କେନ୍ଦୁଝର,୧୯ା୧(ସ୍ବ.ପ୍ର.): ବାରମ୍ବାର ଗୁହାରୀ ସତ୍ତ୍ୱେ ଗାଁର ସମସ୍ୟା ସୁଧୁରିଲାନି। ନେତାଙ୍କଠାରୁ ପ୍ରଶାସନିକ ଅଧିକାରୀଙ୍କ ପର୍ଯ୍ୟନ୍ତ କେହି ଏଥିପ୍ରତି ଗୁରୁତ୍ୱ ଦେଲେନି। ଶେଷରେ ନିରୁପାୟ ହୋଇ ଜଣେ ସଚେତନଶୀଳ ଯୁବତୀ ସମସ୍ୟା ସୁଧାରିବାକୁ ଅଣ୍ଟା ଭିଡ଼ିଛନ୍ତି। ମଙ୍ଗଳବାର ସକାଳେ ଜିଲାପାଳଙ୍କ କାର୍ଯ୍ୟାଳୟ ସମ୍ମୁଖ ରାସ୍ତା ଉପରେ ଧାରଣାରେ ବସି ସମସ୍ୟା ସମାଧାନ ପାଇଁ ସେ ଅଡ଼ି ବସିଥିଲେ। ଗାଁ ପ୍ରତି ତାଙ୍କ ଭଲ ପାଇବା ଦେଖି ଜିଲାପାଳ ଆଶିଷ ଠାକ୍ରେ ତୁରନ୍ତ ପଦକ୍ଷେପ ନେବେ ବୋଲି ପ୍ରତିଶ୍ରୁତି ଦେବା ପରେ ସେ ଧାରଣାରୁ ଉଠିଥିବା ଜଣାପଡ଼ିଛି। ମା’ବାପାଙ୍କୁ ହରାଇ ଏକାକୀ ଜୀବନ କାଟୁଥିବା ଏହି ଯୁବତୀ ଜଣକ ହେଲେ ଜାନକୀ ନାୟକ। ତାଙ୍କ ଘର କେନ୍ଦୁଝର ଜିଲା ସାହାରପଡ଼ା ବ୍ଲକ ବଡବିଲ ପଞ୍ଚାୟତ ଅଧୀନ ଟଭାସରୁଆ ଗ୍ରାମ ତଳ ସାହିରେ। ଗତ କିଛି ବର୍ଷ ହେଲା ଗାଁ ସମସ୍ୟା ନେଇ ସେ ଏହିଭଳି ସ୍ବର ଉତ୍ତୋଳନ କରି ସମସ୍ତଙ୍କର ପ୍ରିୟଭାଜନ ହୋଇପାରିଛନ୍ତି।
ଜାନକୀଙ୍କ ଅଭିଯୋଗ ଅନୁଯାୟୀ, ତାଙ୍କ ସାହିରେ ୮ ଗରିବ ପରିବାର ରହୁଛନ୍ତି। ସାହିରେ ପାନୀୟ ଜଳ ସମସ୍ୟା ସାଙ୍ଗକୁ ବିଦ୍ୟୁତ୍ ସମସ୍ୟା ରହିଥିଲେ ହେଁ ସମାଧାନ ହେଉନାହିଁ। ସାହିକୁ ସବୁଦିନିଆ ରାସ୍ତାଟିଏ ମଧ୍ୟ ନାହିଁ। ପାଣି ସୁବିଧା ନ ଥିବାରୁ ଲୋକେ ପାଖ ଖଜୁରିଡିହା ନାଳରୁ ପାଣି ବ୍ୟବହାର କରିବାକୁ ବାଧ୍ୟ ହେଉଛନ୍ତି। ଗତ ବର୍ଷ ଉକ୍ତ ଗ୍ରାମରେ ଥିବା ସୋଲାର ପାଣି ଟାଙ୍କିରେ ଜଣେ ଅଣଆଦିବାସୀ ମଳତ୍ୟାଗ କରିଦେବାରୁ ସାହିର ଲୋକେ ଅକଥନୀୟ ସମସ୍ୟା ଭୋଗିଥିଲେ। ଏନେଇ ସେ ଥାନାରେ ଲିଖିତ ଅଭିଯୋଗ ମଧ୍ୟ କରିଥିଲେ। ଯାହାକୁ ନେଇ ବିବାଦ ଦେଖାଦେଇଥିଲା। ପରେ ମଳତ୍ୟାଗ କରିଥିବା ଉକ୍ତ ବ୍ୟକ୍ତି ଜଣକ ଚୁକ୍ତିନାମା ଲେଖି ଉକ୍ତ ସ୍ଥାନ ସଫା କରିବା ସହ ଜରିମାନା ଦେଇଥିଲେ ବୋଲି ଜାନକୀ କହିଛନ୍ତିି। ଅନାଥ ଜାନକୀ ବାଡ଼ିବଗିଚା କାମ କରି ଚଳନ୍ତି। ତେବେ ଗାଁ ଲୋକଙ୍କ ହିତ ପାଇଁ ସେ ଏହିଭଳି ପ୍ରୟାସ ଜାରି ରଖିବେ ବୋଲି କହିଛନ୍ତି।
