ଡୁଙ୍ଗୁରିପାଲି,୮।୭(ଦୀନବନ୍ଧୁ ସୁନା): ସୁବର୍ଣ୍ଣପୁର ଜିଲା ଡୁଙ୍ଗୁରିପାଲି ବ୍ଲକ ଅନ୍ତର୍ଗତ ଦିଗଶିରା ଗ୍ରାମର ଜଣେ ଯୁବକ ୨୦ ଜଣ ମହିଳା ଅର୍ଥ ଲଗାଣକାରୀ ସଂସ୍ଥାରୁ ପାଇଥିବା ଗ୍ରୁପ ଟଙ୍କା ନେଇ ଫେରାର ହୋଇ ଯାଇଛନ୍ତି। ଏନେଇ ମହିଳାମାନେ ଡୁଙ୍ଗୁରିପାଲି ଥାନାରେ ଶୁକ୍ରବାର ଅଭିଯୋଗ କରିଛନ୍ତି। ମିଳିଥିବା ସୂଚନା ଅନୁଯାୟୀ, ଦିଗଶିରା ଗ୍ରାମର ସ୍ବୟଂ ସହାୟକ ଗୋଷ୍ଠୀର ମହିଳାମାନଙ୍କୁ ସମ୍ପୃକ୍ତ ଯୁବକ ଜଣକ ବିଭିନ୍ନ ଅର୍ଥ ଲଗାଣକାରୀ ସଂସ୍ଥାରୁ ଋଣ କରି ଦେବାରେ ସହଯୋଗ କରିବାକୁ କହି ଆବଶ୍ୟକ କାଗଜପତ୍ର ଦାଖଲ କରିଥିଲେ। ଜଣ ପିଛା ପ୍ରାୟ ୪୫ ହଜାରରୁ ୫୦ ହଜାର ଟଙ୍କା ଯାଏ ଋଣ ମଞ୍ଜୁର ହୋଇଥିଲା। କିନ୍ତୁ ପରବର୍ତ୍ତୀ ସମୟରେ ସମ୍ପୃକ୍ତ ଯୁବକ ବିଭିନ୍ନ ପ୍ରଲୋଭନ ଦେଖାଇ ସମସ୍ତଙ୍କ ଠାରୁ ଋଣ କରିଥିବା ଲକ୍ଷାଧିକ ଟଙ୍କା ନେଇ ଯାଇଥିଲେ। ୩ କିସ୍ତିରେ ଉକ୍ତ ଋଣ ପରିଶୋଧ କରିବାକୁ ଯୁବକ ଜଣକ କହିଥିଲେ। ପ୍ରାୟ ୪-୫ ମାସ ପର୍ଯ୍ୟନ୍ତ ଋଣ ନେଇଥିବା ଟଙ୍କା ଅଳ୍ପ କିଛି ପରିଶୋଧ କରି ସାରିବା ପରେ ଅବଶିଷ୍ଟ ଟଙ୍କା ଆତ୍ମସାତ କରିବା ଉଦ୍ଦେଶ୍ୟରେ ଗଁାରୁ କେଉଁଆଡେ ଚାଲିଯାଇଥିବା ମହିଳାମାନେ ଥାନାରେ ଅଭିଯୋଗ କରିଛନ୍ତି। ମହିଳାମାନେ ଅଭିଯୋଗରେ ଆହୁରି ଦର୍ଶାଇଛନ୍ତି ଯେ, ସମ୍ପୃକ୍ତ ବ୍ୟାଙ୍କ କର୍ମଚାରୀମାନେ ଆମ ଘର ଆଗକୁ ଆସି ଟଙ୍କା ପରିଶୋଧ କରିବାକୁ ବାଧ୍ୟ କରୁଛନ୍ତି। ଯଦ୍ୱାରା ମାନସିକ ଚିନ୍ତା ବଢୁଛି। ଏଣୁ ଋଣ ଟଙ୍କା ଆତ୍ମସାତ କରିବା ଉଦ୍ଦେଶ୍ୟରେ ଉଠାଣ କରିଥିବା ଯୁବକଙ୍କ ବିରୋଧରେ ଦୃଢ କାର୍ଯ୍ୟାନୁଷ୍ଠାନ ଗ୍ରହଣ କରିବା ପାଇଁ ମହିଳାମାନେ ନିବେଦନ କରିଛନ୍ତି। ଏ ନେଇ ମହିଳାମାନେ ଡୁଙ୍ଗୁରିପାଲି ଥାନା ଅଧିକାରୀ ସତ୍ୟ ନାରାୟଣ ପଧାନଙ୍କୁ ଏକ ଅଭିଯୋଗପତ୍ର ଦେଖିଛନ୍ତି। ଅଭିଯୋଗପତ୍ର ଦେବା ସମୟରେ ବାସନ୍ତୀ ବାରିକ, ରଜନୀ ନାଏକ, ଇନ୍ଦୁମତି ଦଣ୍ଡସେନା, ସବିତା ସାହୁ, ସଞ୍ଜୁ ବକୁଳ, ଗପ ପୁଟେଲ, ଫଟୁ ପୁଟେଲ, ରେଖା କଲେତ, କବିତା ଷାଣ୍ଢ , ରିନା ସାହୁ, ତୁଳା ସାହୁ, ସୁଜାତା ଦଣ୍ଡସେନା, ବାସନ୍ତୀ କିସାନ, ଅନୁ ଦଣ୍ଡସେନା, ପଙ୍କଜନୀ ଦଣ୍ଡସେନା, ସାନ୍ତରା ଡୁଙ୍ଗୁରୀ, ଛୁଆ ନନୀ ପୁଟେଲ ପ୍ରମୁଖ ଉପସ୍ଥିତ ଥିଲେ।
