ଜୋହାନ୍ସବର୍ଗ,୨।୧: ଭାରତୀୟ ଅଧିନାୟକ ବିରାଟ କୋହଲିଙ୍କ ପାଖରେ ବର୍ତ୍ତମାନ କୋଚ୍ ତଥା ପୂର୍ବତନ ଅଧିନାୟକ ରାହୁଲ ଡ୍ରାଭିଡ୍ଙ୍କ ରେକର୍ଡକୁ ପଛରେ ପକାଇବାର ସୁଯୋଗ ଅଛି। ଦକ୍ଷିଣ ଆଫ୍ରିକାରେ ସର୍ବାଧିକ ଟେଷ୍ଟ ରନ୍ କରିଥିବା ଭାରତୀୟ ବ୍ୟାଟରଙ୍କ ତାଲିକାରେ କୋହଲି ତୃତୀୟ ସ୍ଥାନରେ ଅଛନ୍ତି। ଏପର୍ଯ୍ୟନ୍ତ ଦକ୍ଷିଣ ଆଫ୍ରିକାରେ ୬ ମ୍ୟାଚ୍ ଖେଳିଥିବା ଭାରତୀୟ ଅଧିନାୟକଙ୍କ ନାମରେ ୬୧୧ ରନ୍ ରହିଛି। ସେହିଭଳି ଡ୍ରାଭିଡ୍ ୧୧ ମ୍ୟାଚ୍ରେ ୬୨୪ ରନ୍ କରିଥିଲେ। ଏହି ଧାରାରେ ବର୍ତ୍ତମାନ କୋଚ୍ଙ୍କୁ ପଛରେ ପକାଇବା ପାଇଁ କୋହଲିଙ୍କୁ ୧୪ ରନ୍ ଦରକାର। ତେବେ ଏହି ଦେଶରେ ଭାରତୀୟ ବ୍ୟାଟର ଭାବେ ସଚିନ ତେନ୍ଦୁଲକର ସର୍ବାଧିକ ରନ୍ କରିଛନ୍ତି। ସେ ୧୫ ମ୍ୟାଚ୍ରେ ସର୍ବାଧିକ ୧୧୬୧ ରନ୍ କରିଥିଲେ।
ଦୁଇ ବର୍ଷ ହେଲା ଶତକ ଅପେକ୍ଷାରେ ଥିବା କୋହଲି ସେଞ୍ଚୁରିଆନ ଟେଷ୍ଟରେ ୩୫ ରନ୍ର ଇନିଂସ ଖେଳିଥିଲେ। ଦ୍ୱିତୀୟ ପାଳିରେ ୧୮ ରନ୍ କରିଥିଲେ। ଉଭୟ ଥର ଅଫ୍ ଷ୍ଟମ୍ପ ବାହାର ବଲକୁ କଭର ଉପରେ ମାରିବାକୁ ଯାଇ ଧରା ପଡ଼ିଥିଲେ ଉଇକେଟ ପଛରେ।
ଏହାବାଦ୍ ଷ୍ଟିଭ ଓ୍ବ’ଙ୍କ ଅଧିନାୟକତ୍ୱ ରେକର୍ଡର ସମ୍ମକକ୍ଷ ହେବାର ସୁଯୋଗ ରହିଛି ୩୨ ବର୍ଷୀୟ ବ୍ୟାଟରଙ୍କ ପାଖରେ। ଏପର୍ଯ୍ୟନ୍ତ ୬୭ ଟେଷ୍ଟରେ ଦଳର ନେତୃତ୍ୱ ନେଇଥିବା କୋହଲି ୪୦ଟି ମ୍ୟାଚ୍ ଜିତିଛନ୍ତି। ଜୋହାନ୍ସବର୍ଗ ଟେଷ୍ଟରେ ଭାରତ ବିଜୟ ହେଲେ ସଫଳତମ ଟେଷ୍ଟ ଅଧିନାୟକଙ୍କ ତାଲିକାରେ କୋହଲି ମିଳିତ ତୃତୀୟ ସ୍ଥାନ ଅଧିକାର କରିବେ।
