂସ୍ଥା (ଡୁଡା)ର ପିଡି ସୁଦାମ ଚରଣ ମଣ୍ଡଳ ଅଧ୍ୟକ୍ଷତା କରିଥିଲେ । ଜିଲାର ୧୭ ସହରାଞ୍ଚଳରେ ୭୭ ବସ୍ତିକୁ ଚିହ୍ନଟ କରାଯାଇଥିଲା । ଏଥିରେ ବସବାସ କରୁଥିବା ୨୩୭୬ ପରିବାରଙ୍କୁ ଜାଗା ଯୋଜନାରେ ଜମି ଅଧିକାର ଦେବା ନିମନ୍ତେ ସ୍ଥିର ହୋଇଥିଲା। ସେଥିମଧ୍ୟଥିରୁ ୧୯୩୭ ପରିବାରକୁ ଜମି ଅଧିକାର ସମ୍ବନ୍ଧୀୟ ପଟ୍ଟା ପ୍ରଦାନ କରାଯାଇଛି । ଆହୁରି ୪୩୯ ପରିବାରକୁ ଏହି ଯୋଜନାରେ ଥଇଥାନ କରାଯିବାକୁ ବାକି ରହିଛି । ଏହା କିଭଳି ତ୍ୱରାନ୍ବିତ ହେବ ତାହା ଉପରେ ପିଡି ଗୁରୁତତ୍ୱାରୋପ କରିଥିଲେ ।
ମିଳିଥିବା ସୂଚନା ଅନୁସାରେ, ଆସିକା ଏନ୍ଏସିର ୧୩୧ ପରିବାର, ଭଞ୍ଜନଗର ଏନ୍ଏସିର ୧୩୯, ଗୋପାଳପୁର ଏନଏସିର ୫୫, ଗଞ୍ଜାମ ଏନଏସିର ୧୨, ସୋରଡା ଏନଏସିର ୫୭, ରମ୍ଭା ଏନଏସିର ୩୯ ଓ କୋଦଳା ଏନଏସିର ୬ ପରିବାର ଏହି ଯୋଜନାରେ ଜମି ଅଧିକାର ପାଇବାକୁ ବାକି ରହିଛନ୍ତି। ଅନ୍ୟପକ୍ଷରେ ଛତ୍ରପୁର ଏନଏସିର ୩ଟି ବସ୍ତିର ଲୋକେ ଅନ୍ୟ ସ୍ଥାନରେ ଜାଗା ପାଇ ପ୍ରଧାନମନ୍ତ୍ରୀ ଆବାସ ଯୋଜନା (ସହରାଞ୍ଚଳ)ରେ ସାମିଲ ହେବାକୁ ଇଚ୍ଛା ପ୍ରକାଶ କରୁନାହାନ୍ତି। ବିଭିନ୍ନ ଏନ୍ଏସିିରେ ଏହି ଯୋଜନାରେ ସାମିଲ ହେବାରେ ଥିବା ବିଭିନ୍ନ ସମସ୍ୟା ଉପରେ ବୈଠକରେ ବିସ୍ତୃତ ଭାବେ ଆଲୋଚନା କରାଯାଇ ସମାଧାନକୁ ଗୁରୁତ୍ୱାରୋପ କରାଯାଇଥିଲା । ଏନ୍ଏସି ନିର୍ବାହୀ ଅଧିକାରୀ ଓ ତହସିଲଦାରଙ୍କ ମଧ୍ୟରେ ସମନ୍ବୟ ରଖି କାମ କରିଲେ ଏହି ଯୋଜନାର ସଫଳ ରୂପାୟନ ହେବ ବୋଲି କୁହାଯାଇଥିଲା। ବୈଠକରେ ଛତ୍ରପୁର ଉପଜିଲାପାଳ ପ୍ରିୟ ରଞ୍ଜନ ପୃଷ୍ଟିଙ୍କ ସମେତ ତହସିଲଦାର ଓ ଏନ୍ଏସି ନିର୍ବାହୀ ଅଧିକାରୀ ପ୍ରମୁଖ ଯୋଗ ଦେଇଥିଲେ ।
