ବାରିପଦା ଅଫିସ,୬ା୬: ମୟୂରଭଞ୍ଜ ଜିଲା ବେତନଟୀ ତହସିଲରେ ସିଲିଂ ଉଦବୃତ୍ତ ଜମିର ବ୍ୟାପକ ଦୁର୍ନୀତି ଘଟଣାରେ ୮ ମାସ ହେଲା ତଦନ୍ତ ସରୁନାହିଁ। ଆରଡିସିଙ୍କ ତଦନ୍ତ ନିର୍ଦ୍ଦେଶ ପରେ ବି ଆଜି ପର୍ଯ୍ୟନ୍ତ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରାଗଲାନାହିଁ। ଏ ନେଇ ନ୍ୟାୟ ଆଶାରେ ସୋମବାର ପ୍ରତାରିତ ଭୂମିହୀନ ପରିବାର ଜିଲାସ୍ତରୀୟ ମିଳିତ ଜନ ଅଭିଯୋଗ ଶୁଣାଣି ଶିବିରରେ ଜିଲାପାଳ, ଏସ୍ପିଙ୍କୁ ଭେଟି ଗୁହାରି କରିଛନ୍ତି।
ଅନୁଯାୟୀ, ବେତନଟୀ ତହସିଲ ତଥା ବୈଶିଙ୍ଗା ରାଜସ୍ବ ନିରୀକ୍ଷକ ଅଧୀନ ଦୁର୍ଗାପୁର ଗ୍ରାମର ହରିଜନ, ଆଦିବାସୀ ଓ ସାଧାରଣବର୍ଗର ଭୂମିହୀନ ହିତାଧିକାରୀ ଓଏଲଆର ସିଲିଂ ମକଦ୍ଦମା ୧୦/୧୯୭୪ମୂଳେ ସିଲିଂ ଉଦବୃତ୍ତ ଜମି ପାଇଥିଲେ। ଯାହାକି ସ୍ବତ୍ୱ ସ୍ବାର୍ଥ ଅଧିକାର ବଳରେ ମିଳିଥିବା ଜମି ଭୋଗଦଖଲ କରି ଆସୁଛନ୍ତି। ତେବେ ଉଚ୍ଚନ୍ୟାୟାଳୟର ଆଦେଶକୁ ଅବମାନନା କରି ତହସିଲଦାର ଦାୟିତ୍ୱରେ ଥିବା ଅତିରିକ୍ତ ତହସିଲଦାର ନମିତା ଧଳ ୧୯ଏକର ଜମିକୁ ବାଲେଶ୍ୱର ଜିଲା ଭୋଗରାଇ ପାଣିଷଣ୍ଢା ଗ୍ରାମର ଗୋଲାମ ଖାନ୍ଙ୍କ ପୁଅ ଜାଏଦ ଅଲ୍ଲୀଙ୍କ ନାମରେ ଏମସି (ନଂ. ୧୬୨୯/୨୦) ଆଧାରରେ ଖାତା (ନଂ. ୨୪୨/୧୬)କ୍ରମେ ରେକର୍ଡ କରିଦେଇଥିଲେ। ଯାହାକି ବିକ୍ରେତାଙ୍କ ସିଲିଂ ବହିର୍ଭୂତ ଜମିକୁ ସେମାନଙ୍କୁ ଦିଆଯାଇଛି। ଏନେଇ ୨୦୨୨ ସେପ୍ଟେମ୍ବର ୧୪ ରେ ମୟୂରଭଞ୍ଜ ଗସ୍ତରେ ଆସିଥିବା କେନ୍ଦ୍ରାଞ୍ଚଳ ରାଜସ୍ବ କମିଶନର (ଆରଡ଼ିସି)ଙ୍କ ନିକଟରେ ଭୂମିହୀନମାନେ ଅଭିଯୋଗ କରିଥିଲେ। ପରେ ଆରଡିସିଙ୍କ ନିର୍ଦ୍ଦେଶ କ୍ରମେ ଜିଲାପାଳ ବିନୀତ ଭରଦ୍ୱାଜ ଘଟଣାର ତଦନ୍ତ ଆରମ୍ଭ କରିଥିଲେ। ତହସିଲଦାର ଦାୟିତ୍ୱରେ ଥିବା ବିବାଦୀୟ ଅତିରିକ୍ତ ତହସିଲଦାର ନମିତା ଧଳଙ୍କ ଉପରେ ଅସନ୍ତୋଷ ପ୍ରକାଶ କରିଥିଲେ । ଦାୟିତ୍ୱ ହୀନତା ପାଇଁ ତହସିଲଦାର ଦାୟିତ୍ୱ ଅପସାରଣ କରାଯାଇ ସ୍ଥାୟୀ ତହସିଲଦାର ନିଯୁକ୍ତି ପର୍ଯ୍ୟନ୍ତ ବାରିପଦା ତହସିଲଦାର ବିକ୍ରମ କିଶୋର ପରିଡ଼ାଙ୍କୁ ଅତିରିକ୍ତ ଦାୟିତ୍ୱ ପ୍ରଦାନ କରିଥିଲେ। ବେତନଟୀ ତହସିଲରେ ଦାୟିତ୍ୱ ଗ୍ରହଣ କରି ସେ ଘଟଣାର ତଦନ୍ତ ଆରମ୍ଭ କରିଥିଲେ। ମାତ୍ର ପରବର୍ତ୍ତୀ ସମୟରେ ନୂତନ ତହସିଲଦାର ଭାବେ ଅନିତା ନାୟକ ୨୦୨୨ ଅକ୍ଟୋବର ୨୧ ରେ ଦାୟିତ୍ୱ ଗ୍ରହଣ କରିବା ପରଠାରୁ ଘଟଣାର ତଦନ୍ତ ଆଗକୁ ବଢୁନି। ଆଜିକୁ ୮ମାସରୁ ଅଧିକ ସମୟ ବିତିଥିଲେ ହେଁ ତଦନ୍ତ ସରୁନାହିଁ। ଫଳରେ ଭୂମିହୀନ ପରିବାର ନ୍ୟାୟ ପାଇବାରୁ ବଞ୍ଚତ୍ତ ରହିଛନ୍ତି। ବାରମ୍ବାର ପ୍ରତାରିତ ଭୂମିହୀନ ପରିବାର ତଦନ୍ତ ସମ୍ବନ୍ଧରେ ଜାଣିବା ପାଇଁ ତହସିଲ କାର୍ଯ୍ୟାଳୟକୁ ଗଲେ ଦୁର୍ବ୍ୟବହାର କରାଯାଉଥିବା ଜିଲାପାଳ ଓ ଏସ୍ପିଙ୍କୁ କହିଛନ୍ତି।
