ରିଲାଏନ୍ସ ଫାଉଣ୍ଡେଶନର ପ୍ରତିଷ୍ଠାତା ତଥା ଅଧ୍ୟକ୍ଷ ନୀତା ଅମ୍ବାନୀ ନିଜର ଫ୍ୟାଶନ୍ ଏବଂ ସଉକକୁ ନେଇ ଚର୍ଚ୍ଚାରେ ରହିଥାନ୍ତି। ତେବେ ତାଙ୍କ ବିଷୟରେ ବହୁତ କମ୍ ଲୋକ ଜାଣନ୍ତି। ସେ ବିବାହ ପୂର୍ବରୁ ଜଣେ ଶିକ୍ଷୟିତ୍ରୀ ଥିଲେ। ବିବାହ ପରେ ମଧ୍ୟ ସେ କିଛି ଦିନଯାଏ ପଢ଼ାଉଥିଲେ। ମୁକେଶ ଏହାକୁ ବିରୋଧ ମଧ୍ୟ କରୁ ନ ଥିଲେ। କାରଣ ନୀତାଙ୍କ ସବୁ ନିଷ୍ପତ୍ତିକୁ ସେ ସମ୍ମାନ ଦେଉଥିଲେ। ଏକଦା ସ୍କୁଲରେ ପଢ଼ାଉଥିବା ସମୟରେ ଏକ ଅଜବ ଘଟଣା ଘଟିଥିଲା।
ନୀତାଙ୍କ ବିବାହକୁ ୨ ବର୍ଷ ହୋଇଥାଏ। ସେତେବେଳେ ମଧ୍ୟ ସେ ସ୍କୁଲରେ ଶିକ୍ଷକତା କରୁଥିଲେ। କାରଣ ତାଙ୍କୁ ଶିକ୍ଷାଦାନ କରିବାକୁ ଭଲ ଲାଗୁଥିଲା। ଏତେ ବଡ଼ ଉଦ୍ୟୋଗପତିଙ୍କ ବୋହୁ ହୋଇଥିବା ସତ୍ତ୍ୱେ ସେ ମାତ୍ର ୮୦୦ ଟଙ୍କାରେ ଏହା କରୁଥିଲେ। ବମ୍ବେର ଯେଉଁ ନର୍ସରୀରେ ସେ ପଢ଼ାଉଥିଲେ ସେଠାରେ ଏକଦା ଜଣେ ଶିଶୁଙ୍କ ବାପା ତାଙ୍କୁ ଭେଟିବାକୁ ଚାହିଁଥିଲେ। ସେ ତାଙ୍କୁ ଏକ ଉପହାର ଦେବାକୁ ଚାହୁଁଥିଲେ।
୧୯୮୭ ମସିହାରେ ହୋଇଥିବା ରିଲାଏନ୍ସ କ୍ରିକେଟ ବିଶ୍ୱକପ୍ର ଏକ କପଲ୍ ଟିକେଟ୍ ନେଇ ସେ ନୀତାଙ୍କୁ ଦେଇଥିଲେ। ଆପଣ ଯଦି ଚାହାନ୍ତି ତେବେ ସ୍ବାମୀ ନଚେତ ଅନ୍ୟ କାହା ସହ ଯାଇ ଷ୍ଟାଡିୟମରେ ମ୍ୟାଚ୍ ଦେଖିପାରିବେ ବୋଲି ଅଭିଭାବକଜଣଙ୍କ କହିଥିଲେ। ହେଲେ ନୀତା ତାହା ନେବାକୁ ମନା କରିଦେଇଥିଲେ। ପରେ ମ୍ୟାଚ୍ରେ ନୀତାଙ୍କୁ ପ୍ରେସିଡେନ୍ସ ବକ୍ସରେ ଦେଖି ଚମକି ପଡ଼ିଥିଲେ। ଆପଣ ଏଠାରେ କ’ଣ କରୁଛନ୍ତି ବୋଲି ସେ ପ୍ରଶ୍ନ କରିଥିଲେ। ହେଲେ ନୀତା ହସି ଦେଇ ଚାଲି ଆସିଥିଲେ। ସେଠାରେ ଜଣେ ବ୍ୟକ୍ତି ସେ ମୁକେଶ ଅମ୍ବାନୀଙ୍କ ସ୍ତ୍ରୀ ଏବଂ ଧିରୁଭାଇ ଅମ୍ବାନୀଙ୍କ ବୋହୁ ବୋଲି ତାଙ୍କର ପରିଚୟ ଦେଇଥିଲେ। ଏହାକୁ ଶୁଣି ଉକ୍ତ ବ୍ୟକ୍ତି ଆଶ୍ଚର୍ଯ୍ୟ ହୋଇଥିବା ନୀତା ଏକ ସାକ୍ଷାତକାରରେ କହିଥିଲେ।
