ମହାକାଳପଡ଼ା,୨୭।୧୦(ପ୍ରତାପ ଚନ୍ଦ୍ର ସ୍ବାଇଁ): କେନ୍ଦ୍ରାପଡ଼ା ଜିଲା ମହାକାଳପଡ଼ା ବ୍ଲକ ପେଟଛେଲା ପଞ୍ଚାୟତ ଶବରପଡ଼ାର ୨୦ଜଣ କଙ୍କଡ଼ା ଧରାଳି ଗହୀରମଥା ସାମୁଦ୍ରିକ ଅଭୟରଣ୍ୟ ହୁକିଟୋଲା ଅନତୀ ଦୂରରେ ଥିବା ଲଞ୍ଚଘୋଲା ଦ୍ବୀପରୁ ଉଦ୍ଧାର ହୋଇ ଗାଁକୁ ଫେରିଆସିଛନ୍ତି।
ସୂଚନା ଯୋଗ୍ୟ, ୨୦ଜଣ କଙ୍କଡା ଧରାଳି ହୁକିଟୋଲା ସଂଲଗ୍ନ ଅନତୀ ଦୂରରେ ଥିବା ଲଞ୍ଚଘୋଲା ଦ୍ବୀପରେ ପଲିଥିନ ଟାଣି ରହୁଥିଲେ। ବାତ୍ୟାକୁ ନେଇ ପ୍ରଶାସନ ପକ୍ଷରୁ ଡାକ ବାଜି ମାଇକରେ ପ୍ରଚାର କରି ସଚେତନତା କରାଯାଇଥିଲା। ହେଲେ ସେମାନଙ୍କ ନିକଟରେ ସଚେତନତା ବାର୍ତ୍ତା ପହଞ୍ଚି ନ ଥିବା ସୋମବାର ଧରିତ୍ରୀରେ ଖବର ପ୍ରକାଶ ପାଇଥିଲା। ଖବର ପ୍ରକାଶ ପରେ ଜିଲା ପ୍ରଶାସନ ପକ୍ଷରୁ ତତ୍ପରତା ପ୍ରକାଶ ପାଇଥିଲା।
ଏଭଳିସ୍ଥିତିରେ ଅତି ଗୋପନୀୟ ଭାବେ କଙ୍କଡା ବେପାରୀମାନେ ସୋମବାର ବିଳମ୍ବିତ ରାତିରେ ଅଟକି ରହିଥିବା ଶବର ସମ୍ପ୍ରଦାୟର କଙ୍କଡା ଧରାଳିଙ୍କୁ ଉଦ୍ଧାର କରି ଘରକୁ ପଠାଇଥିବା ଥିବା କେତେକ ଧରାଳି କହିଛନ୍ତି। ସେମାନଙ୍କ କହିବା ମୁତାବକ, କଙ୍କଡ଼ା ବେପାରୀମାନେ ଗରିବ ନିରକ୍ଷରମାନଙ୍କୁ କଙ୍କଡା ଧରିବାରେ ନିୟୋଜିତ କରୁଛନ୍ତି। ତାଙ୍କଠାରୁ ବହୁ ମୂଲ୍ୟର ମାଛ, କଙ୍କଡାକୁ କମ୍ ମୂଲ୍ୟ କିଣି ଚଢାଦରରେ ବିକ୍ରି କରୁଥିବା ଗୁରୁତର ଅଭିଯୋଗ କରିଛନ୍ତି।
ଅନ୍ୟପକ୍ଷେ ଉଦ୍ଧାର କେତେକ କଙ୍କଡ଼ା ଧରାଳି ମଙ୍ଗଳବାର ସାରେ ବତୀଘର ପଞ୍ଚାୟତ ବଡ଼ଟୁବିଠାରେ ଥିବା କୁହାଯାଉଛି । ଅପରପକ୍ଷରେ ଜିଲା ପ୍ରଶାସନ ପକ୍ଷରୁ ଏକ ପ୍ରେସ ରିଲିଜ ପ୍ରକାଶ କରାଯାଇଛି। ଏଥିରେ ଉକ୍ତ ଦ୍ବୀପରେ କେହି ନ ଥିବା ତଦନ୍ତ କରି ବନ ବିଭାଗ ପକ୍ଷରୁ କୁହାଯାଇଛି।
ଜମ୍ବୁ ସାମୁଦ୍ରିକ ଥାନା, ସାମୁଦ୍ରିକ ମତ୍ସ୍ୟ ବିଭାଗର ପ୍ରମୁଖ କର୍ମଚାରୀଙ୍କ ସହ ଶବରପେଟ ଛେଲା ରାଜସ୍ବ ନିରୀକ୍ଷକ ବିଜୟ କୁମାର ବେହେରା, ବ୍ଲକ ସାମାଜିକ ସୁରକ୍ଷା ଅଧିକାରୀ ଦୀପକ କୁମାର ପରିଡା, ସାମୁଦ୍ରିକ ମତ୍ସ ଅଧିକାରୀ ପ୍ରମୁଖ କଙ୍କଡା ଧରାଳିଙ୍କ ଘରେ ପହଞ୍ଚି ପଚରାଉଚରା କରିଛନ୍ତି।
