କୋରାପୁଟ,୧୧ା୭(ଅମିତାଭ ବେହେରା)-କୋରାପୁଟ ଶାବର ଶ୍ରୀକ୍ଷେତ୍ରରେ ସ୍ନାନ ପୂର୍ଣ୍ଣିମା ପରେ ଶ୍ରୀଜୀଉମାନେ ଅଣସର ଘରେ ବିରାଜମାନ ମନ୍ଦିର ସମ୍ମୁଖରେ ପଟ୍ଟଦିଅଁଙ୍କୁ ନୀତି ଅନୁଯାୟୀ ପୂଜାର୍ଚ୍ଚନା କରାଯାଉଛି।
ଅଣସର ଘରେ ଶ୍ରୀଜୀଉମାନେ ଅସୁସ୍ଥ ରହିଥିବାରୁ ବୈଦ୍ୟ ରାମାନାଥ ଗେମେଲଙ୍କ ଦ୍ୱାରା ଉପଚାର କରାଯାଉଛି। ଦୈନିକ ଶାବର ଶ୍ରୀକ୍ଷେତ୍ରକୁ ଆସୁଥିବା ଶତାଧିକ ଭକ୍ତ ପଟ୍ଟଦିଅଁଙ୍କ ଦର୍ଶନ କରୁଛନ୍ତି।
ଦୈନିକ ସକାଳ ଓ ସନ୍ଧ୍ୟାରେ ପଟ୍ଟଦିଅଁଙ୍କ ନିକଟରେ ଧୂପ, ଦୀପ, ନୈବେଦ୍ୟ ଓ ଭୋଗ ଲାଗି କରାଯାଉଛି। ମନ୍ଦିରରେ ଅଣସର ନୀତି ପରମ୍ପରା ଅନୁଯାୟୀ ସମ୍ପନ୍ନ କରାଯାଉଛି। ୧୪ ତାରିଖରେ ଚତୁର୍ଦ୍ଧାମୂର୍ତ୍ତିଙ୍କ ନବଯୌବନ ଦର୍ଶନ ହେବ। ୧୬ ତାରିଖରେ ରଥଯାତ୍ରା ଅନୁଷ୍ଠିତ ହେବ ବୋଲି ଶାବର ଶ୍ରୀକ୍ଷେତ୍ର ମନ୍ଦିର ପରିଚାଳନା କମିଟି ପକ୍ଷରୁ କୁହାଯାଇଛି।
