ପାଟଣା,୧।୩: ଧରମ ଝିଅକୁ ବିବାହ ଦେବାକୁ ମଧ୍ୟପ୍ରଦେଶ ଯାଇଥିବା କେନ୍ଦୁଝର ଜିଲା ପାଟଣା ବ୍ଲକ୍ ଅଞ୍ଚଳର ଜଣେ ବ୍ୟକ୍ତିଙ୍କ ସନ୍ଦେହଜନକ ମୃତ୍ୟୁ ହୋଇଛି। ତାଙ୍କୁ ହତ୍ୟାକରି ଫିଙ୍ଗି ଦିଆଯାଇଥିବା ଅଭିଯୋଗ ହୋଇଛି। ମୃତକ ହେଲେ ଟାଙ୍ଗରପଡ଼ା ପଞ୍ଚାୟତ ଗାଲଫୁଲା ଗ୍ରାମ ଉପର ସାହିର ଗଗନ ବିହାରୀ ନାଏକ। ମଧ୍ୟପ୍ରଦେଶ ପୋଲିସ(ନଂ.୨୦/୨୩ )ରେ ମାମଲା ରୁଜୁ କରିଛି।
ସୂଚନା ଅନୁଯାୟୀ, ଗତ ଗୁରୁବାର ପାଟଣା ବ୍ଲକ୍ ଚିନାମାଳି ପଶି ଗ୍ରାମର ଧରମ ଝିଅ ଲିଲି ମୁଣ୍ଡାଙ୍କ ବିବାହ ପାଇଁ ମଧ୍ୟସ୍ଥି ସଞ୍ଜୟ ମହାନ୍ତଙ୍କ ସହ ଗଗନ ମଧ୍ୟପ୍ରଦେଶ ରାଜ୍ୟ ନିର୍ଦାପୁରମ ଜିଲା ସୁଆଗପୁର ଥାନା ବନଖେଡ଼ି ଗଁାକୁ ଯାଇଥିଲେ। ତେବେ ରବିବାର ଗଗନଙ୍କ ରକ୍ତ ଜୁଡୁବୁଡୁ ମୃତଦେହ ସ୍ଥାନୀୟ ରେଳ ଷ୍ଟେଶନ ନିକଟରୁ ପୋଲିସ ଜବତ କରିଥିଲା। ସୁଆଗପୁର ପୋଲିସ ଦୁର୍ଘଟଣା ମାମଲା ରୁଜୁ କରି ସେଠାକାର ମେଡିକାଲରେ ଶବ ବ୍ୟବଚ୍ଛେଦ ପରେ ଅନ୍ତିମ ସଂସ୍କାର କରିଥିଲା। ଗଗନଙ୍କ ପୁଅ ମୁନା ନାଏକ ତାଙ୍କ ବାପାଙ୍କୁ ମାରି ଫିଙ୍ଗି ଦିଆଯାଇଛି ବୋଲି ସୋମବାର ପାଟଣା ଥାନାରେ ଅଭିଯୋଗ କରିଛନ୍ତି। ଏନେଇ ପାଟଣା ଥାନାଧିକାରୀ ମନୋରଞ୍ଜନ ପ୍ରଧାନ କହିଛନ୍ତି, ଘଟଣା ଘଟିଥିବା ଥାନା ଓ ଝିଅର ବାପଘର ଥିବା ଥାନା ଅଞ୍ଚଳରେ ଅଭିଯୋଗ କରିବା ପାଇଁ ଅଭିଯୋଗକାରୀଙ୍କୁ କୁହାଯାଇଛି। ଅନ୍ୟପକ୍ଷେ ପ୍ରତିବର୍ଷ ପାଟଣା ଓ ସାହାରପଡ଼ା ବ୍ଲକ୍ ଅଞ୍ଚଳର ଗରିବ ଓ ଅସହାୟ ମା’-ବାପାମାନେ ଯୁବତୀ ଓ ନାବାଳିକାଙ୍କୁ ଦଲାଲମାନଙ୍କ ମାଧ୍ୟମରେ ବିକ୍ରି କରିଦେଉଛନ୍ତି। ଏଥିପ୍ରତି ଜିଲା ପ୍ରଶାସନ ଦୃଷ୍ଟିଦେଇ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଦାବି ହେଉଛି।
