ହାଇଦ୍ରାବାଦ,୧୨।୩ : ହାଇଦ୍ରାବାଦରେ ସିଆଇଏସଏଫର ୫୪ ତମ ସ୍ଥାପନା ଦିବସ ପରେଡରେ କେନ୍ଦ୍ର ସ୍ବରାଷ୍ଟ୍ରମନ୍ତ୍ରୀ ଅମିତ ଶାହା ଯୋଗ ଦେଇ ଦେଶରେ ଆତଙ୍କବାଦ, ମାଓବାଦ ଏବଂ ଉଗ୍ରବାଦ ବିରୋଧରେ ଶୂନ୍ୟ ସହନଶୀଳ ନୀତି ଜାରି ରହିବ ବୋଲି ରବିବାର ସୂଚନା ଦେଇଛନ୍ତି।
ସହରର ଉପକଣ୍ଠରେ ଥିବା ହାକିମପେଟରେ ଥିବା ନ୍ୟାଶନାଲ ଇଣ୍ଡଷ୍ଟ୍ରିଆଲ ସିକ୍ୟୁରିଟି ଏକାଡେମୀରେ ଆୟୋଜିତ ହୋଇଥିବା କେନ୍ଦ୍ରୀୟ ଶିଳ୍ପ ସୁରକ୍ଷା ବଳ (ସିଆଇଏସଏଫ)ର ରାଇଜିଂ ଡେ ପରେଡରେ ଅଂଶଗ୍ରହଣ କରିଥିଲେ।
କାର୍ଯ୍ୟକ୍ରମରେ ପରେଡରେ ଅଭିବାଦନ ଗ୍ରହଣ କରି ସେ କହିଥିଲେ ଆତଙ୍କବାଦ ପ୍ରତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ସରକାରଙ୍କ ଶୂନ୍ୟ ସହନଶୀଳତା ନୀତି ଆଗାମୀ ଦିନରେ ମଧ୍ୟ ଜାରି ରହିବ। ଏଥିସହ ଦେଶର ଯେକୌଣସି ଅଞ୍ଚଳରେ ବିଚ୍ଛିନ୍ନତାବାଦ, ଆତଙ୍କବାଦ ଏବଂ ଜାତୀୟ ବିରୋଧୀ କାର୍ଯ୍ୟକଳାପ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ।
ପ୍ରଧାନମନ୍ତ୍ରୀ ପାଞ୍ଚ ଟ୍ରିଲିୟନ ଡଲାର ଅର୍ଥନୀତି ସୃଷ୍ଟି କରିବାର ଲକ୍ଷ୍ୟ ରଖିଛନ୍ତି। ସେଥିପାଇଁ ବନ୍ଦର, ବିମାନବନ୍ଦର ଇତ୍ୟାଦିର ସୁରକ୍ଷା ଅତ୍ୟନ୍ତ ଗୁରୁତ୍ୱପୂର୍ଣ୍ଣ। ଗତ ୫୩ ବର୍ଷ ଧରି ସିଆଇଏସଏଫ ଏହି କାର୍ଯ୍ୟ ବହୁତ ଭଲ ଭାବେ ସମ୍ପାଦନ କରୁଛି ।
ସମସ୍ତ ପ୍ରଯୁକ୍ତିବିଦ୍ୟା ସାହାଯ୍ୟରେ ଆଗାମୀ ଦିନରେ ସିଏସଏଫ ଆଧୁନିକୀକରଣ ହେବ ବୋଲି ଶାହା କହିଛନ୍ତି। ଅନେକ ସିଆଇଏସଏଫ ଯବାନ ଡ୍ୟୁଟି ଲାଇନରେ ନିଜ ଜୀବନ ଦେଇଛନ୍ତି। ସିଆଇଏସଏଫ ଯୋଗୁଁ ମାଓବାଦ ଏବଂ ଆତଙ୍କବାଦ ନିୟନ୍ତ୍ରଣରେ ରହିଛି।
