ନୂଆଦିଲ୍ଲୀ,୨୩।୯ : UPI ପେମେଣ୍ଟକୁ ନେଇ ଆସିଛି ନୂଆ ନିୟମ । ଅକ୍ଟୋବର ୧୫, ୨୦୨୬ରୁ ୨ ହଜାର ଟଙ୍କାରୁ ଅଧିକ କିଛି UPI ଟ୍ରାଞ୍ଜାକ୍ସନରେ ୦.୪ ପ୍ରତିଶତ ଚାର୍ଜ ଲାଗିବ । ଏହାକୁ ମର୍ଚ୍ଚାଣ୍ଟ ଡିସକାଉଣ୍ଟ ରେଟ୍ ବା MDR କୁହାଯାଉଛି । ତେବେ ଏହି ଚାର୍ଜ ସମସ୍ତ UPI ପେମେଣ୍ଟରେ ଲାଗୁ ହେବ ନାହିଁ। ସବୁଠାରୁ ବଡ଼ କଥା ହେଉଛି, ଏହି ଚାର୍ଜ ଗ୍ରାହକଙ୍କଠାରୁ ଆଦାୟ କରାଯିବ ନାହିଁ। ଚାର୍ଜ ଦୋକାନୀ ବା ମର୍ଚ୍ଚାଣ୍ଟଙ୍କୁ ଦେବାକୁ ପଡ଼ିବ । ନ୍ୟାସନାଲ ପେମେଣ୍ଟ୍ସ କର୍ପୋରେସନ୍ ଅଫ୍ ଇଣ୍ଡିଆ (NPCI) ପକ୍ଷରୁ କୁହାଯାଇଛି ଯେ, ନୂଆ MDR ଲାଗୁ ହେଲେ ମଧ୍ୟ UPI ପେମେଣ୍ଟର ଖର୍ଚ୍ଚ ଡେବିଟ୍ କିମ୍ବା କ୍ରେଡିଟ୍ କାର୍ଡ ପେମେଣ୍ଟ ତୁଳନାରେ କମ୍ ରହିବ।
୨ ହଜାର ଟଙ୍କା ପର୍ଯ୍ୟନ୍ତ P2M UPI ଟ୍ରାଞ୍ଜାକ୍ସନରେ MDR ଶୂନ ରହିବ । NPCI ଅନୁସାରେ, ଏହି ବର୍ଗରେ ପ୍ରାୟ ୯୬ ପ୍ରତିଶତ UPI ଟ୍ରାଞ୍ଜାକ୍ସନ ରହିଛି । ଅର୍ଥାତ୍ ଦୈନନ୍ଦିନ ଛୋଟ ଛୋଟ UPI ପେମେଣ୍ଟରେ ଗ୍ରାହକଙ୍କ ଉପରେ କୌଣସି ନୂଆ ଚାର୍ଜ ପଡ଼ିବ ନାହିଁ । ୨ ହଜାର ଟଙ୍କାରୁ ଅଧିକ ଯୋଗ୍ୟ UPI ଟ୍ରାଞ୍ଜାକ୍ସନରେ ୦.୪ ପ୍ରତିଶତ MDR ଧାର୍ଯ୍ୟ କରାଯାଇଛି । ତେବେ ଏହି ଚାର୍ଜର ସର୍ବାଧିକ ସୀମା ୩୦୦ ଟଙ୍କା ରହିବ ।
ଛୋଟ ବ୍ୟବସାୟୀ, ରାସ୍ତାକଡ଼ ଦୋକାନୀ ଓ ଅନ୍ୟ ଯୋଗ୍ୟ କ୍ଷୁଦ୍ର ମର୍ଚ୍ଚାଣ୍ଟଙ୍କ ପାଇଁ ଶୂନ MDR ବ୍ୟବସ୍ଥା ଜାରି ରହିବ । P2PM ବର୍ଗରେ UPI QR କୋଡ୍ ମାଧ୍ୟମରେ ମାସକୁ ୧ ଲକ୍ଷ ଟଙ୍କା ପର୍ଯ୍ୟନ୍ତ ଗ୍ରହଣ କରୁଥିବା ଯୋଗ୍ୟ ମର୍ଚ୍ଚାଣ୍ଟଙ୍କ ଟ୍ରାଞ୍ଜାକ୍ସନରେ ନୂଆ MDR ଲାଗୁ ହେବ ନାହିଁ। ଏପରିକି ୨ ହଜାର ଟଙ୍କାରୁ ଅଧିକ ପେମେଣ୍ଟ ହେଲେ ମଧ୍ୟ ଏହି ଛୋଟ ମର୍ଚ୍ଚାଣ୍ଟମାନେ ରିହାତି ପାଇବେ। କିଛି ଜରୁରୀ ଏବଂ କମ୍ ମାର୍ଜିନ୍ ଥିବା କ୍ଷେତ୍ର ପାଇଁ ଅଲଗା MDR ବ୍ୟବସ୍ଥା ରହିଛି। ରେଳ, ଟେଲିକମ୍, ବୀମା, ଫ୍ୟୁଏଲ୍ ଏବଂ କୃଷି ସାମଗ୍ରୀ ସମ୍ବନ୍ଧୀୟ ୨ ହଜାର ଟଙ୍କାରୁ ଅଧିକ ଯୋଗ୍ୟ ଟ୍ରାଞ୍ଜାକ୍ସନରେ ୦.୪ ପ୍ରତିଶତ ବଦଳରେ ପ୍ରତି ଟ୍ରାଞ୍ଜାକ୍ସନରେ ଫ୍ଲାଟ୍ ୫ ଟଙ୍କା MDR ଲାଗିବ।
ମ୍ୟୁଚୁଆଲ୍ ଫଣ୍ଡ, ସିକ୍ୟୁରିଟିଜ୍, ଷ୍ଟକ୍ବ୍ରୋକର୍ ଓ ଡିଲର୍ ସମ୍ବନ୍ଧୀୟ କ୍ୟାପିଟାଲ୍ ମାର୍କେଟ୍ ପେମେଣ୍ଟ ପାଇଁ MDR ହାର ୦.୦୨ ପ୍ରତିଶତ ରହିବ। ଏଠାରେ ମଧ୍ୟ ସର୍ବାଧିକ ଚାର୍ଜ ୩୦୦ ଟଙ୍କା ରହିବ । ଉଦାହରଣ ସ୍ୱରୂପ, ୧୦ ହଜାର ଟଙ୍କାର ପେମେଣ୍ଟରେ MDR ମାତ୍ର ୨ ଟଙ୍କା ହେବ। ନୂଆ MDR ବ୍ୟବସ୍ଥାରେ UPI ବ୍ୟବହାର କରୁଥିବା ଗ୍ରାହକଙ୍କଠାରୁ ଏହି ଚାର୍ଜ ଆଦାୟ କରାଯିବ ନାହିଁ। ଏହା ଏକ ପେମେଣ୍ଟ ପ୍ରୋସେସିଂ ଚାର୍ଜ ଭାବେ ମର୍ଚ୍ଚାଣ୍ଟଙ୍କ ଉପରେ ଲାଗୁ ହେବ । ବ୍ୟାଙ୍କଗୁଡ଼ିକୁ ମଧ୍ୟ ଏହି ଚାର୍ଜର ବୋଝ ଗ୍ରାହକଙ୍କ ଉପରେ ନ ପକାଇବାକୁ କୁହାଯାଇଛି।
