ଜଗତ୍ସିଂହପୁର ଅଫିସ, ୧୬।୧: ଜଗତ୍ସିଂହପୁରରର ପ୍ରସିଦ୍ଧ ମକର ମେଳା ସ୍ବତନ୍ତ୍ର। ପ୍ରତିବର୍ଷ ଭଳି ଚଳିତବର୍ଷ ମକର ସଂକ୍ରାନ୍ତୀ ଅବସରରେ ବୁଧବାରଠାରୁ ସୋମନାଥ ହାଟ ପଡ଼ିଆଠାରେ ଏହି ମେଳା ଆରମ୍ଭ ହୋଇଛି। ଜିଲାପାଳଙ୍କ କାର୍ଯ୍ୟାଳୟ ପରିସର ପଡ଼ିଆଠାରେ ପୁସ୍ତକ ମେଳା ଓ ହାଟ ପଡ଼ିଆରେ ମକର ମେଳା ଆରମ୍ଭ ହୋଇଥିବାରୁ ଜିଲା ମୁଖ୍ୟାଳୟ ଚଳଚଞ୍ଚଳ ହୋଇଉଠିଛି। ଜଗତ୍ସିଂହପୁର ଏକ କୃଷି ପ୍ରଧାନ ଜିଲା ହୋଇଥିବାରୁ ମକର ସଂକ୍ରାନ୍ତୀ ପୂର୍ବରୁ ଧାନ ଅମଳ ସରିଥାଏ। ନୂଆ ଚାଉଳ ଖାଇବା ପୂର୍ବରୁ ଏହାକୁ ମକର ସଂକ୍ରାନ୍ତୀରେ ଭୋଗ କରାଯାଇଥାଏ। ଏହି ପରମ୍ପରା ବଜାୟ ରଖିବା ସହ ଉତ୍ସବ ପାଳନ ନିମିତ୍ତ ଦୀର୍ଘବର୍ଷ ଧରି ମକର ମେଳା ଅନୁଷ୍ଠିତ ହୋଇଆସୁଛି। ଏହିଦିନ ସ୍ଥାନୀୟ ହାଟବଜାରସ୍ଥିତ ମୁଚୁକୁନ୍ଦ ସୋମନାଥ ମହାଦେବଙ୍କ ପୀଠରେ ପଞ୍ଚୁଦୋଳ ମେଳଣ ହୋଇଥାଏ। ଚଳିତବର୍ଷ ଅନୁରୂପ ଭାବେ ମେଳଣ ଆୟୋଜନ କରାଯାଇଥିଲା। ବୁଧବାର ଅପରାହ୍ନରୁ ଚାରିଦୋଳ ଅର୍ଥାତ୍ ଉତ୍ତର ପଟୁ ସିପିସ୍ଥିତ ମୁକ୍ତେଶ୍ୱର, ଦକ୍ଷିଣରୁ ଦେଭୋଗର (ରସଲପୁର) ରାଧାମାଧବ, ପୂର୍ବ ଚାଟ୍ରାର ଶ୍ରୀରାଧାକାନ୍ତ ଏବଂ ପଶ୍ଚିମ ପଟୁ ଏହି ଗ୍ରାମରେ ଅବସ୍ଥିତ ରାଧାକାନ୍ତ ମେଳଣ ପଡ଼ିଆକୁ ଘଣ୍ଟପଟୁଆରରେ ପ୍ରବେଶ କରିଥିଲେ। ଥାନପତି ମୁଚୁକୁନ୍ଦ ସୋମନାଥ ମହାଦେବ ୪ ଦୋଳଙ୍କୁ ସ୍ବାଗତ କରି ମେଳଣସ୍ଥଳ ପର୍ଯ୍ୟନ୍ତ ନେଇଥିଲେ। ଏହାପରେ ପଞ୍ଚୁଦୋଳ ମେଳଣ ନିମିତ୍ତ ସମସ୍ତ ପୂଜାପାଠ କରାଯିବା ସହ ମକର ଚାଉଳ ଭୋଗ ଲାଗି କରାଯାଇଥିଲା। ରାତିରେ ପାର୍ବତୀ ଓ ତ୍ରିନାଥ ଗଣନାଟ୍ୟ ପକ୍ଷରୁ ମାଗଣା ଅପେରା ପ୍ରଦର୍ଶିତ ହୋଇଥିଲା। ତେବେ ଚଳିତ ମକରମେଳା ପାଇଁ ପଡ଼ିଆରେ ଶତାଧିକ ଷ୍ଟଲ କରାଯାଇଛି। ସ୍ଥାନୀୟ ଅଞ୍ଚଳର କେତେଜଣ ବ୍ୟକ୍ତି କହିଛନ୍ତି, ଅତୀତରେ ମକରବୁଡ଼ ପକାଇବା ପାଇଁ ଭୋରରୁ ମେଳଣ ପଡିଆ ନିକଟ ଅଳକା ନଦୀ ତୁଠରେ ଭିଡ଼ ଜମାଉଥିଲେ। ଏପରିକି ଜିଲାର ବିଭିନ୍ନ ଗ୍ରାମର ଲୋକେ ଶଗଡ଼ରେ ଆସୁଥିଲେ। ୨-୪ ଦିନ ରହି ଯାତ୍ରା ଉପଭୋଗ କରି ଫେରି ଯାଉଥିଲେ। କିନ୍ତୁ ସେ ଦିନ ଆଜି ନ ଥିଲେ ସୁଦ୍ଧା ମକର ଯାତ୍ରାର ଚମକ ରହିଛି।
