ନୂଆଦିଲ୍ଲୀ,୨୦।୮: ଦକ୍ଷିଣ ଆଫ୍ରିକାର ‘ମିଷ୍ଟର ୩୬୦ ଡିଗ୍ରୀ’ ଭାବେ ପରିଚିତ ଏବି ଡିଭିଲିୟର୍ସ ଭାରତୀୟ କ୍ରିକେଟର ଦୁଇ ମହାନ ବ୍ୟାଟର ସଚିନ ତେନ୍ଦୁଲକର ଓ ବିରାଟ କୋହଲିଙ୍କୁ ନେଇ ବଡ଼ ବୟାନ ଦେଇଛନ୍ତି । ତାଙ୍କ କହିବା ଅନୁସାରେ, ବିଦେଶୀ ପିଚ୍ରେ ଭାରତୀୟ ବ୍ୟାଟରଙ୍କ ସଫଳତା ପାଇଁ ସଚିନ ତେନ୍ଦୁଲକର ଏକ ନୂଆ ମାନଦଣ୍ଡ ସ୍ଥାପନ କରିଥିଲେ, କିନ୍ତୁ ବିରାଟ କୋହଲି ସେହି ପ୍ରଦର୍ଶନକୁ ଆହୁରି ଉଚ୍ଚ ସ୍ତରକୁ ନେଇଥିଲେ ।
ନିଜ ୟୁଟ୍ୟୁବ୍ ଚ୍ୟାନେଲରେ ପ୍ରତିକ୍ରିୟା ଦେଇ ଡିଭିଲିୟର୍ସ କହିଛନ୍ତି ଯେ, ସଚିନ ପ୍ରଥମ ଖେଳାଳି ଥିଲେ ଯିଏ ପ୍ରମାଣ କରିଥିଲେ ଯେ, ଉପମହାଦେଶର ଜଣେ ବ୍ୟାଟସମ୍ୟାନ ଭାବରେ, ବାଉନ୍ସ ଏବଂ ସିମ୍ ଗତି ପ୍ରଦାନ କରୁଥିବା ପରିସ୍ଥିତିରେ ମଧ୍ୟ ଜଣେ ଭଲ ପ୍ରଦର୍ଶନ କରିପାରିବ। ବିରାଟ ସେହି ପରମ୍ପରାକୁ ଆଗକୁ ବଢ଼ାଇଛନ୍ତି ଏବଂ ସ୍ତରକୁ ଆହୁରି ଉଚ୍ଚ କରିଛନ୍ତି।ଡିଭିଲିୟର୍ସ କହିଛନ୍ତି ଯେ ବିରାଟ ଓ ସଚିନଙ୍କ ପ୍ରଦର୍ଶନର ପ୍ରଭାବ ଏବେ ଅନ୍ୟ ଭାରତୀୟ ବ୍ୟାଟରଙ୍କ ଉପରେ ମଧ୍ୟ ଦେଖିବାକୁ ମିଳୁଛି । କେଏଲ୍ ରାହୁଲ ଓ ଦେବଦତ୍ତ ପଡିକ୍କଲଙ୍କ ଭଳି ଖେଳାଳିମାନେ ମଧ୍ୟ ଏହି ପରମ୍ପରାକୁ ଆଗକୁ ନେଉଛନ୍ତି। ଡି’ଭିଲିୟର୍ସଙ୍କ ମତରେ, ବିଦେଶୀ ପରିସ୍ଥିତିରେ ଭାରତୀୟ ବ୍ୟାଟରଙ୍କ ପ୍ରଦର୍ଶନର ମାନଦଣ୍ଡ ବଦଳାଇବାରେ ବିରାଟଙ୍କ ବଡ଼ ଭୂମିକା ରହିଛି ।
ତେବେ ଡିଭିଲିୟର୍ସ କେଏଲ୍ ରାହୁଲଙ୍କ ବିଦେଶୀ ରେକର୍ଡକୁ ନେଇ ମଧ୍ୟ ମତ ରଖିଛନ୍ତି। ତାଙ୍କ କହିବା ଅନୁସାରେ, ରାହୁଲଙ୍କ ବ୍ୟାଟିଂ ଟେକ୍ନିକ୍ ଅତ୍ୟନ୍ତ ମଜବୁତ ଏବଂ ସେ ଭାରତୀୟ ଦଳ ପାଇଁ ଜଣେ ବଡ଼ ସମ୍ପଦ । କିନ୍ତୁ ବିଦେଶରେ ତାଙ୍କ ହାରାହାରି ପ୍ରଦର୍ଶନ ଆଶା ଅନୁସାରେ ହୋଇନାହିଁ।ଡିଭିଲିୟର୍ସ କହିଛନ୍ତି ଯେ ବିଦେଶୀ ମାଟିରେ ନୂଆ ବଲ୍ର ସାମ୍ନା କରିବା ସବୁବେଳେ କଷ୍ଟକର। ପ୍ରଥମ ବଲ୍ରେ ଶୂନ୍ୟରେ ଆଉଟ୍ ହେବା କିମ୍ବା ନୂଆ ବଲ୍ର ଶିକାର ହେବାର ଆଶଙ୍କା ରହିଥାଏ। ତେଣୁ ରାହୁଲ ଯେତେବେଳେ ଭଲ ଭାବେ ସେଟ୍ ହୋଇଯାଆନ୍ତି, ସେତେବେଳେ ତାଙ୍କୁ ବଡ଼ ଇନିଂସକୁ ଆହୁରି ବଡ଼ କରିବା ଉପରେ ଧ୍ୟାନ ଦେବାକୁ ପଡ଼ିବ ବୋଲି ଡିଭିଲିୟର୍ସ ପରାମର୍ଶ ଦେଇଛନ୍ତି।
