ଭୁବନେଶ୍ୱର,୧୩।୯ (ବ୍ୟୁରୋ):ରାଜଧାନୀରେ ବଢ଼ୁଥିବା ନିଶା କାରବାରକୁ ରୋକିବା ପାଇଁ କମିଶନରେଟ ପୋଲିସ ୨୦୨୧ ଅଗଷ୍ଟ ୧୫ରେ ‘ହ୍ବାଇଟ୍ ସ୍ପାଇଡର’ ନାମରେ ଏକ ଅଭିଯାନ ଆରମ୍ଭ କରିଥିଲା। ଚଳିତବର୍ଷ ଜାନୁୟାରୀରୁ ଅଗଷ୍ଟ ଅର୍ଥାତ୍ ୮ ମାସ ମଧ୍ୟରେ ଏହି ଅଭିଯାନରେ ୧୦୯ ଜଣଙ୍କୁ ଗିରଫ କରାଯାଇଛି। ଭୁବନେଶ୍ୱର ଡିସିପି ଅଫିସ୍ ପକ୍ଷରୁ ସୋମବାର ଦିଆଯାଇଥିବା ରିପୋର୍ଟରୁ ଏହା ଜଣାପଡ଼ିଛି।
ଉକ୍ତ ରିପୋର୍ଟ ଅନୁଯାୟୀ, ଏହି ଅଭିଯାନରେ ଭୁବନେଶ୍ୱର ସହରାଞ୍ଚଳ ପୋଲିସ ଜିଲାର ବିଭିନ୍ନ ଥାନାରେ ବ୍ରାଉନସୁଗାର କାରବାର ସଂକ୍ରାନ୍ତ ୩୨ଟି ମାମଲା ରୁଜୁ କରାଯାଇଥିବା ବେଳେ ସମ୍ପୃକ୍ତ ୫୯ଜଣ ଅଭିଯୁକ୍ତଙ୍କୁ ଗିରଫ କରାଯାଇଛି। ଏହି ମାମଲାରେ ୧ କେଜି ୩୭ ଗ୍ରାମ ବ୍ରାଉନସୁଗର, ୪ ଲକ୍ଷ ୫୦ ହଜାର ୬୧୦ ନଗଦ ଟଙ୍କା, ୧୨ଟି ଗାଡ଼ି ଏବଂ ୩୬ ମୋବାଇଲ ଜବତ କରାଯାଇଛି। ସେହିପରି ଗଞ୍ଜେଇ କାରବାର ନେଇ ୨୭ ମାମଲା ରୁଜୁ କରାଯାଇଥିବାବେଳେ ସମ୍ପୃକ୍ତ ୫୦ ଜଣଙ୍କୁ ଗିରଫ କରାଯାଇଛି। ଏସବୁ ମାମଲାରେ ୯୮୭ କେଜି ୪୮ ଗ୍ରାମ ଗଞ୍ଜେଇ, ୩୦ ହଜାର ୭୫୦ ନଗଦ ଟଙ୍କା, ୧୫ଟି ଗାଡ଼ି ଓ ୨୩ଟି ମୋବାଇଲ ଜବତ କରାଯାଇଛି। ତେବେ ଏହି ଅଭିଯାନକୁ ଆଗକୁ ଜୋରଦାର କରାଯାଇ ନିଶା କାରବାର ବିରୋଧରେ ଦୃଢ଼ ପଦକ୍ଷେପ ନିଆଯିବ ବୋଲି ପୋଲିସ ପକ୍ଷରୁ କୁହାଯାଇଛି।
