ଭୁବନେଶ୍ୱର, ୭।୫(କ୍ରୀଡ଼ା ପ୍ରତିନିଧି)-
ଓଡ଼ିଶା ଏଫ୍ସିର ଫୁଟ୍ବଲ କମିଟିରେ କିମ୍ବଦନ୍ତୀ ଫୁଟ୍ବଲର ଡେଭିଡ ଭିଲ୍ଲାଙ୍କୁ ସାମିଲ କରାଯାଇଛି। ଭୁବନେଶ୍ୱରଭିତ୍ତିକ ଇଣ୍ଡିଆନ ସୁପରଲିଗ୍ (ଆଇଏସ୍ଏଲ୍) ଫ୍ରାଞ୍ଚାଇଜ୍ ପକ୍ଷରୁ ଗୁରୁବାର ଏହା ପ୍ରକାଶ କରାଯାଇଛି। ସ୍ପେନ ଲିଜେଣ୍ଡ ଭିଲ୍ଲାଙ୍କୁ କ୍ଲବର ଗ୍ଲୋବାଲ ଫୁଟ୍ବଲ ଅପରେଶନ ହେଡ୍ ଦାୟିତ୍ୱ ପ୍ରଦାନ କରାଯାଇଛି। ଓଡ଼ିଶା ଏଫ୍ସି ସହିତ ସାମିଲ ହେବାପରେ ଭିଲ୍ଲା କହିଛନ୍ତି ଯେ, ”ମୁଁ ନିଜ ଅଭିଜ୍ଞତାକୁ ଉପଯୋଗ କରିବାକୁ ଚେଷ୍ଟା କରିବି। ମୁଁ ଭାରତରେ ଖେଳିନାହିଁ ସତ, ମାତ୍ର ଜଣେ ପେସାଦାର ଖେଳାଳିଭାବେ ଦୀର୍ଘ ୨୦ ବର୍ଷ ଏବଂ ତା’ ପୂର୍ବରୁ ଏକାଡେମୀରେ ରହିବାର ଅଭିଜ୍ଞତା ଅଛି। ଆମ ଦଳ ଯେତେପ୍ରକାର ପ୍ରୋଜେକ୍ଟ କରିବ ସେଥିରେ ମୁଁ ନିଜ ଫୁଟ୍ବଲ ଅଭିଜ୍ଞତା ଉପଯୋଗ କରିବି“। ଓଡ଼ିଶା ଏଫ୍ସି ସିଇଓ ରୋହନ ଶର୍ମା ସ୍ବାଭାବିକଭାବେ ଖୁସି ଜାହିର କରିଛନ୍ତି। ”ଓଡ଼ିଶା ଏଫ୍ସି ପରିବାରକୁ ଭିଲ୍ଲା ଏବଂ ଡିଭି୭ (ଭିଲ୍ଲାଙ୍କ ଗ୍ରୁପ୍) ଗ୍ରୁପ୍ଙ୍କୁ ସ୍ବାଗତ କରିବା ଆମ ପାଇଁ ଖୁସିର କଥା। ପୂର୍ବରୁ ଆମେ ଭିଲ୍ଲାଙ୍କ ଆକ୍ସନକୁ ଟିଭିରେ ଦେଖୁଥିଲୁ। ମାତ୍ର ଏବେ ଓଡ଼ିଶାରେ ଫୁଟ୍ବଲର ବିକାଶ ପାଇଁ ସାଥିହୋଇ କାମ କରିବୁ। ସ୍ପେନରେ ଦୀର୍ଘ ବର୍ଷ ଫୁଟ୍ବଲ ବିଜ୍ନେସ ଅଭିଜ୍ଞତା ରଖିଥିବା ଭିକ୍ଟର ଓନାଟେ ଏବଂ କୋଚ୍ ଗୋମ୍ବାଉଙ୍କ ସହ ମିଶି କାର୍ଯ୍ୟକରିବା ଆମ ପାଇଁ ଆନନ୍ଦଦାୟକ। ଗୋମ୍ବାଉ ଆମ ପରିବାରର ଅଂଶବିଶେଷ ସଦୃଶ। କ୍ଲବ ପାଇଁ ଶ୍ରେଷ୍ଠ ଖେଳାଳି, କୋଚ୍ ଏବଂ ସପୋର୍ଟ ଷ୍ଟାଫ୍ ଆଣିବା ପାଇଁ ଆମେ ସାଥିହୋଇ କାର୍ଯ୍ୟ କରିବୁ“ ବୋଲି ରୋହନ କହିଛନ୍ତି। କ୍ଲବ ସଭାପତି ରାଜ ଅଟଓ୍ବାଲ ମଧ୍ୟ ଭିଲ୍ଲାଙ୍କୁ ନେଇ ଖୁସି ଜାହିର କରିଛନ୍ତି। ରାଜ୍ୟ କ୍ରୀଡ଼ା ଓ ଯୁବ ସେବା ବିଭାଗର ପ୍ରମୁଖ ସଚିବ ବିଶାଳ କୁମାର ଦେବ ଏପରି ନିଷ୍ପତ୍ତିକୁ ସ୍ବାଗତ କରିଛନ୍ତି। ”ଭିଲ୍ଲା ସ୍ପେନ ଦଳର ସଦସ୍ୟଭାବେ ୟୁରୋ ଏବଂ ବିଶ୍ୱକପ ଟାଇଟଲ ଜିତିଛନ୍ତି। ସେହିପରି ବାର୍ସିଲୋନା ସହ ଲା ଲିଗା ଏବଂ ଚାମ୍ପିୟନ୍ସ ଲିଗ୍ ଚାମ୍ପିୟନ ହୋଇଛନ୍ତି। ତାଙ୍କ ଫର୍ମୁଲାରେ ଓଡ଼ିଶା ଏଫ୍ସି ଉନ୍ନତ ପ୍ରଦର୍ଶନ ସହ ଆସନ୍ତା ବର୍ଷ ଆଇଏସ୍ଏଲ ଟେବୁଲର ଶୀର୍ଷରେ ରହିବା ଆଶା ରହିଛି। ଆମେ ଅତ୍ୟନ୍ତ ଉତ୍ସାହିତ,ଉଲ୍ଲସିତ ଏବଂ ତାଙ୍କ ଉପସ୍ଥିତି ଓଡ଼ିଶା ଏଫ୍ସି ପାଇଁ ଭିନ୍ନତା ଆଣିବାନେଇ ଆମେ ଦୃଢ଼ ଆଶାୟୀ“ ବୋଲି ବିଶାଳ କହିଛନ୍ତି। ପୂର୍ବତନ ଓଡ଼ିଶା ଏଫ୍ସି ମୁଖ୍ୟ କୋଚ୍ ଜୋସେପ ଗୋମ୍ବାଉ ଓ ଭିକ୍ଟର ଓନାଟେ ଡିଭି୭ର ଅଂଶବିଶେଷ ରହିବେ। ଏହି ଗ୍ରୁପ୍ କୋଚିଂ ଷ୍ଟାଫ୍ଙ୍କୁ ବିଭିନ୍ନ ପରାମର୍ଶ ଦେବା ସହ ଭାରତୀୟ ଏବଂ ଯୁବ ଖେଳାଳିଙ୍କ ପ୍ରଦର୍ଶନରେ ଉନ୍ନତି ଓ ପଡ଼ିଆ ଭିତରେ ବିଭିନ୍ନ କାର୍ଯ୍ୟକଳାପ ସମ୍ପର୍କରେ ସପୋର୍ଟ ଯୋଗାଇଦେବ।
