ଖପ୍ରାଖୋଲ/ପାଟଣାଗଡ଼, ୨୦ା୬(ଅଭୟ ତ୍ରିପାଠୀ/ପ୍ରହଲ୍ଲାଦ ପାଢୀ): ବଲାଙ୍ଗୀର ଜିଲା ଖପ୍ରାଖୋଲ ଥାନା ଅନ୍ତର୍ଗତ ପୁତୁଲାମହୁଲ ଗାଁର ଜଣେ ବ୍ୟକ୍ତି ତାଙ୍କ ସ୍ତ୍ରୀଙ୍କୁ ହତ୍ୟା କରିବା ପରେ ସମ୍ପର୍କୀୟଙ୍କ ସହ ମିଶି ପୋଡ଼ି ଦେଇଥିବା ଅଭିଯୋଗ ହୋଇଛି। ମୃତା ମହିଳା ହେଲେ ଚୂଳବତୀ ସାହୁ (୨୮)। ଏହି ଘଟଣାରେ ପୋଲିସ ମହିଳାଙ୍କ ସ୍ବାମୀ ତେଜରାଜ ସାହୁ(୩୦), ଦେଡ଼ଶୁର ଟିକେଲାଲ ସାହୁ (୩୫)ଓ ମଉସା ଗୁଣନିଧି ସାହୁ(୪୫)ଙ୍କୁ ଗିରଫ କରି ସୋମବାର କୋର୍ଟ ଚାଲାଣ କରିଛି। ଏନେଇ ଖପ୍ରାଖୋଲ ଥାନାରେ ଦଫା ୪୯୮(କ), ୩୦୨, ୨୦୧ ଓ ୩୪ ଆଇପିସି ଏବଂ ଅନୁସୂଚିତ ଜାତି ଜନଜାତି ନିର୍ଯାତନା ନିରୋଧ ଆଇନରେ ଏକ ମାମଲା(୯୫/୨୩) ରୁଜୁ କରି ତିନି ଅଭିଯୁକ୍ତଙ୍କୁ କୋର୍ଟ ଚାଲାଣ କରାଯାଇଛି।
ସୂଚନା ଅନୁସାରେ, ଗତ ୧୭ତାରିଖରେ ତେଜରାଜ ତାଙ୍କ ସ୍ତ୍ରୀ ଚୂଳବତୀଙ୍କ ଘରୁ ନିଖୋଜ ଥିବା ନେଇ ଶ୍ୱଶୁର ଘର ଲୋକଙ୍କୁ ଜଣାଇଥିଲେ। ଏଥିରେ ସନ୍ଦେହ ପ୍ରକାଶ କରି ତାଙ୍କ ଶ୍ୱଶୁର ଖପ୍ରାଖୋଲ ଥାନା କିନ୍ଦ୍ରିଟାଲ ଗାଁର ଶ୍ରୀପତି ଭୋଇ ଏ ନେଇ ଥାନାରେ ଝିଅ ନିରୁଦ୍ଦିିଷ୍ଟ ଥିବା ନେଇ ଅଭିଯୋଗ କରିଥିଲେ। ଏପରିକି ଜ୍ବାଇଁ ଓ ତାଙ୍କ ପରିବାର ଲୋକେ ଝିଅକୁ ହତ୍ୟା କରିଥାଇପାରନ୍ତି ବୋଲି ପୋଲିସକୁ ଜଣାଇଥିଲେ। ଅଭିଯୋଗକୁ ଭିତ୍ତିକରି ଖପ୍ରାଖୋଲ ଥାନା ଦାୟିତ୍ୱରେ ଥିବା ଲାଠୋର ଥାନା ଅଧିକାରୀ ଝସକେତନ ଭୋଇଙ୍କ ନେତୃତ୍ୱରେ ଏକ ଟିମ୍ ପୁତୁଲାମହୁଲ ଗାଁକୁ ଯାଇ ତଦନ୍ତ କରିଥିଲେ। ତଦନ୍ତ ସମୟରେ ସେମାନେ ଜାଣିବାକୁ ପାଇଥିଲେ ଯେ, ଚୂଳବତୀଙ୍କୁ ତାଙ୍କ ସ୍ବାମୀ ତେଜରାଜ କୌଣସି କାରଣରୁ ହତ୍ୟା କରିବା ପରେ ମୃତଦେହକୁ ଏକ ଅଖାରେ ପୂରାଇ ଦେଇଥିଲେ। ରାତିରେ ଗାଁଠୁ ଦୂର ଏକ ନାଳରେ ପେଟ୍ରୋଲ ଓ ଟାୟାର ପକାଇ ପୋଡ଼ିଦେଇଥିଲେ। ପରେ ପୋଡାଅଂଶକୁ ପାଣିରେ ଫୋପାଡି ଦେଇଥିବା ଜାଣିବାକୁ ପାଇଥିଲେ। ସ୍ବାମୀ ତେଜରାଜ, ଦେଢଶୁର ଟିକେଲାଲ ଓ ମଉସା ଗୁଣନିଧିଙ୍କୁ ଥାନାକୁ ଡାକି ପଚରାଉଚରା ପରେ ସବୁ କଥା ସାମ୍ନାକୁ ଆସିଥିଲା ବୋଲି ପାଟଣାଗଡ ଉପଖଣ୍ଡ ପୋଲିସ ଅଧିକାରୀ ଜ୍ୟୋତିର୍ମୟ ଭୁକ୍ତା ପାଟଣାଗଡ ଥାନାରେ ସୋମବାର ଏକ ଖବରଦାତା ସମ୍ମିଳନୀ କରି ସୂଚନା ଦେଇଛନ୍ତି।
ସୂଚନା ଅନୁସାରେ, ଚୂଳବତୀ ଓ ତେଜରାଜ ନିଜ ନିଜ ପରିବାର ସହ ୮ ବର୍ଷ ତଳେ ଆନ୍ଧ୍ରପ୍ରଦେଶକୁ ଦାଦନ ଖଟିବାକୁ ଯାଇଥିଲେ। ସେଠାରେ ଉଭୟଙ୍କ ମଧ୍ୟରେ ପ୍ରେମ ସମ୍ପର୍କ ଗଢି ଉଠିଥିଲା। ପରେ ସେଠାରୁ ଉଭୟେ ଫେରାର ହୋଇ ବରଗଡ଼ ଅଞ୍ଚଳରେ ରହିଥିଲେ। ପରେ ଉଭୟ ପରିବାରର ସହମତିରେ ନିଜ ଗାଁ ପୁତୁଲାମହୁଲ ଗାଁରେ ରହିଥିଲେ। ସେମାନଙ୍କର ଏକ ୪ ବର୍ଷର ଝିଅ ଅଛି।
