ଭଞ୍ଜନଗର,୨୬।୩(ଡି.ଏନ.ଏ)-କରୋନା ଭୂତାଣୁ ସଂକ୍ରମଣ ପ୍ରତିହତ କରିବା ଲାଗି ଗୁରୁବାର ଭଞ୍ଜନଗର ଉପଖଣ୍ଡ ପ୍ରଶାସନ ଓ କେତେକ ଗ୍ରାମବାସୀ ଆଲୋଚନା କରି ଗାଁ ପ୍ରବେଶ ପଥକୁ ସିଲ୍ କରିଛନ୍ତି। ନିହାତି ଆବଶ୍ୟକ ନ ଥିଲେ ଗାଁ ବାହାରକୁ କେହି ଯିବେ ନାହିଁ। ସେହିପରି ଅନ୍ୟ ଗ୍ରାମର ଲୋକଙ୍କୁ ମଧ୍ୟ ଗାଁରେ ପଶିବାକୁ ଅନୁମତି ଗ୍ରାମବାସୀ ଅନୁମତି ଦେବେନି ବୋଲି ନିଷ୍ପତ୍ତି ନେଇଛନ୍ତି। ଘରେ ରହିବା ପାଇଁ ପ୍ରଶାସନ ପକ୍ଷରୁ ଗ୍ରାମବାସୀଙ୍କୁ ପରାମର୍ଶ ଦିଆଯାଇଛି । ଉପଜିଲାପାଳ ରାଜେନ୍ଦ୍ର ମିଞ୍ଜଙ୍କ ଉପସ୍ଥିତିରେ ଗୁଣ୍ଠପଡ଼ା ଗ୍ରାମର ପ୍ରବେଶପଥକୁ ବନ୍ଦ କରାଯାଇଛି। ଅନ୍ୟପକ୍ଷରେ ଲକ୍ଡ଼ାଉନ୍ ଯୋଗୁ ଭଞ୍ଜନଗର ସହରର କେତେକ ଲୋକ ଖାଦ୍ୟ ଯୋଗାଡ଼ କରିପାରୁ ନ ଥିଲେ। ସେମାନଙ୍କ ପାଇଁ ଭଞ୍ଜନଗର ଏନ୍ଏସି ମାଧ୍ୟମରେ ଆହାର କେନ୍ଦ୍ର ସହାୟତାରେ ଖାଦ୍ୟ ଯୋଗାଇ ଦିଆଯାଇଛି । କଟକଣା ନ ମାନି ଘରୁ ବାହାରି ବୁଲିବା ଓ ଅନ୍ୟ କେତେକ କାରଣ ଯୋଗୁ ଗୁରୁବାର ସୁଦ୍ଧା ଭଞ୍ଜନଗର ଉପଖଣ୍ଡ ପୋଲିସ ପକ୍ଷରୁ ୨୬ଜଣଙ୍କୁ ଗିରଫ କରାଯାଇ ପରେ ସେମାନଙ୍କୁ ଥାନାରୁ ଜାମିନରେ ଛଡ଼ାଯାଇଛି । ଭଞ୍ଜନଗର ଉପଖଣ୍ଡରେ ୭,୧୭୮ ଦାଦନ ଶ୍ରମିକ ବୁଧବାର ସୁଦ୍ଧା ଘରକୁ ଫେରିଥିବା ବେଳେ ବିଦେଶରୁ ଫେରିଥିବା ୧୦୦ଜଣ ବର୍ତ୍ତମାନ ଘରେ ରହୁଛନ୍ତି । ସେମାନଙ୍କ ଉପରେ ପ୍ରଶାସନ ପକ୍ଷରୁ ସ୍ବତନ୍ତ୍ର ନଜର ରଖାଯାଇଛି ।
