କୁହାଯାଏ, ରାସ୍ତାରେ ଗଲା ବେଳେ ଯଦି କଳା ବିଲେଇଟିଏ ପାସ୍ କରେ ତେବେ ଭୁଲ୍ରେ ମଧ୍ୟ ସେହି ରାସ୍ତାରେ ଆଗକୁ ଯିବା ଉଚିତ୍ ନୁହଁ। ଯଦିଓ ଏହା ଏକ ଅନ୍ଧବିଶ୍ୱାସ ତଥାପି ଏହା ପଛରେ ଏକ କାରଣ ରହିଛି।
କିଛି ଲୋକ ଏହାକୁ ବିଶ୍ୱାସ କରି ଗାଡ଼ି ଅଟକାଇଥାନ୍ତି ଅଥବା ସେହି ରାସ୍ତାରେ ନ ଯାଇ ଅନ୍ୟ ବାଟ ଦେଇ ଯାଇଥାନ୍ତି। ଆଉ କିଛି ଲୋକ ଏହାକୁ ଅବିଶ୍ୱାସ ବା ଅନ୍ଧବିଶ୍ୱାସ କହି ଗାଡ଼ି ଚଳାଇ ଯାଇଥାନ୍ତି। ତେବେ ଭାରତୀୟ ସଂସ୍କୃତିରେ କଳା ରଙ୍ଗକୁ ଶନି ବୋଲି ବିବେଚନା କରାଯାଇଥାଏ। ସେହିପରି ବିଲେଇକୁ ରାହୁଙ୍କ ବାହନ ବୋଲି ବିବେଚନା କରାଯାଏ। ଏପରି ସ୍ଥିତିରେ କଳା ବିଲେଇକୁ ଦେଖିବା ଶନି ଏବଂ ରାହୁଙ୍କ କ୍ରୋଧ ବୋଲି ଧାରଣା ରହିଛି।
ପୁରାତନ କାଳରେ ଲୋକମାନଙ୍କ ପାଖରେ ଗାଡ଼ିମୋଟର ନ ଥିଲା। ବଳଦ ଗାଡ଼ି ବା ଶଗଡ଼ ହିଁ ଏକମାତ୍ର ମାଧ୍ୟମ ଥିଲା। ଶଗଡ଼ ଚାଲିବା ସମୟରେ ବିଲେଇ ଯଦି ମଝିରେ ଆସୁଥିଲା, ତେବେ ଶଗଡ଼ିଆମାନେ ଏହାକୁ ଦେଖି ଭୟଭୀତ ହୋଇ ଶଗଡ଼ ଅଟକାଇ ଦେଉଥିଲେ। ଏପରିକି ଶଗଡ଼ରେ ବସିଥିବା ଯାତ୍ରୀମାନେ ଭୟରେ ପଡ଼ିଯାଇ ଖଣ୍ଡିଆ ଖାବରା ହେଉଥିଲେ। ପରେ ଶଗଡ଼ିଆମାନେ କିଛି ସମୟ ଶଗଡ଼ ଅଟକାଇ ଦେଉଥିଲେ। ବିଲେଇ ଯିବା ପରେ ଶଗଡ଼ ପୁଣି ଗନ୍ତବ୍ୟ ପଥରେ ଆଗଉଥିଲା। ସେହି ପ୍ରଥା ଯାହାକି ଆଜି ପର୍ଯ୍ୟନ୍ତ ରହିଆସିଛି।
ଆପଣ ନିଶ୍ଚୟ ଧ୍ୟାନ ଦେଇଥିବେ ଯେତେବେଳେ ବିଲେଇମାନେ ରାସ୍ତା ଅତିକ୍ରମ କରନ୍ତି, ସେମାନେ ଏକ କୋଣରେ ଠିଆ ହୁଅନ୍ତି। ଲୋକମାନେ ଏହା ମଧ୍ୟ ବିଶ୍ୱାସ କରନ୍ତି ଯେ ବିଲେଇଠାରୁ ଦୂରରେ ରହିବା ଉଚିତ୍ କାରଣ ଏହାର ଖରାପ ପ୍ରଭାବ ମଣିଷ ଉପରେ ପଡ଼େ। କିନ୍ତୁ ଏହା ମଧ୍ୟ ଏକ ଅନ୍ଧବିଶ୍ୱାସ। ବିଲେଇମାନେ ସାଧାରଣତଃ ଅନ୍ୟ କେତେକ ପ୍ରାଣୀ କିମ୍ବା ମଣିଷ ଦେଖି ଡରିଯାଆନ୍ତି। ତେଣୁ ସେମାନେ ଭୟରେ ରାସ୍ତାରେ ଠିଆ ହୋଇଯାଆନ୍ତି। ଶାସ୍ତ୍ର ଅନୁଯାୟୀ, ବିଲେଇମାନଙ୍କୁ ମଧ୍ୟ ନକାରାତ୍ମକ ଶକ୍ତିର ପ୍ରତୀକ ଭାବରେ ବିବେଚନା କରାଯାଏ। ସେଥିପାଇଁ ବିଲେଇମାନଙ୍କୁ ଘରେ ପାଳିବା ଉଚିତ୍ ନୁହେଁ।
