କେନ୍ଦୁଝର,୧୩ା୧୦(ସ୍ବ.ପ୍ର.): କେନ୍ଦୁଝର ସହର ଦେଇ ଯାଇଥିବା ଜାତୀୟ ରାଜପଥ ୪୯ର ଅନେକ ସ୍ଥାନରେ ରାସ୍ତା ମଝିରେ ହୋଇଥିବା ବୃକ୍ଷରୋପଣ (ମେଡିଆନରେ ଗଛ) ଉପଯୁକ୍ତ ରକ୍ଷଣାବେକ୍ଷଣ ଅଭାବରୁ ମରି ଯାଇଛି। ତେବେ ବର୍ଷେ ନ ପୂରୁଣୁ ଏଭଳି ଗଛ ଶୂନ ହୋଇଯିବା ସମସ୍ତଙ୍କୁ ଚକିତ କରିଛି। ଫଳରେ ଲକ୍ଷଲକ୍ଷ ଟଙ୍କା ବ୍ୟୟରେ ଲଗାଯାଇଥିବା ଚାରା ପାଣିରେ ପଡ଼ିଯାଇଛି। ସେହିପରି ରାସ୍ତାକଡ଼ରେ ଲାଗିଥିବା ଗଛ ବହୁ ସ୍ଥାନରେ ନଷ୍ଟ ହୋଇଯାଇଥିଲେ ହେଁ ପୁଣି ଥରେ ବୃକ୍ଷରୋପଣ କରାଯାଇନାହିଁ।
ପ୍ରକାଶ ଯେ, କେନ୍ଦୁଝର ଦେଇ ଯାଇଥିବା ରାଜପଥ ମେଡିଆନ୍ରେ ଓ ରାସ୍ତା ଉଭୟ ପାର୍ଶ୍ୱରେ ବିଭିନ୍ନ ପ୍ରଜାତିର ଚାରାରୋପଣ କରାଯାଇଥିଲା। ରକ୍ଷଣାବେକ୍ଷଣ ଅଭାବରୁ ବାଇପାସ୍ ରାସ୍ତା ବେଲଦାଠାରୁ ଧୃର୍ପଦା ଏବଂ ଅଞ୍ଜରଠାରୁ ଶୁଆକାଟୀ ମଧ୍ୟରେ ମେଡିଆନରେ ଗଛ ମରି ଯାଇଛି। ମେଡିଆନ୍ରେ ଗଛ ନ ଥିବାରୁ ରାତିରେ ଗାଡ଼ି ଚଳାଚଳ କରିବାରେ ସମସ୍ୟା ସୃଷ୍ଟି ହେଉଛି। ଅପରପାର୍ଶ୍ୱରୁ ଆସୁଥିବା ଗାଡ଼ି ଲାଇଟ୍ ସିଧାସଳଖ ଚାଳକଙ୍କ ଆଖିରେ ପଡୁଥିବାରୁ ଅନେକ ସମୟରେ ଦୁର୍ଘଟଣା ଘଟୁଛି। ଜାତୀୟ ରାଜପଥ ପ୍ରାଧିକରଣ ପକ୍ଷରୁ କନିଅରକୁ ବାଦ୍ ଦିଆଯାଇ ଟଗର, ବୋଗନଭିଲିଆ, କାଲଆନ୍ଧ୍ରା, ସୀତାଫଳ, ଟେକୋମି ଆଦି ବୃକ୍ଷରୋପଣ କରାଯିବାକୁ ନିଷ୍ପତ୍ତି ହୋଇଥିଲା। ମେଡିଆନ୍ ବୃକ୍ଷରୋପଣରେ ଏହି ଗଛ ସାମିଲ କରି ଲଗାଯିବାକୁ କୁହାଯାଇଥିଲେ ମଧ୍ୟ ପ୍ରକୃତ ପକ୍ଷେ ଗଛ ନ ଥିବାରୁ ଠିକାଦାରଙ୍କ କାମ ଉପରେ ସନ୍ଦେହ ସୃଷ୍ଟି ହେଉଛି। ବର୍ଷାଦିନ ସରିଥିବା ବେଳେ ମେଡିଆନରେ ମରିଥିବା ଗଛ ସ୍ଥାନରେ ନୂତନ ଗଛ ଲଗାଯାଇନାହିଁ। ବର୍ଷାଦିନ ଆରମ୍ଭରୁ ଏହା ଲଗାଯାଇଥିଲେ ଅଧିକ ଗଛ ବଞ୍ଚତ୍ଥାନ୍ତା ବୋଲି ପରିବେଶବିତ୍ ପ୍ରଦୀପ ମହାନ୍ତି କହିଛନ୍ତି। ଏହାର ତଦନ୍ତ ହେଲେ ଗଛ ଲଗାଇଥିବା ଓ ତଦାରଖ କରିଥିବା ସଂସ୍ଥାର ଦୁର୍ନୀତି ପଦାକୁ ଆସିପାରିବ ବୋଲି ଆଇନଜୀବୀ ସୁରଜ ମହାପାତ୍ର କହିଛନ୍ତି।
