କୋଲକାତା,୪।୫: ପଶ୍ଚିମବଙ୍ଗରେ ଚାଲିଛି ଭୋଟ ଗଣତି । ତୃଣମୂଳ କଂଗ୍ରେସ ଓ ଭାଜପା ମଧ୍ୟରେ କଡ଼ା ଟକ୍କର ଦେଖିବାକୁ ମିଳୁଛି । ଭାଜପା ରାଜ୍ୟରେ ଏବେସୁଦ୍ଧା ଆଗରେ ରହିଛି । ଦଳ ୧୯୯ଟି ଆସନରେ ଆଗୁଆ ଥିବା ବେଳେ ଟିଏମସି ୮୮ ସିଟରେ ଆଗରେ ରହିଛି। ଯାହା ଭାଜପା ଶିବିରରେ ଉତ୍ସାହ ଭରି ଦେଇଛି। ପ୍ରାରମ୍ଭିକ ଟ୍ରେଣ୍ଡକୁ ଦୃଷ୍ଟିରେ ରଖି ପଶ୍ଚିମବଙ୍ଗରେ ଦିଦିଙ୍କ ଖେଳ ଖତମ ହେବା ସହ ଭାଜପା ସରକାର ଗଢିବ ବୋଲି ଆକଳନ କରାଯାଉଛି। ଏହି ସମୟରେ ଏହି ୪ ତାରିଖ ଭାଜପା ପାଇଁ ଶୁଭ ବୋଲି ଚର୍ଚ୍ଚା ଜୋର ଧରିଛି।
ଖେଳ ହେଉ କି ରାଜନୀତି କିଛି ନମ୍ବର ଏମିତି ଥାଏ ଯାହା ବହୁତ କିଛି ଦର୍ଶାଇଥାଏ । ଯେମିତି ଜୁନ ୪, ୨୦୨୪ ଏବଂ ମେ ୪, ୨୦୨୬ ଅର୍ଥାତ୍ ୪ ତାରିଖଟି ଭାଜପା ପାଇଁ ଅତ୍ୟନ୍ତ ଶୁଭଙ୍କର ନମ୍ବର ପରି ମନେହେଉଛି । ଆପଣ ଭାବୁଥିବେ ଏହି ଦୁଇ ତାରିଖରେ ଏମିତି କଣ ରହିଛି….
ଓଡ଼ିଶା ରାଜନୀତିରେ ୪ ଜୁନ ୨୦୨୪ ଏକ ଐତିହାସିକ ଦିନ ଥିଲା । ଏହା ଭାଜପା ପାଇଁ ମଧ୍ୟ ଅତ୍ୟନ୍ତ ଶୁଭଙ୍କର ଥିଲା । କାରଣ ଏହି ଦିନ ନିର୍ବାଚନ ଫଳାଫଳ ପ୍ରକାଶ ପାଇବା ସହ ରାଜ୍ୟରେ ୨୪ ବର୍ଷର ବିଜେଡି ଶାସନର ଅନ୍ତ ଘଟିଥିଲା। ସମସ୍ତଙ୍କୁ ଚକିତ କରି ଶାସନ ଗାଦି ଅକ୍ତିଆର କରିଥିଲା ଭାଜପା । ଦୀର୍ଘ ବର୍ଷର ସଂଘର୍ଷ ପରେ ରାଜ୍ୟରେ ଭାଜପା ନିଜ ବଳରେ ସରକାର ଗଢିବାରେ ସମର୍ଥ ହୋଇଥିଲା । ରାଜ୍ୟରେ ନବୀନ ଲହର ରହିଥିଲେ ସୁଦ୍ଧା ସିଟ୍ ହାତେଇବାରେ ସମର୍ଥ ହୋଇଥିଲା । ଦଳ ୧୪୭ରୁ ୭୮ଟି ଆସନ ଜିତି ପ୍ରଥମ ଥର ପାଇଁ ଓଡ଼ିଶାରେ ଏକାକୀ ସରକାର ଗଠନ କଲା । ଶକ୍ତିଶାଳୀ ବିଜେଡି ଦ୍ବିତୀୟ ନମ୍ବରରେ ରହି ମାତ୍ର ୫୧ଟି ସିଟ ହାତେଇବାରେ ସଫଳ ହୋଇଥିଲା ।
ଓଡ଼ିଶାରେ ୨୦୨୪ର ପରିବର୍ତ୍ତନ ପରେ ସାରା ଦେଶର ନଜର ୨୦୨୬ ବିଧାନସଭା ନିର୍ବାଚନ ଉପରେ ରହିଥିଲା । ବିଶେଷ କରି ପଶ୍ଚିମବଙ୍ଗ, ଆସାମ ଏବଂ ଦକ୍ଷିଣ ଭାରତରେ ଭାଜପା ପ୍ରଭାବକୁ ନେଇ ବେଶ ଚର୍ଚ୍ଚା ଚାଲିଥିଲା । ଆଜି ମେ ୪ ତାରିଖ ହୋଇଥିବା ବେଳେ ଭାଜପା ପାଇଁ ଖୁସି ଖବର ଆଣିଛି । ପଶ୍ଚିମବଙ୍ଗ, ଆସାମ, କେରଳ, ତାମିଲନାଡୁ ଏବଂ ପୁଡୁଚେରୀରେ ଭୋଟ ଗଣତି ଜାରି ରହିଛି । ଟ୍ରେଣ୍ଡ ଏବଂ ଏକଜିଟ ପୋଲ ଅନୁଯାୟୀ, ଭାଜପା ପାଇଁ ପରିସ୍ଥିତି ବେଶ ଅନୁକୂଳ ଦେଖାଯାଉଛି । ସବୁ ସ୍ଥାନରେ ଭାଜପା କିମ୍ବା ଭାଜପା ସମର୍ଥିତ ମେଣ୍ଟ ଭଲ ପ୍ରଦର୍ଶନ କରୁଥିବା ଦେଖିବାକୁ ମିଳୁଛି । ବିଶେଷ କରି ପଶ୍ଚିମବଙ୍ଗରେ ମମତା ଗଡରେ ଧସେଇ ପଶିବାରେ ଭାଜପା ସଫଳ ହୋଇଛି । ତେଣୁ ଏହି ୪ ତାରିଖକୁ ନେଇ ସବୁଠି ଚର୍ଚ୍ଚା । ଏହା ଭାଜପା ପାଇଁ ଅତ୍ୟନ୍ତ ଶଭଙ୍କର ।
