ଅମ୍ବାଦୋଳା,୨୨ା୧୦(ଡି.ଏନ୍.ଏ.): ସ୍ବାମୀ ଟାଙ୍ଗିଆ ଚୋଟରେ ସ୍ତ୍ରୀଙ୍କ ଜୀବନ ଚାଲିଗଲା। ରାୟଗଡ଼ା ଜିଲା ଅମ୍ବାଦୋଳା ଥାନା ଅଧୀନ ଶୁକ୍ଳାଭଟ୍ଟା ଗ୍ରାମରେ ଗୁରୁବାର ରାତିରେ ଏଭଳି ଘଟଣା ଘଟିଛି। ମୃତ ମହିଳା ହେଲେ ଗାଁର ସୁରେନ୍ଦ୍ର ବଚା(୩୨)ଙ୍କ ସ୍ତ୍ରୀ ଝରଣା(୩୦)।
ସୂଚନା ଅନୁଯାୟୀ, ରାତିରେ ଖାଇସାରି ଦମ୍ପତି ଏବଂ ତାଙ୍କର ୨ ବର୍ଷର ଝିଅ ଶୋଇଥିଲେ। ଏହି ସମୟରେ ସୁରେନ୍ଦ୍ର ଘରେ ଥିବା ଟାଙ୍ଗିଆରେ ସ୍ତ୍ରୀ ଝରଣାଙ୍କୁ ବାରମ୍ବାର ଚୋଟ ପକାଇଥିଲେ। ଏଥିରେ ତାଙ୍କର ଘଟଣାସ୍ଥଳରେ ମୃତ୍ୟୁ ଘଟିଥିଲା। ହତ୍ୟା କରିବା ପରେ ସୁରେନ୍ଦ୍ର ଝିଅ ଏବଂ ଟାଙ୍ଗିଆକୁ ସାଙ୍ଗରେ ନେଇ ଚମ୍ପଟ ମାରିବାକୁ ଚେଷ୍ଟା କରୁଥିଲେ। ତେବେ ପଡ଼ୋଶୀମାନେ ଏହା ଜାଣିପାରି ତାଙ୍କୁ କାବୁକରି ଘର ମଧ୍ୟରେ ବନ୍ଦ ରଖି ବାହାରେ ଜଗି ରହିଥିଲେ। ସକାଳେ ଅମ୍ବାଦୋଳା ଥାନାକୁ ଖବର ଦେବାପରେ ପୋଲିସ ପହଞ୍ଚି ଅଭିଯୁକ୍ତଙ୍କୁ ଗିରଫ କରିଛି। ଘଟଣାସ୍ଥଳରେ ଏସ୍ଡିପିଓ ଆକାଶ ଚନ୍ଦ୍ର ସାହୁ, ଅମ୍ବାଦୋଳା ଥାନା ଅଧିକାରୀ ଦେବଦତ୍ତ ମଲିକ ଏବଂ ପୋଲିସ ପହଞ୍ଚି ସାଇଣ୍ଟିଫିକ୍ ଟିମ୍ ସହାୟତାରେ ତଦନ୍ତ ଚଳାଇଛି। ଏ ନେଇ ପୋଲିସ ଏକ ହତ୍ୟା ମାମଲା (ନଂ.୧୨୬/୨୧) ମାମଲା ରୁଜୁ କରିଛି। ତେବେ ହତ୍ୟାକାଣ୍ଡର ପ୍ରକୃତ କାରଣ ସ୍ପଷ୍ଟ ହୋଇ ନ ଥିବା ଥାନା ଅଧିକାରୀ ସୂଚନା ଦେଇଛନ୍ତି।
