ନୂଆଦିଲ୍ଲୀ,୩।୪(ପି.ଟି.): କୋଭିଡ-୧୯ ମୁକାବିଲା ପାଇଁ ଭାରତୀୟ ଅଲିମ୍ପିକ ଆସୋସିଏଶନ (ଆଇଓଏ) ୭୧ ଲକ୍ଷ ଟଙ୍କାର ପାଣ୍ଠି ସଂଗ୍ରହ କରିଛି। ସବୁ ରାଜ୍ୟର ଅନୁବନ୍ଧିତ କ୍ରୀଡ଼ା ଆସୋସିଏଶନ ଓ ଜାତୀୟ କ୍ରୀଡ଼ା ଫେଡେରେଶନ (ଏନ୍ଏସ୍ଏଫ୍) ଗୁଡିକର ଅର୍ଥ ଦାନ କରିଛନ୍ତି। ଏହାକୁ ନେଇ ଆଇଓଏ ଏହି ପରିମାଣର ଅର୍ଥ ସଂଗ୍ରହ କରିଛି।
ଆଇଓଏ ଏଥିପାଇଁ ସବୁ ଏନ୍ଏସ୍ଏଫ୍ ଓ ରାଜ୍ୟ ଆସୋସିଏଶନଗୁଡିକୁ କୃତଜ୍ଞତା ଜଣାଇଛନ୍ତି। କରୋନା ଭାଇରସ ମୁକାବିଲା ପାଇଁ ଅର୍ଥ ଆବଶ୍ୟକ ହେଉଥିବା ବେଳେ ଏନ୍ଏସ୍ଏଫ୍ ଓ ଆସୋସିଏଶନଗୁଡିକର ଅର୍ଥ ଦାନ ବେଶ୍ ମହତ୍ତ୍ୱ ରଖୁଛି ବୋଲି ଆଇଓଏ ସାଧାରଣ ସମ୍ପାଦକ ରାଜୀବ ମେହଟା କହିଛନ୍ତି। ଦେଶର ଏହି ଘଡି ସନ୍ଧି ମୁହୂର୍ତ୍ତରେ ପୂରା ଅଲିମ୍ପିକ୍ ପରିବାର ଏକାଠି ହେବା ବଡ଼ କଥା। ଏବେ ଆମକୁ ଆହୁରି ଦୃଢତାର ସହ ମୁକାବିଲା କରିବାକୁ ହେବ। ଏବେ ଆଇଓଏ ଏହି ପରିମାଣର ଅର୍ଥକୁ ପ୍ରଧାନମନ୍ତ୍ରୀଙ୍କ କେୟାର୍ସ ଫଣ୍ଡକୁ ଦାନ ଦେବ ବୋଲି କୁହାଯାଇଛି।
କରୋନା ଭାଇରସ ସଂକ୍ରମଣରେ ସାରା ବିଶ୍ୱରେ ଏପର୍ଯ୍ୟନ୍ତ ୫୩,୦୦୦ ଲୋକ ପ୍ରାଣ ହରାଇଲେଣି। କେବଳ ଭାରତରେ ୫୬ଜଣ ଲୋକ ଏହି ଭାଇରସ୍ ଦ୍ୱାରା ପ୍ରାଣ ହରାଇଛନ୍ତି ଓ ୨,୦୦୦ ଲୋକ ସଂକ୍ରମିତ ହୋଇଛନ୍ତି। ବିଭିନ୍ନ କ୍ରୀଡ଼ାବିତ୍ ଏହି ଭାଇରସ ମୁକାବିଲାରେ ସାମି ଅର୍ଥ ପ୍ରଦାନ କରିଛନ୍ତି। ସେମାନଙ୍କ ମଧ୍ୟରେ ରହିଛନ୍ତି ଭାରତୀୟ କ୍ରିକେଟ ଅଧିନାୟକ ବିରାଟ କୋହଲି, କ୍ରିକେଟ ଆଇକନ ସଚିନ ତେନ୍ଦୁଲକର, ମହିଳା ବ୍ୟାଡମିଣ୍ଟନ ତାରକା ପି.ଭି. ସିନ୍ଧୁ, ଆଥଲେଟନ ନୀରଜ ଚୋପ୍ରା ଓ ହିମା ଦାସ।
