କୁଜଙ୍ଗ,୩ା୬ (ଡି.ଏନ୍.ଏ.): କୁଜଙ୍ଗ ବ୍ଲକ କୁଜଙ୍ଗ ପଞ୍ଚାୟତ ଅନ୍ତର୍ଗତ ନବାଡ଼ିଆ ଗ୍ରାମରେ ବିଭାଗୀୟ ଅବହେଳା ଓ ଖାମଖିଆଲ ନୀତି ଯୋଗୁ ୬ ଦିନ ୫ ଶହ ଅଧିବାସୀ ପାନୀୟ ଜଳ ପାଇଁ ଅସୁବିଧାର ସମ୍ମୁଖୀନ ହେଉଥିଲେ। ପ୍ରତିବାଦରେ ଶୁକ୍ରବାର ମହିଳାମାନେ ଗରା ଓ ବାଲତି ଧରି ରାସ୍ତା ଅବରୋଧ କରିଥିଲେ।
ସେମାନଙ୍କ ଅଭିଯୋଗ ଅନୁଯାୟୀ, ନବାଡ଼ିଆ ଗ୍ରାମରେ ମଧୁର ଜଳସ୍ତର ନାହିଁ। ଅତୀତରେ ସେମାନେ ବିଭିନ୍ନ କାର୍ଯ୍ୟରେ ପୋଖରୀ ଜଳ ବ୍ୟବହାର କରୁଥିଲେ। ସେହିପରି ପାନୀୟ ଜଳ ପାଇଁ ନିକଟସ୍ଥ ବାଗୋଇ ଗ୍ରାମ ସୀମା ଏକ କୂଅକୁ ବ୍ୟବହାର କରୁଥିଲେ। ସମୟ କ୍ରମେ ସମସ୍ତ ଜଳସ୍ତର ଲୌହଯୁକ୍ତ ଓ ଲବଣାକ୍ତ ହୋଇଗଲା। ପରବର୍ତ୍ତୀ ସମୟରେ ସରକାର ଉକ୍ତ ଗାଁକୁ ପାଇପ୍ ଯୋଗେ ପାନୀୟ ଜଳ ଯୋଗାଇ ଦେଇଆସୁଛନ୍ତି। ବର୍ତ୍ତମାନ ଗ୍ରାମ୍ୟ ଉନ୍ନୟନ ବିଭାଗ ଦ୍ୱାରା କୁଜଙ୍ଗ ଚଟୁଆ ରାସ୍ତାର ସମ୍ପ୍ରସାରଣ କାର୍ଯ୍ୟ ଚାଲୁ ରହିଛି। ରାସ୍ତା ପାର୍ଶ୍ୱରୁ ମାଟି ଖୋଳା ଯାଉଥିବା ସମୟରେ ଗତ ରବିବାର ଜେସିବି ଦ୍ୱାରା ପାଇପ୍ ଫାଟିଯିବାରୁ ଜଳ ଯୋଗାଣ ବ୍ୟାହତ ହୋଇଥିଲା। ଗ୍ରାମ୍ୟ ଜଳ ଯୋଗାଣ ବିଭାଗୀୟ ଯନ୍ତ୍ରୀ ରାସ୍ତା କାମ ନେଇଥିବା ଠିକାଦାରଙ୍କୁ ମରାମତି କରିବାକୁ କହିଥିଲେ। ମାତ୍ର ଏପର୍ଯ୍ୟନ୍ତ ମରାମତି ହୋଇନାହିଁ। ପ୍ରତିବାଦରେ ଶୁକ୍ରବାର ସକାଳୁ ଗ୍ରାମର ମହିଳାମାନେ କୁଜଙ୍ଗ-ଚଟୁଆ ରାସ୍ତା ଅବରୋଧ କରିଥିଲେ। ଖବରପାଇ କୁଜଙ୍ଗ ସରପଞ୍ଚ ବନ୍ଦିତା ଦାସ ଅବରୋଧ ସ୍ଥଳରେ ପହଞ୍ଚତ୍ ମହିଳାମାନଙ୍କୁ ବୁଝାଶୁଝା କରିବା ପରେ ରାସ୍ତାରୋକୋ ହଟିଛି। ସେ ତୁରନ୍ତ ପାଇପ୍ ମରାମତି ଲାଗି ପଦକ୍ଷେପ ନେବାକୁ ବିଭାଗୀୟ ଯନ୍ତ୍ରୀଙ୍କୁ କହିଥିଲେ। ଏଥିସହ ତତ୍କ୍ଷଣାତ୍ ଟ୍ୟାଙ୍କର ଯୋଗେ ପାଣି ଯୋଗାଇ ଦେବାପାଇଁ ଅନୁରୋଧ କରିଥିଲେ। ଏହାପରେ ଟ୍ୟାଙ୍କରରେ ପାଣି ଯୋଗାଇ ଦିଆଯାଇଥିବା ବେଳେ ସନ୍ଧ୍ୟା ସୁଦ୍ଧା ଫାଟିଯାଇଥିବା ପାଇପ୍ ମରାମତି ହୋଇଯାଇଛି।
