ଭଦ୍ରକ ଅଫିସ,୩।୧- ସରକାରୀ ସ୍ତରରେ ତଳସ୍ତରର କର୍ମଚାରୀଙ୍କ ଖାମଖିଆଲି ମନୋଭାବ ଯୋଗୁ ଚାଷୀମାନେ ଉପଯୁକ୍ତ ପରିମାଣର ଧାନ ସମବାୟ ସମିତି ମାଧ୍ୟମରେ ବିକ୍ରି କରି ନ ପାରି ଦଲାଲଙ୍କ ଶୋଷଣର ଶିକାର ହେବେ ବୋଲି ଆଶଙ୍କା ପ୍ରକାଶ ପାଇଛି। ଭଦ୍ରକ ଉପକଣ୍ଠ ପରସିଙ୍ଗା ପଞ୍ଚାୟତ ଅଧୀନ ତେନ୍ତୁଳିଗଡ଼ିଆ ଗଁାର ବ୍ରଜନାଥ ପଲାର ଗୁରୁବାର ଏ ସମ୍ପର୍କରେ ଜିଲା ପ୍ରଶାସନର ଦୃଷ୍ଟି ଆକର୍ଷଣ କରିବା ସହ ଏଆର୍ସିଏସ୍ ସ୍ବାତୀବାଳା ମହାପାତ୍ରଙ୍କୁ ଭେଟି ଲିଖିତ ଅଭିଯୋଗ କରିଛନ୍ତି। ସମବାୟ ସମିତିସ୍ତରରେ ଚାଷୀଙ୍କ ଜମି କାଗଜପତ୍ର ନିଆଯାଇ ପଞ୍ଜୀକରଣ କରାଯାଇଥିଲା। ସେହି ସମୟରେ ସମବାୟ ସମିତିର କେତେଜଣ କର୍ମଚାରୀଙ୍କ ଡାଟାଏଣ୍ଟ୍ରି ବେଳେ ଖାମଖିଆଲି ମନୋଭାବ କାରଣରୁ ଉପଯୁକ୍ତ ପରିମାଣର ଧାନବିକ୍ରିରୁ ଚାଷୀମାନେ ବଞ୍ଚତ୍ତ ହେଉଥିବା ଅଭିଯୋଗ ହୋଇଛି।
ବ୍ରଜନାଥ ଅଭିଯୋଗ କରିଛନ୍ତି ଯେ, ତାଙ୍କର ୩.୫ ଏକର ଚାଷଜମି ରହିଛି। ଏକର ପିଛା ଜଳସେଚିତ ଜମି ହାରରେ ୧୮ କୁଇଣ୍ଟାଲ ଧାନ ବିକ୍ରି କରିପାରିବାର ସରକାରୀ ନିୟମ ରହିଛି। ନିୟମ ମୁତାବକ ୩.୫ ଏକର ଅନୁଯାୟୀ ୬୨ କୁଇଣ୍ଟାଲ ଧାନ ବିକିପାରିବେ। ହେଲେ ସରକାରୀ ଭାବେ ତାଙ୍କୁ ୧.୯୦ କୁଇଣ୍ଟାଲ ଧାନ ବିକ୍ରି ପାଇଁ ଅଗ୍ରିମ ଟୋକନ୍ ପ୍ରଦାନ କରାଯାଇଛି। ଏହି ଟୋକନ ଦେଖି ସେ ଚିନ୍ତାରେ ପଡ଼ିଯାଇଛନ୍ତି। ଆଉ ବଳକା ଧାନ ଦଲାଲଙ୍କୁ ବିକିଲେ ପ୍ରାୟ ୪୦ ହଜାର ଟଙ୍କା କ୍ଷତି ସହିବାକୁ ପଡ଼ିବ ବୋଲି ସେ ଆଶଙ୍କା ପ୍ରକାଶ କରିଛନ୍ତି। ଏହିଭଳି ଅନେକ ଚାଷୀଙ୍କ ସମସ୍ୟା ସୃଷ୍ଟି ହୋଇଥିବା ଜଣାପଡ଼ିଛି। ଫଳରେ ଚାଷୀମାନେ ନିଜ ଜମି ମୁତାବକ ଧାନ ମଣ୍ଡିରେ ବିକ୍ରି କରି ନ ପାରି ହତାଶ ହେଉଛନ୍ତି। ଏ ସମ୍ପର୍କରେ ଏଆର୍ସିଏସ୍ ମହାପାତ୍ରଙ୍କୁ ପଚାରିବାରୁ ସମସ୍ୟା କାହିଁକି ଓ କେଉଁ ସ୍ତରରେ ହୋଇଛି ଏହାର ତଦନ୍ତ କରାଯିବ ଓ ପରବର୍ତ୍ତୀ ମୁହୂର୍ତ୍ତରେ ସେମାନଙ୍କୁ ଅନୁମତି ଦିଆଯାଇ ଧାନକ୍ରୟ କରାଯିବ ବୋଲି କହିଛନ୍ତି। ମିଳିଥିବା ସୂଚନା ଅନୁସାରେ, ଚଳିତବର୍ଷ ଜିଲାରେ ୫୧ ହଜାର ୨୩୪ ଚାଷୀ ଧାନ ବିକ୍ରି ପାଇଁ ପଞ୍ଜୀକରଣ କରିଛନ୍ତି। ସରକାରୀ ସ୍ତରରେ ସେମାନଙ୍କଠାରୁ ମୋଟ ୨୦ ଲକ୍ଷ କୁଇଣ୍ଟାଲ ଧାନ କ୍ରୟ ସକାଶେ ଟାର୍ଗେଟ ରଖାଯାଇଛି। ପ୍ରଥମ ପର୍ଯ୍ୟାୟରେ ୧୩ ଓ ଦ୍ୱିତୀୟ ପର୍ଯ୍ୟାୟରେ ୭ ଲକ୍ଷ କୁଇଣ୍ଟାଲ ଧାନକ୍ରୟ କରାଯିବ ବୋଲି ଧାର୍ଯ୍ୟ ହୋଇଛି।
