ନୂଆଦିଲ୍ଲୀ,୮।୫: ହ୍ବାଟ୍ସଆପ୍ ଏହାର ନୂଆ ପ୍ରିଭେସି ନିୟମକୁ ନେଇ କୋହଳ ମନୋଭାବ ପୋଷଣ କରିଛି। ନୂଆ ନିୟମ ନ ମାନିଲେ ବି ବର୍ତ୍ତମାନ ୟୁଜରଙ୍କ ଆକାଉଣ୍ଟ ଡିଲିଟ ହେବ ନାହିଁ। ଏହାଦ୍ୱାରା ୟୁଜରଙ୍କୁ ଏକ ପ୍ରକାର ଆଶ୍ୱସ୍ତି ମିଳିଛି। କମ୍ପାନୀର ଏହି ନିୟମ ବହୁ ବିବାଦୀୟ ହୋଇ ପଡିଥିଲା। ଏହା ପାଳନ ନ କଲେ ୟୁଜରଙ୍କ ଆକାଉଣ୍ଟ ଡିଲିଟ ହୋଇଯିବ ବୋଲି କମ୍ପାନୀ କହିବା ପରେ ଏହାକୁ ନେଇ ଅନେକ ଲୋକ ଆଶଙ୍କାରେ ରହିଥିଲେ। କମ୍ପାନୀ ଏହି ନିୟମ ଲାଗି ଚଳିତ ମାସ ୧୫ ତାରିଖ ଯାଏ ସମୟସୀମା ରଖିଥିଲା। ଏହାକୁ କମ୍ପାନୀ ବର୍ତ୍ତମାନ ଉଚ୍ଛେଦ କରିଛି। ଉକ୍ତ ନୀତି ଆଣିବା ପରେ ଏହାକୁ ନେଇ ବିଭିନ୍ନ ମହଲରେ ସମାଲୋଚନା କରାଯାଇଥିଲା। ହ୍ବାଟ୍ସଆପ୍ ଏହାର ମୂଳ କମ୍ପାନୀ ଫେସ୍ବୁକ ସହ ସମସ୍ତ ଡାଟା ଶେୟାର କରିବ ବୋଲି ଲୋକଙ୍କ ମନରେ ଆଶଙ୍କା ପ୍ରକାଶ ପାଇଥିଲା।
ଏହି ପରିପ୍ରେକ୍ଷୀରେ ହ୍ବାଟ୍ସଆପ୍ର ମୁଖପାତ୍ର କହିଛନ୍ତି, ଯଦି କୌଣସି ବ୍ୟକ୍ତିବିଶେଷ ପଲିସି ଅପଡେଟ ଗ୍ରହଣ ନ କରନ୍ତି ତେବେ ତାଙ୍କ ଆକାଉଣ୍ଟ ଡିଲିଟ କରାଯିବ ନାହିଁ। ଆଗାମୀ କିଛି ସପ୍ତାହ ଯାଏ ଲୋକଙ୍କୁ ନୂଆ ନୀତି ଗ୍ରହଣ କରିବା ଲାଗି ରିମାଇଣ୍ଡର ଦିଆଯିବ। ଅଧିକାଂଶ ୟୁଜର ନୂଆ ନୀତି ଗ୍ରହଣ କରିଥିବା ମୁଖପାତ୍ର କହିଛନ୍ତି। କିଛି କିଛି ଲୋକ ଏବେ ଯାଏ ଏହାକୁ ଗ୍ରହଣ କରିନାହାନ୍ତି। ମାତ୍ର କେତେ ସଂଖ୍ୟକ ଲୋକ ଏହା ଗ୍ରହଣ କରିଛନ୍ତି ସେ ନେଇ କମ୍ପାନୀ ପକ୍ଷରୁ କୌଣସି ସ୍ପଷ୍ଟ ସୂଚନା ଦିଆଯାଇନାହିଁ। ଚଳିତ ବର୍ଷ ଜାନୁୟାରୀରେ କମ୍ପାନୀ ଏହାର ନୂଆ ନୀତି କାର୍ଯ୍ୟକାରୀ କରାଇବା ଲାଗି ୟୁଜରଙ୍କୁ ଅବଗତ କରାଯାଇଥିଲା। ପ୍ରାଥମିକ ପର୍ଯ୍ୟାୟରେ ୟୁଜରଙ୍କୁ ଏହା ଗ୍ରହଣ କରିବା ଲାଗି ଫେବୃୟାରୀ ୮ ଯାଏ ସମୟ ଦିଆଯାଇଥିଲା। ନୂଆ ନିୟମ ବିବାଦୀୟ ହେବା ପରେ ଏହି ନିୟମକୁ ଗ୍ରହଣ କରିବା ସୀମାକୁ କମ୍ପାନୀ ମେ ମାସ ୧୫ ଯାଏ ବଢାଇ ଦେଇଥିଲା। ଲୋକଙ୍କ ମନରେ ଭ୍ରାନ୍ତ ଧାରଣା ଏବଂ ଭୂଲ ସୂଚନା ପ୍ରସାରକୁ ରୋକିବା ଲାଗି ଗତ କିଛି ମାସରେ ବିଭିନ୍ନ ପଦକ୍ଷେପ ଗ୍ରହଣ କରାଯାଇଥିବା ମୁଖପାତ୍ର ପ୍ରକାଶ କରିଛନ୍ତି। ଲୋକଙ୍କ ବ୍ୟକ୍ତିଗତ ମେସେଜ ଉପରେ ଏହାର କୌଣସି ପ୍ରଭାବ ପଡିବ ନାହିଁ ବୋଲି ହ୍ବାଟସଆପ୍ ଲୋକଙ୍କୁ ଭରସା ଦେଇଛି। ୟୁଜରଙ୍କୁ ନୂଆ ବିକଳ୍ପ ପ୍ରଦାନ ଦିଗରେ କାମ କରିବା ଆମର ଲକ୍ଷ୍ୟ ବୋଲି କମ୍ପାନୀର ଅଧିକାରୀ ଜଣକ କହିଛନ୍ତି। କମ୍ପାନୀ ଲାଗି ଭାରତ ଏକ ବୃହତ୍ତ ବଜାର ଭାବେ ଉଭା ହୋଇଛି। ଦେଶର ହ୍ବାଟସଆପ୍ର ୫୩ କୋଟି ୟୁଜର ରହିଛନ୍ତି। ଜନସଂଖ୍ୟା ଦୃଷ୍ଟିକୋଣରୁ ଇଣ୍ଟରନେଟ କମ୍ପାନୀଗୁଡିକ ଲାଗି ଭାରତ ଏକ ପ୍ରମୁଖ ବଜାର ରହି ଆସିଛି। ସେହିଭଳି ଡାଟା ବ୍ୟବହାର ସର୍ବବୃହତ୍ତ ଏବଂ ଟେଲିକମ୍ କ୍ଷେତ୍ରରେ ଭାରତ ଦ୍ୱିତୀୟ ବୃହତ୍ତ ଦେଶ। ହ୍ବାଟସ ଆପ୍ ବିବାଦୀୟ ହେବା ପରେ ଟେଲିଗ୍ରାମ ଏବଂ ସିଗନାଲ ଭଳି କମ୍ପାନୀ ୟୁଜର ଅଭିବୃଦ୍ଧି ହାସଲ କରିଥିଲେ। ଲୋକଙ୍କ ମନରେ ଆଶଙ୍କାକୁ ଦୂର କରିବା ଲାଗି କମ୍ପାନୀ ଯଥା ସମ୍ଭବ ପ୍ରୟାସ କରିଥିବା ଅଧିକାରୀ କହିଛନ୍ତି।
